Managsoon Ba Kamong Duha?
Ang pangutana sa batang lalaki nakasurprisa nako ug nakatudlo kanako og usa ka importanting leksyon.
Litrato sa maayong kabubut-on sa tagsulat
Ang akong higala nga si Laurie Wharemate Keung usa ka Maori. Ako naggikan sa kaliwat nga English. Sukwahi ang among mga pamanit, kolor sa mata, kolor sa buhok, ug gitas-on. Lahi gyod kami og nawong kon tan-awon. Apan usa ka adlaw samtang si Laurie ug ako nagserbisyo sa mga bata sa usa ka pangpublikong eskwelahan, usa ka bata nga lalaki misurprisa kanamo sa usa ka pangutana.
“Igsoon ba kamong duha?” nangutana siya.
Mikatawa ko, nga naghunahuna nga dili sinsero ang iyang pangutana. Ang batang lalaki, hinoon, nangutana nako pag-usab, “Igsoon ba kamong duha?”
Nakaamgo nga sinsero siya, mihunong ko sa makadiyot ug naghunahuna, “Wala ba makakita kining bataa sa klaro nga kalahian sa among hitsura ug kaliwat?” Tingali nakita niya apan nagtuo nga kini wala ray kalainan. Mahinangpon kaayo siyang naghulat sa akong tubag.
Gisultihan nako siya nga dili kami igsoon, nga nakapasagmuyo kaniya. Apan gisundan nako sa pagsulti nga gibati namo kanunay nga sama sa managsoon samtang mag-uban kami sa pagserbisyo. Mura siya og natagbaw ra niana nga tubag ug midagan padulong sa iyang lamesa.
Kining sinsero nga pangutana sa bata nagbilin og malungtaron nga impluwensya ngari kanako. Ngano man? Tungod kay ang iyang pangutana nagsulti kanako og usa ka kamatuoran—nga ang pamilya dili lang sa dugo o hitsura. Ang akong bana ug ako napanalanginan sa among pagsagop og duha sa among mga anak. Amo silang gihigugma, ug ang paghigugma ug pagserbisyo mga mahinungdanon nga bahin sa mga pamilya.
Total, kitang tanan anak man sa atong “usa lamang ka Dios ug Amahan” (Mga Taga-Efeso 4:6).
Nakaingon ko nga kining bataa siguro nagtan-aw gyod ni Laurie ug nako nga nag-istoryahanay. Tingali samtang nagtan-aw siya kanamo nga nagtinabangay o naghalog sa usag usa, siya miasumer nga managsoon kami. Ang iyang pangutana nagpahinumdom nako nga ang mga bata kanunayng magtan-aw sa mga hamtong ug magmugna og mga opinyon sa unsa ang atong gisulti ug gibuhat ug kon giunsa nato sa pagtagad ang usag usa. Kon kining bata nakahunahuna nga kami managsoon, nan sigurado nga ang mga bata sa tibuok kalibotan makaasumer nga kitang tanan managsoon kon kita maghigugmaay ug moalagad sa usag usa.
Ang among mga kalahian nakatugot ni Laurie ug kanako sa pagdala og lain-laing mga kalig-on ug mga panglantaw sa among mga buhat sa gugma nga putli, nga nakapahimo niining mas epektibo. Imbis tugotan ang among mga kalahian nga mobulag kanamo, kami migamit niini sa pagbuhat og maayo ug tungod niana nakaporma og usa ka suod nga panaghigalaay. Ang pangutana sa batang lalaki mahimong usa ka leksyon alang sa tanang anak sa Dios.