Kairake n Ikawai
Kinaakin te Raoiroi Inanora
E maeka te tia korokaraki i Utah, USA.
Kona kanga ni kabwarabwara te bwaintangira ni kikina? Ni karokoa ngkai, I bon rang ni kabwaka ni kabuaakin teuana mai ibuakon oin kakaawakin te bwaintangira aei.
Kamataata n te tamnei iroun Getty Images
N angiin maiu, I a tia ni kabwarabwara te bwaintangira ni kikina bwa te kona ni kina te eti man te kairua, te koaua man te bure. Ngkai anne raoi kakaawakin mwakoron te bwaintangira, I a tibwa ataia bwa iai riki ae raka irarikina.
I kunea te kaubwai ni bwaai aika a na taraaki mai inano n te maroro are e kanakoaki n Eberi 2020 n te maungatabu ni kabuta. Te tia taetae e taekina ana taeka Beretitenti Stephen L Richards (1879–1959), te Moan Kauntira ngkoa n te Moan Beretitentii, are e taekinna, “Te kabanea n rietata ni kikina bon are e kuneaki irouia tabeman ao e kaotaki nakoia rikiia ae tamaroa riki, te bwai ae raoiroi are e unikaki inanoia.”1
Tiaki anne kaanga ai aron taekan te kamatenano?
Te Tamnei ae Raoiroi e kona ni buokiira ni kaota te raoiroi reke inanoia tabeman. Koauan te mwakoro n taeka anne e rang kakukurei irou n te aro are I tangiria n reiakina ae mwaiti riki. I kunea bwa Unimwaane David A. Bednar man te Kooram n Abotoro n te Tengaun ma Uoman e reirei naba bwa te bwaintangira ni kikina e buokiira ni “kunea ao ni katea te raoiroi are e karabaaki inanora.”2
Man te kukune aei, I a tibwa ata aron kakaawakin te mwakoro ni bwaintangira ni kikina aei. Ti riai ni kunei anua aika a raraoi inanora bwa ti aonga ni kona ni karikirakei. Ngkai ti kona, ti na namakinna ao ni karaoa ae raka riki n ai aroia natin te Atua are bon ngaira raoi (taraa Taian Areru 82:6; Motiaea 5:7; Moronaai 7:19).
Ngaia are tina kanga ni waaki ni kunei bwaai aika a raraoi inanora? Aikai tabeua iango bwa e aonga ni waki.
Kabotoa am Kantaninga iaon Kabongaanan Korakoram ni Kakabwaia Tabeman
Bon reirein te koaua are aomata nako iai aia bwaintangira mairoun te Atua (taraa Reirei ao Berita aika Tabu 46:11)—ao e aki matebuaka iangoakiia. Ni koauana, te Uea e tuangiira bwa tina iangoia! Koroboki aika a tabu e reireiniira bwa tina ukoukori “ukoukorii bwaai n tituaraoi aika moan te raraoi, n uringa n taai nako bukin anganakimi” (Reirei ao Berita aika Tabu 46:8; e kairaki katuruturuana).
Ngkai ti moanna n atai ara bwaintangira ke tarena, ti riai ni kakaai kawai ni kabonganai ni buokiia tabeman.
Teuana te kawai ni kinaakin am bwaintangira bon titirakinan temanna ae ko onimakinna! Titirakiniia bwa tera korakoram. Ngkana titebo ngkoe ma ngai, kona bae n iangoia bwa anne kaanga e a bon kamanga. Ma uringnga, tiaki anne bukin te bwai ae akea manenana; bon taekan kakaean ana tarena ke te korakora are iai iroum are kona anganiia tarim ao mwanem n te aonaaba (taraa Motiaea 8:18).
Te katoto, kain rarikiu ae akoi e tuangai n te taina bwa iai au tarena ni buokakiia aomata n namakina te rau. Nakon riki kamaunaakin te taeka n ti te kamoamoa ae akoi, I a waaki n taratara te bwaintangira anne inanon maiu. Ngke I karaoia, I a taia bwa Tamau are i Karawa e kona ni buokai ni kabongana au konabwai ma aomata n iraorao ma tabeman ao ni kakabwaia maiuia aika a mwaiti riki nakon maiu.
Man ataakin am tarena, ko kona ni kina n rineia ni kabonganai ni kakabwaia tabeman (taraa Reirei ao Berita aika Tabu 82:18).
Kamatebwaia Am Kakabwaia n te Tamanuea
Tamnei iroun Judith Ann Beck
Kakabwaia n tamanuea ngaia naba te bwai ae tamaroa ibukin noorakin ara bwaintangira aika onoti, are e anganiira te Atua. Unimwaane Larry R. Lawrence, te membwa ngkoa ae karineaki n te Itingaun, e taku: “Te Tamnei e kona ni kaota nakoira kabwakara, ma E kona naba ni kaota nakoira korakorara. … Ngkana ti wareki ara kakabwaia n tamanuea, ti kauringaki bwa Tamara are i Karawa e atai arora ae ti kona ni karekei mai karawa.”3
Kamatebwaian am kakabwaia n tamanuea e na buokiko ni boboto iaon karikirakean te anua are e kona ni buokiko bwa kona karekea am konabwai.
Irou, I katamneia n tabetai te aekaki n tina are I kantaningaia bwa N na katotonga n te bong teuana. N akean ataakina, I bae n iangoa te tina ae tamaroa bwa e tirim, barongaaki ao e tikiraoi—ao ana cinnamon rolls a mataiakinaki irouia kain ana uoote n te Bootaki n Aine. Ngkai bwaai akanne a bon aki buakaka, kamatebwaian au kakabwai n te tamanuea e a tia ni kaotia nakoiu bwa te Uea e mwawannano riki nakon are Ngai te tina ae akoi ao e tatangira. Irou, anuan Kristo akanne bon ngaiia are I riai n rang n ingainga ni karikirakei.
Uringnga ao Kauringnga n tain te Toa
Tamnei iroun Jerry Garns
Te toa bon te tai n iangoa taekan te Tia Kamaiu. Bon te tai naba ni kauring iaon rikirakem n riki n ai Arona. Ngkai ko mwakuri ni kakaai korakoram aika a tamaroa, tanrikaaki ni katoa wiiki n rikirakem, taneiai, ao ni bobo ibuako ni kona ni buokiko n noori taai ake ko noori iai am tarena.
Beretitenti Henry B. Eyring, Te Kauoman ni Kauntira n te Moan Beretitentii, e taku: “Ngkai ko kamwataua n taraa aron maium n tain te otenanti n te toa, au kantaninga bwa am iango aki ti boboto iaon bwaai ake ko a tia ni karaoi aika a kairua ma bwaai naba ake ko a tia ni karaoi aika a eti—taai ake ko a tia n namakina iai Tamam are i Karawa ao te Tia Kamaiu ngke a kukurei iroum. Ko kona naba n anaa tabeua te tai n tain te toa ni butiia te Atua bwa e na buokiko n noori bwaai aikai.”4
Aikai tabeua titiraki aika ko kona n titirakiniko ke te Atua n tain te toa:
-
I kanga n iriira ana banna ni katoto Kristo n te wiiki aei?
-
Antai ae I beku ibukina?
-
Nningai ae I namakina iai te Tamnei n te wiiki aei? Bukin tera?
-
Tera te anua ae ai aron Kristo ae I kataia ni karikirakea? E uara au kekeiaki?
-
Iai te bwai inanon maiu ae I riai n tataro bwa N na buokaki iai?
-
Iai te aomata ae I riai ni kabwara ana bure?
-
Tera te kangaanga teuana, ae bubura ke ae uarereke, are a tia Tamau are i Karawa ao Iesu Kristo ni buokai iai n te wiiki aei?
Iangoan tamaroan te Atua ao n tirobaean maiu n tain te toa nakon are bon tii te boboto ti iaon kabwaka ao kairua e buokai ni katuka au onimaki Irouna.
Kakorakoraan Nakoam
Ti anganaki nakoara bwa iai bukina, riki ngkana ti aki ata bukina n te moan tai.
I weteaki n te taina bwa N na beku n te beretitentii n te Bootaki n Aine n au uoote irouia kairake n ikawai ake a tuai ni iein. I bon rang kukurei ni waaki. Ma imwiin tabeua te namwakaina, I namakina te bwarannano. I aki noora rikirakeu n te maiu n tamnei inanoia naake I kataia ni buokiia. Au kekeiaki n kakawari ao n iraorao e taraa n aki nakoraoi.
Te Tabati teuana, I namakinna ae kaanga I kabua te bwaintangira n te tamnei are e buoka temanna bwa e na nakoraoi n tain te ibuobuoki. Au tataro n tain te toa n te bong anne bon namakinan te kakoaua bwa N na konabwai n nakoau. I namakina te kukurei n bubuti ibukin te kakabwai n te nakoanibonga.
I kaitibo ma au bitiobi, ao ngke e katoka baina iaon atuu, teuana te moan bwai are e taekinna nakoiu bon, “Tamara are i Karawa e kakaitau ibukin am akoi are ko kaotia nakoia tabeman.”
E ruo te Tamnei nako aou, ao I namakina te kakoaua bwa te Uea e kukurei n au kekeiaki. I namakinna ae I bon karekea mwakoron te bwaintangira are I kainnanoia n ibuobuoki ma te tangira. I a bon tia ni kataunaari kabwakau nakon nakoraoiu.
Nakoami bon tibwanga aika a korakora ni kuneakin ao ni kabonganaakin ami bwaintangira n tamnei.
Ko Konaa ni Waakinna Ngkai
Ti aki kainnanoia bwa tina tataninga ni waaki n noori tamaroa ake inanora.
Beretitenti Dieter F. Uchtdorf, ngke te Kauoman ni Kauntira n te Moan Beretitentii, e taku:
“N tabetai ti namakina te bwarannano ibukina bwa tiaki “raka.” n te bwai teuana—n rangin ni kairaki n te tamnei, karineaki, wanawana, marurung, kaubwai, itangitangiri, ke ni konabwai. …
“I reiakinna inanon maiu bwa ti aki kainnanoia bwa ti na “atai riki” bwaai riki tabeua ni moanna n riki bwa te aomata ae tangiria te Atua bwa ti na katotoongnga.”5
Ti kona ni waaki ma te tataro. Tuanga Tamam are i Karawa aron am namakin ngkai, ao tera aron am namakin are ko tangiria ibukim. Ni kaonoti ti kona ni bubuti ibukin te bwaintangira ni kikina bwa e na buokiko n noora tamaroan are ko karekea. Tabeua tai aika tamaroa inanon maiu a tia n roko man taekinan tataro aikai. I kakoaua bwa Tamara are i Karawa e ingainga ni kan buokiira n noori ni kabane bwaai ake E noori.
Ibukin kinaakira ae natin te Atua, ti kantaningaaki ibukin te kabanea n tamaroa (taraa Reirei ao Berita aika Tabu 78:17). Rinanon te bwaintangira ni kikina, ti kona n atai akanne ibon iroura.