“Bwa Anne Aran au Ekaretia”
Iroun Beretitenti Henry B. Eyring
Kauoman ni Kauntira n te Moan Beretitentii
Ngkana ti kabongana aran te Ekaretia ae bwanin, tina kakabwaiaki ao tina kakabwaiaia tabeman.
I Aberika, aomata n tatabemaniia ake a ukoukora te ekaretia are a ribootinaki bwa a karekea te mii. Inanon miia, a tuangaki bwa a na tarataraa te ekaretia ae aranaki n aran Iesu Kristo. Ngke a karaoa aia ukeuke, a kunea ti teuana te ekaretia are e boboto iaon aran te Tia Kamaiu—Ana Ekaretia Iesu Kristo Ibukiia Aika Itiaki ni Boong aika Kaitira.
I Latin America, tabeman Aika Itiaki ni Boong aika Kaitira a ribooti bwa aia kakao nakoia raoraoia n ira “Te Ekaretia ae te Moomon” a kaitara ma te ngurengure. Anne e bitaki ngke a kanakoa te kakao nakon Ana Ekaretia Iesu Kristo Ibukiia Aika Itiaki ni Boong aika Kaitira. “Ngkana am ekaretia e aranaki bwa Ana Ekaretia Iesu Kristo,” a kaeka raoraoia, “ti kan roko n nooria.”
N te United States, te ataeinimwaane ae kain te Moanrinan e kaoia kain rarikina nakon ana bwabetito. Te minita n te aro teuana e taku bwa e bon aki kan roko nakon te bwabetito n ana “Ekaretia te Moomon”. Ma ibukina bwa e kona n taekinna bwa ana ekaretia te ataeinimwaane e boboto iaon Iesu Kristo, e a iri te minita ma buuna.
Ngke te tia mwakuri n te tabo ni kabaeara n te wanikiba e titirakina te membwa n te Ekaretia ibukin ana aetureti n ana imeeri, te membwa e kaeka, “ldschurch.org.”
“Tera te ekaretia anne?” e titiraki te tia mwakuri.
“Ana Ekaretia Iesu Kristo Ibukiia Aika Itiaki ni Boong aika Kaitira,” e kaeka te membwa.
“I nako ni mwakuri ni katoa bong n aki kona n tataekina taekan te Uea,” e taku te tia mwakuri. “Ataakina ngkai I a taetae nakon temanna te Kiritian e bon katamaroa au bong.”
Te membwa n te Ekaretia e waekoa ni kabooua ana burobwaera n te tabo ni wanikiba ma ana imeeri aetureti ae boou ibukin te Ekaretia:: ChurchofJesusChrist.org.1
E Kakoroaki Bukin te Berita
Karaki aika a tamaroa aikai a kakoroa bukin ana berita Beretitenti Russell M. Nelson ake e karaoi nakoia Aika Itiaki ni Boong aika Kaitira n Okitobwa 2018 ao e a manga anga riki n Eberi 2020.
“I berita nakoimi bwa ngkana ti karaoa ara kabanea n tamaroa ni kaeta aran ana Ekaretia te Uea, Ngaia are bon ana Ekaretia aei E na kanakoa Mwaakana ao ana kakabwaia nako aon atuuia aika Itiaki, n te aro ae ti tuai n nooria mai mwaina.” e taku Beretitenti Nelson. “Ti na karekea ana atatai ao mwaakan te Atua ni buokiira ni karekei kakabwaia n ana euangkerio Iesu Kristo are e kaokaki nakoia aba, reeti, neewe, ao te botanaomata ao ni katauraoa te aonaaba ibukin Kauaokin te Uea.”2
Ae ai tibwa ngkai, rinanon bwaai n reitaki n au akaunti, I kaoia kain te Ekaretia bwa a na tuangai taekan kakabwaia ake a karekei man kabonganakin aran te Ekaretia ae eti. E riingaki nanou ni karekean kaeka aika e raka iaon 2,600 mwaitina.
I tangiria n tibwai tabeua mai iai ma ngkami. A na bon bae n aki boou i taningami ibukinia bwa kam a tia ni karekei kakabwaia n aekaia ngkai kam a tia n ira ana reirei Beretitenti Nelson.
Kaniiaki riki nakon Iesu Kristo
I riingaki n ana koaua Jacob n aron kabonganakin aran te Ekaretia ae bwanin are e a tia ni buokia ni kabotoa ana iango iaon te Tia Kamaiu: “I namakinna bwa kabotoan au iango iaon Iesu Kristo e a tia n rooti anuan maiu aika kakaokoro,” e tibwaia nakoiu. “Ngkana I ana te toa, I Iangoia ao Ana anganano n Ana mwakuri ni kamaiu. Ngkana I wareki koroboki aika tabu, I kanakoa riki au iango nakon Ana taeka ao booki riki tabeua nakoIna. Karaoan aei e a tia ni kaniia riki nakoIna ao e a tia ni buokai ni matata riki n tibwangana n riki bwa au Tia Kamaiu ao te Tia Kabooa maiu.”
I namakina te kakabwaiaki n reiakina nanon aran te Tia Kamaiu iroun Beth ao Bryce: “I a tia n namakina te kaniiaki riki nakon au Tia Kamaiu,” e taku Beth. “Ngkana I titirakinaki bwa tera te ekaretia ae I iria, ao I kaeka bwa ngai kain ana Ekaretia Iesu Kristo Ibukiia Aika Itiaki ni Boong aika Kaitira, I namakinna bwa bon ngai kaaina ni koaua. Ngai kain Ana baronga n aomata. Ngai kain Ana utu. Ngai bon Ana bwai.”
Bryce e tuangai bwa aran te Ekaretia ae eti e buokia n “uringnga bwa antai ae I beku ibukina ao antai ae I ukoukoria n riki n ai arona. E kauringai bwa te Tia Kamaiu bon ngaia are e anga taian reirei aikai ao a aki roko mairouia aomata.”
“Aran te Tia Kamaiu Iai Mwaakana”
Haley, te mitinare ae bwanin ana tai, e taku: “Kabonganaan aran ana Ekaretia te Uea ae eti e uota te mwaaka ae korakora riki ao te kariaiakaki ngkana ti reireiniia tabeman taekan Ana euangkerio are e kaokaki. Ngkana I taekina ‘Ana Ekaretia Iesu Kristo Ibukiia Aika Itiaki ni Boong aika Kaitira,’ Tamnein te Uea e kamatoa ao e kakoaua bwa aio bon ana ekaretia te Uea are e kaokaki nako aon te aba ni boong aikai. I tangira kabonganaan te ara ae eti ibukina bwa I anga naba au kakoaua ae maiu nakon te koaua anne!”
Ao Nicola e tuangai: “Mai imwaina, ngkana I kangai ‘Moomon,’ n angiin te tai iai te bwai ae kia n te nanokokoraki irouia ake tiaki kain ara aro. Ko kuri kona n ongo okin aia ururing ni kabane ake a tia n ongo taekan te Moomon.’ Ma ngkai iai te rau, e moamoa riki butimwaeana. Aran te Tia Kamaiu iai mwaakana. E uota te rau. Au kakoaua ni koauan te euangkerio e a tia n rikirake ti man taekinan aran te Ekaretia ae eti. I namakina te Tamnei ni katoa te tai are I taekinna. N tabetai ti ngaia ae I kona n taekinna n te bwai are ti kakoaua, ma e bon tau.”
Kaitiakan te Nanokokoraki
Harold, te burobetia n te iuniwetiri n te United States, e taekinna bwa kabonganaan aran te Ekaretia ae bwanin e a tia ni buokia ni kaitiaka te nanokokoraki. E tuangai temanna ataein te reirei, ngke e kataia ni kakimototoa te maroro iaon taekan te aro, e taku, “I taku bwa aaro ni kabane bon Kiritian ma ti kain te Moomon.”
Noorakin te tai ae kakaawaki ni kaitiaka te nanokokoraki anne, e taekinna Harold,“I tuangiia ataein te reirei bwa ‘Moomon’ bon te nikineim are aranaki iai kain te Ekaretia ibukina bwa a kakoaua te Baibara ao Ana Boki Moomon bwa koroboki aika a tabu man rimoa ake a kakoaua Iesu Kristo.”
Mary e kamatata mai inanona nakoiu, n tibwaia bwa e kanga aran te Ekaretia ae bwanin ni kakabwaia n reiakinaia natina: “Natiu e a kerikaaki aia nanokooraki n te tai aei ngke I reireiniia bwa ngaira aika Itiaki n ana Ekaretia Iesu Kristo ibukiia Aika Itiaki ni Boong aika Kaitira ni kaitara arara are kain te ‘Moomon.’ N tainako a bae n nanououa ao a titiraki, ‘Bukin tera Moomon? E nanonaki n anne bwa ngaira tiaki Kiritian?’ I namakinna bwa te bitaki aei e a tia ni buokiia ngkana a taetae nakoia ataei ake tabeman n te reirei ake tiaki taan onimaki.”
“Ngai bon te Mitinare ibukin Iesu Kristo”
Beretitenti Nelson e berita bwa ngkai ti kabongana aran te Ekaretia ae eti, “ti na karekea te atatai ao mwaakan te Atua” n tibwaua te euangkerio. Teresa e kaunga nanou n ana karaki n te bwai are e riki ngke raoraona n ana tabo ni mwakuri e titirakinna ibukin te Ekaretia. Imwiin ana reirei Beretitenti Nelson, Teresa e waaki man tibwauakin aran te Ekaretia ae bwanin.
“Teuaei iai nanona n te Ekaretia,” e tuangai. “E kakaea rongorongona inanon tabeua te namwakaina, ma te kamimi, e a bwabetitoaki iroun natiu te mwane, te bitiobi. I namakina te kukurei n te bong anne, ao au utu naba. Taian berita a bon koaua.”
Jordan e taku bwa a mwaiti aomata aika a teimatoa n aki taneiai ma aran te Ekaretia. “Kabonganaan aran te Ekaretia ae bwanin,” e taku, “e anganai te tai ni kabwarabwara bwa e kanga te Ekaretia are boboto iaon Iesu Kristo ao bukin tera ti araniira bwa Aika Itiaki ni Boong aika Kaitira.”
Ngke te mwane e titirakina Chloe ngkana ngaia “Mitinaren te Moomon,” e kakorakora ni kakoaua, “Tiaki, Ngai ana mitinare Iesu Kristo.” Chloe e tuangai bwa te mwane are e kaota nanona ni kan iriira te Tia Kamaiu, ngaia are e reireinna teuanne bwa Ana Ekaretia Iesu Kristo Ibukiia Aika Itiaki ni Boong aika Kaitira e kairaki iroun te Tia Kamaiu. Imwiina e anganna rongorongon Ana Ekaretia.
“Arana te Ekaretia n Arau”
Ni kaotan aran Ana Ekaretia nakon te burabeti Iotebwa Timiti, te Tia Kamaiu e katanoata, “Bwa anne aran au ekaretia ni boong aika kaitira, ae Ana Ekaretia Iesu Kristo ibukiia Aika Itiaki ni Boong aika Kaitira” (Reirei ao Berita aika Tabu 115:4). Ao nakoia Nibwaite, e taku, “Ngaia are kam na arana te ekaretia n arau,” bwa “e na kanga n ae au ekaretia ngkana e aki aranaki n arau?” (3 Nibwaai 27:7, 8).
I kakoaua ma te aomata ae Itiaki ni Boong aika Kaitira ae arana Tommie bwa ngke ti kabongana bwaninin aran te Ekaretia, ti kakabwaiaki ao ti kakabwaiaia ake tabeman. Tommie e tuangai, “Ngkai I tibwaia ma tabeman kakabwaia n riki bwa te membwa n Ana Ekaretia Iesu Kristo Ibukiia Aika Itiaki ni Boong aika Kaitira n te tai are e roko iai te maku, I ataia bwa I a buokiia tabeman n ataia bwa iai te katantan man te angibuaka iroun ana reirei Iesu Kristo, are e tabe ibukiia ao ake a iriiria.”