Katea Tion
Iroun Unimwane Gerrit W. Gong
Man te Kooram n Abotoro n te Tengaun ma Uoman
Ngkai Aika Itiaki ni Boong aika Kaitira a kakabwaiaki n te euangkerio are e a tia ni kaokaki, ti weteaki bwa tina kakorakora te Ekaretia ao ni katea Tion.
TAMNEIN TE MABE IROUN Getty Images
Rinanon nako rongorongon rimoa, a tia ana aomata te Uea ni kataia n uotarake te bootaki ibukin te euangkerio are E kona n tiku iai. N riki bwa te komiuniti ibukiia Aika Itiaki, ti riai n reiakinna ni kaitiakiira ao ni katiteuanai nanora ao ara iango, ni mwakuri inanon te etieti n akea te itabarara ao te kaiangatoa, ao ni maeka inanon te raoiroi ao n akea te kainnano ibuakora. (taraa Mote 7:18).
Te katoto, imwiin kainakin ana Ekaretia Iesu Kristo Ibukiia Aika Itiaki ni Boong aika Kaitira iroun John ao Maria i Gravely, England, n 1842, John e a riki bwa te beretitenti n te mwaanga n te tabo. Ana koraki ao raoraona, ni kaitaraana, a aki uataboa te kukurei are e kunea te Linfords ni Kaokan te Euangkerio. Ngkana aki kona ni kaira nanon John bwa e na kiitana ana aro ae e boou, ngkanne a na “karaoi bwaai aika a kangaanga” man totokoan ana bitineti ni karao kau.
N 1856 te Mwane ni buoka ae te Perpetual Emigrating Fund e karekea ana tai John ao Maria ni mwananga nakon te Salt Lake Valley. A ienako nako New York ma teniman natiia mwaane. Mai ikekei a mwananga nako Iowa City, Iowa, ao mai ikekei a kitanna n Turai 1856 ma ana kambwana James G. Willie n aenika are e kananokawaki rongorongona.
Ni moan Okitobwa 21, n rabeen te Karaanga are Sweetwater i Wyoming, e anga ana kabanea ni bwaebwaeti John.
“I rang kukurei bwa ti roko,” e tuanga Maria ngke e titirakinna ngkana e nanokawaki ngkai a kiitana Engiran. “Ni maiu N na bon aki roko i Salt Lake, ma ngkoe ao natira mwaane kam na roko, ao I aki nanokawaki ni bwaai ni kabane ake ti a tia n rinanona ngkana a ikawai rake natira ao ni katei utu i Tion.”1
Tera Tion?
Tabeua atuun maroro i tinanikun bungiakin te Uea Iesu Kristo e a tia n ringii nanoia burabeti n taai akekei ao n taai aikai ao Aika Itiaki n ae raka riki nakon ikotakiia ni boong aika kaitira n ana auti Iteraera ao katean Tion ni katauraoi nakon Kauaokin te Tia Kamaiu.2
Bukin tera e rang kakaawaki Tion irouia Aika Itiaki ni Boong aika Kaitira—ngkekei ao ngkai, n tabo nako ake a mena iai ana aomata te Uea?
Unimwaane Bruce R. McConkie (1915–85) man te Kooram n Abotoro n te Tengaun ma Uoman e katanoata, “Man ana tai Atam ni karokoa te tai aei—n te tai are a tia iai n reke ana aomata te Uea; n te tai are iai naake a tia ni kakauongo nakon bwanaana ao ni kawakin ana tua; n te tai are ana aomata Aika a Itiaki a tia ni beku ibukina ma nanoia ni koaua ae bwanin—ikanne e a tia n reke iai Tion.”3
Koroboki aika a tabu e kabwarabwara ana botanaomata Tion. Enoka, te burabeti ae korakora ana onimaki n ana bong Noa, “e katea te kaawa are e aranaki bwa te Kaawa ae Tabu, are Tion,” (Mote 7:19). Te Uea e maeka ikekei ma Ana aomata, ni kakabwaiaia ao abaia. (taraa Mote 7:16–18). Te Uea e taku nakon Enoka, “Nooria, Ngai te Atua; Te Aomata ae Tabu bon arau” (Mote 7:35).
Te kantaninga ibukin Tion bon katean te tabo ni katiteuanaaki inanon te onimaki iaon te reirei n tiretio i karawa, are a nakonako iai ana aomata te Atua ma ngaia ao te Atua e kona ni maeka iai.
Ana Boki Moomon e kakoaua bwa imwiin utin te Tia Kamaiu e kawara te Aonaaba ae Boou, “a rairaki aomata nakon te Uea, iaon te aba. …
“Ao a katiteboaki imarenaia, ngaia are a bon aki kaubwai ao aki kainnano, aki kabaeaki ao aki inaomata, ma a bon kainaomataaki, ao a katoonga te bwai n tituaraoi mai karawa. …
“Ao e a koro bukina bwa bon akea te itabaraaraa n te aba, ibukin tangiran te Atua are e bon maeka inanoia aomata” (4 Nibwaai 1:2, 3, 15).
Otanganaki n te Raoiroi ao te Mwaaka
Ana bong Enoka bon te tai ni buaka, kawawaeaki te raraa, maaku, rotongitong, ao te riribai—ngke “ mwaakan Tatan e mena i aon te aonaba.” (Mote 7:24; tarai naba kibu aika 16, 17, 33). Ma Enoka e kakaonimaki, ao te Uea e weteia bwa e na taetaekina te rairannano.
Te Uea e tuanga Enoka bwa aekakin naba anne “te karawawata ae korakora” (Mote 7:61) e na waaki imwain Kauaokina. “N aron ae I maiu, ao N na bon oki ni boong aika kaitira, ni bongin te buakaka ao te kabomwi, ni kakoroa nanon te tuea are I a tia ni karaoia nakoim ni kaineti ma natin Noa” (Mote 7:60).
N ara bong, Beretitenti Russell M. Nelson e taku ai tibwa ngkai naba, “I noora te butinaoraki ae ngkai te [COVID-19] bwa ti teuana man aoraki aika a mwaiti ake a taona ara aonaaba, n raonaki ma te riribai, te aki rau irouia te botanaomata, riribai irouia reeti, kakiriwe, aonikai, ao te aki karinerine.”4 E ngae n anne, ti karekea te karaunano. Beretitenti Nelson e taekinna naba:
“Ti maeka n te bong ae “ara bakatibu a kaman tataninga ma te kariaria ae korakora.’ [Reirei ao Berita aika Tabu 121:27.] Ti noori bwai bwa a bon riki ni kakoauai raoi bwaai ake e noori te burabeti Nibwaai n tii te mii, bwa mwakan ana Tiibu te Teei te Atua e na ruo “nako aoia ana aomata i nanon te berita ae tabu te Uea, ake a maenako i aon te aonaba ni kabuta; ao a otangaia n te raoiroi ma mwaakan te Atua ao te mimitong ae korakora.’ [1 Nibwaai 14:14.]
“Ngkami, tariu ao mwaneu, kam mena ibuakoia mwaane, aine, ao ataei ake e noori Nibwaai.”5
Te kakao n ikotakiia ao kakabwaiakiia naake n iteran te rabuna aika uoua, a katea Tion, ao a katauraoa te aonaaba ibukin Kauaokin ara Tia Kamaiu n raonaki ma ngaira n tatabemaniira nako. “Mai buakoia ni kabane aomata ake a maeka iaon te buraneti ,” e taku Beretitenti Nelson, “ngaira are ti riki bwa taan ira waakin te ikoikoti n te kabanea n tai, ae kakannato aei.”6
Tina Kanga n Roko Ikekei?
Ngkai Aika Itiaki ni Boong aika Kaitira ti kakabwaiaki n te euangkerio are e kaokaki, ti “weteaki bwa ti na mwakuri n ana nne ni kurebe [te Uea], ao ni karikirakea [Ana] ekaretia, ao ni katea Tion” (Reirei ao Berita aika Tabu 39:13). Te mwakuri anne e kainnanoa te tangira, katiteuanaaki, onimaki, ibuobuoki, anganano, ao te ongotaeka.
“Ngkana aomata a tangira te Atua ma nanoia ni kabane ao ni kataia ni maiuakina te raoiroi n riki n ai Arona, e na karako te un ao te ikakaiwi irouia te botannaomata. E na korakora riki te katiteuanaaki,” e taku Unimwaane Quentin L. Cook man te Kooram n Abotoro n te Tengaun ma Uoman. E reitia: “Te Katiteuanaaki e … bati nanona, bon te taeka ae kona ni kananonai baika a mwaiti, ma ni koauana bon katootoon te moan ao te kauoua n tua aika a rang korakora n tangira te Atua ao n tangiriia aomata. E nanona ana aomata Tion ake a “bootaki nanoia n te nano ae ti teuana’ [Motiaea 18:21].”7
Ma te tangira ao te kateuanaaki anne, ti karaoa te onimaki ni katoka iaon ana Mwakuri ni Kamaiu te Tia Kamaiu, are e kona ni bitiira bwa ana itiaki nanora ao maiura (taraa Motiaea 3:19; Reirei ao Berita aika Tabu 97:21). Ti ikotiia naake a kan nakon te Uea inanon te raoiroi. Rinanon otenanti aika tabu ao ana tua te abanuea ae te tiretio, ti kaoa te mwaaka n atua inanon maiura (taraa Reirei ao Berita aika Tabu 105:5). Katabuaki man bwainakin te berita ma te Atua ao imarenara, ti katea Tion ao ti katauraoi ibukin te Kauaoki.
“Te tangira ae itiaki bon ana tangira Kristo,” e taku Beretitenti Henry B. Eyring, Kauoman ni Kauntira n te Moan Beretitentii. “Ao bon onimakinana ao korakoran Ana Mwakuri ni Kamaiu are akea tokina are ko na tau iai, n reitaki ma naake ko tangiriia ao ni beku ibukiia, nakon te bwaintangira ae moanibaan te tamaroa ni maeka n te tabo are e a kaman kakantaningaaki ao ni beritanaki bwa Tion.”8
Katauraoi ibukin Boong aika A Nang Roko
Burabeti ni boong aikai a reirei bwa kawaran te Tia Kamaiu bon man te kabaeaki iroun temanna ma temanna, tiaki te tabo are ko mena iai.
“Ni boong ake ngkoa n te Ekaretia, te rairaki n tabetai e nanonaki naba n te mwananga,” e kabwarabwara Beretitenti Nelson. “Ma ngkai te ikoikiotaki e karaoaki n aaba ni kabane. E a tia te Uea ni katanoata katean Tion n oin aia tabo are E a tia n anganiia Ana aomata Aika Itiaki bwa a bungiaki iai ao abaia.”9
Ngkai ti butimwaai kakaewenako ao kakabwaia ni katean Tion inanon ara utu nako, mwaanga, uoote, titeiki, ao komiuniti, ti taratara ma John ao Maria Linford nakon te bong are natira ao tibura “a kona n rikirake ao ni karikirakeia aia utu inanon Tion” ibuakoia aba nako, reeti, ao neewe.
Ngkai ti ukoukora moa te Uea ma Raoiroina, ti tataro “bwa e aonga abanueana ni waaki nako i aon te aonaba, bwa aonga kaaina ni karekea, ao n tauraoi ibukin boong aika a na roko, are e na roko iai Natin te Aomata mai karawa, ni kunikaiaki n ootan mimitongina, ni kaitibo ma uean te Atua are e kateaki n te aonaba.” (Reirei ao Berita aika Tabu 65:5).