“Maungatabu ni Kabuta: Bowiin te Ekaretia ni Kabutaa te Aonaaba,” Riaona, Tebetembwa/Okitobwa 2021
Boton te Euangkerio
Maungatabu ni Kabuta: Bowiin te Ekaretia ni Kabutaa te Aonaaba
Ti ongora irouia burabeti ao taan kairiiri n te Ekaretia ake tabeman n tain te maungatabu ni kabuta. A reireiniira te bwai are e tangiria te Atua bwa tina ongo.
Ni katoa Eberi ao Okitobwa, te Ekaretia e karaoi rinanin boowi are a aranaki bwa maungatabu ni kabuta. Taan kairiiri a reirei ao a kakoaua iaon Iesu Kristo ao Ana euangkerio. Te Maungatabu ni kabuta e karaoaki i Salt Lake City, Utah, USA, ao e kanakoaki n te kanakobwana ni kabuta te aonaaba n taetae aika a raka iaon 90 mwaitina. Ni kabane membwa ao aomata riki tabeman ake iai nanoia a kaoaki bwa a na ongora nakon taian maroro.
Te Moan Maungatabu n te Ekaretia
E moan kinaaki tein te Ekaretia n tain te boowi n Eberi 6, 1830 (taraa Reirei ao Berita aika Tabu 20). Te moan maungatabu ni kabuta e karaoaki n Tuun 9, 1830. Imwiina ngkanne, maungatabu ni kabauta a kairaki iaan ana tararua te Beretitenti n te Ekaretia n tabo nako ake a kona n ikotaki iai membwa. N 1840 tabun, taan kairiiri a moana karaoakin maungatabu uoua te tai n te ririki.
Aron Maungatabu ni Barongaaki ni Boong Aikai
Te Moan Beretitentii, te Kooram n Abotoro n te Tengaun ma Uoman, ao taan kairiiri n te Ekaretia ake tabeman a taetae n tain te maungatabu ni kabuta. Te Tabaenako Kuaea n te Tembora Tikuea ao kuaea tabeua n te Ekaretia a katauraoi anene. Ni katoai maungatabu iai nimaua tetere: teniua n te Kaonobong ao uoua n te Tabati.
Aia Reirei Taan Kairiiri
N namwakaina imwain te maungatabu, taan kairiiri n te Ekaretia a tataro ibukin te bwai are a na angareirei iaona. Te Uea e kairiia bwa a na ata te bwai are a riai n taekinna. A reirei koauan te euangkerio ao a kaoira ni kabane bwa tina kawakin ana tua te Atua. A kakoaua naba iaon Iesu Kristo ao a kaungaira bwa tina Iriiria.
Reiakinna man te Maungatabu
Imwain te maungatabu ni kabuta, ti kona n tataro bwa tina ongo te bwai are e tangiriira te Uea bwa tina reiakinna. Ngkai ti ongora nakon taian maroro, te Tamnei e na reireiniira te bwai are ti riai n ataia. Imwiin te maungatabu, taian maroro a kaoti iaon ChurchofJesusChrist.org, n te Gospel Library app, ao n te Riaona. Ti kona n tataro mwaaka ni kamatebwaia te maroro bwa tina reiakina riki taekan Iesu Kristo ao Ana euangkerio.
Man Booki aika Tabu
Iesu Kristo e reirei bwa ti riai ni kakaitibo n taai nako (taraa 3 Nibwaai 18:22).
Ngkana kain te Ekaretia a ikotaki n taromauri, te Uea e na raoniia (taraa Mataio 18:20).
Te Uea e tuangiia membwa n te Ekaretia bwa a na ”reirei ao ni karikirakeingkami i marenami” (Reirei ao Berita aika Tabu 43:8).
Ngkai kain te Ekaretia a kakaonimaki ao a kamwakura aia onimaki iroun Kristo, Tamneina e na raoniia ngkai a ikotaki (taraa Reirei ao Berita aika Tabu 44:2).