Te Ibuobuoki man Iteran te Rabuna are te Iterana
Ngke I wene ni maraki n te onaoraki, I namakina te maroa ni karokoa I uringiia au bakatibu.
Tamnei iroun Getty Images
N 2017, I a bikoukou iroun au moan nati. Kainnabau, Lucas, ao ngai ti rang kukurei ma ni maaku n rokon natira ae uarereke Juan Lionel.
Ni bwakanakontai ni moan Beberuare 2018, I a moana mamarakiu. I a tokara au kawaniua n namwakaina, ma e tara n ae natira e na moantaai n roko nakon are ti kantaningaia. Ti anai ara bwai tabeua ao ti waekoa n nako nakon te kiriniki. I aki tauraoi n rinanon te mamaraki, ma I tataro, ni butiia te Atua bwa e na bon kakoroaki ana kantaninga n aki tabe ma maakura.
Ngke ti roko n te kiriniki, au tia tobi e kaongoaki ma e taku bwa e roko rimwi. Kainnabau e tareboon ao e tekiti ana rongorongo nakoia ara karo ao tarira ma mwanera, ma akea ae uti mai irouia. E reitinako n tatareboon ao n tekiti inanon te tairiki, ma bon akea ae kaeka. Anne ae I a bon tiku iai ni maroa.
Ngke e a rikirake te maraki ni kan bung, I a namakina riki te maroa ae rikirake. N te tai ae karina, ni kaitaraana, iai te bwai ae riki ae kamimi. I a tabe n iangoia au bakatibu—riki tibu te unaine mairoun tinau, Rosa Mercad, ao tinana, Javiera Balmaceda.
Ngke I uringiia, I namakinna inanou ao n au iango bwa a mena irarikiu n te tai anne. I namakina kaotiia n te aro ae korakora ae rang n tamaroa n te aro are I aki kona n rang kona ni kabwarabwara n te taeka te bwai are I a rinanona. I aki nooriia, ma I namakinna bwa a kaan irarikiu, n anganai te kaunganano, boutoka ao te tangira n ai aron tinau ao n aron ae mwakoron au utu. I namakinna bwa ngaiia au anera n ibuobuoki n au tai ni kainnano.
Ririki ake mai imwaina n te tembora, tinau, tamau, tariu ao mwaneu, kainnabau, ao ngai ti karaoa aia mwakuri n tei ibukiia ao n onomwi ni mwakuri ibukiia ara bakatibu ake tabeman. I namakinna bwa te ninikoria are I karekea ao te namakin are au bakatibu a mena irarikiu bon te bwaintangira rinanon te mwaaka ao te kariaiakaki mairoun te Atua.
Man te tai anne, I a tia n namakina tamneia au bakatibu n taai riki tabeua, ni buokai ao ni kairai n arou n tina ao ni kainnaba ao ni mwakoron nako maiu aika a kakaawaki.
I kakoaua bwa te Atua e na bon aki katikuira bwa tina maroa iaon kawaira inanon maiura. Ngkana ti karaoa Ana mwakuri, e na bon anganiira te ibuobuoki man iteran te rabuna are teuana. Ti na karekea te tangira, ataibwai, korakora, ao te rau “are aki konaki n ataaki teuana” (I-Biribi 4:7).