Digital Lamang: Mga Young Adult
Ang Langitnong Amahan ug si Jesukristo Makatabang Kanato nga Makaadto sa Templo
Nag-atubang ko og daghang oposisyon sa wala pa nako madawat ang akong pagtuga, apan ang pagsalig ni Kristo nakatabang kanako sa paghimo og mga pakigsaad.
Sa dihang bata pa ako, ang akong pamilya mibiyahe ngadto sa Tokyo Japan Temple. Ang 12 ka oras nga bihaye sa sakyanan taas, apan mapasalamaton kami sa panahon nga among nagahin nga nagkauban, ug among nagahin ang among biyahe sa paghisgot sa among kamahinamon mahitungod sa pag-adto sa templo.
Nianang panahona wala pa ko nag 12 anyos, busa nakasulod ra ko sa lobby sa templo. Apan ang kasagrado nga kinaiyahan niana nga luna mibayaw sa akong kasingkasing uban sa kainit sa Espiritu.
Mahimo ra unta ko nga magpabilin niana nga lobby hangtod sa kahangtoran. Mao nga dihang miabot ang panahon sa pagpamauli, misugod na sa pag-agas ang mga luha sa akong nawong. Ang templo paspas nga nagkagamay diha sa layo samtang midrive kami palayo, ug gimingaw na ko sa kakusog sa Espiritu nga akong nabati sa sulod.
Determinado ko sa pagbalik usa ka adlaw. Kon ang Espiritu ingon niana ka kusog diha sa lobby, dili na ko makapaabot nga masinati unsa ang bation nga makasulod na gayod ug maghimo sa mga ordinansa. Gusto nakong mobuhat sa bisan unsa pay akong mahimo sa pagpangandam sa pagsulod ugma damlag.
Pag-atubang sa Oposisyon
Bisan og ako kanunayng naningkamot sa pagtuman sa mga sugo ug pagpakabuhi nga takos, ako tinud-anay nga nag-andam gayod sa pagdawat sa akong pagtuga sa dili pa ako moadto sa akong misyon.
Mikuha ko og klase sa pagpangandam sa templo nga nakatabang kaayo nako. Ang duha ka tigpangalagad nga mga sister mitanyag sa pagtubag sa mga pangutana ug pagtabang kanako nga masayod unsay mapaabot. Ug samtang ako naminaw sa ilang mga kasinatian ug sa ilang mga pagpamatuod, misamot ang akong pagtinguha sa pagpangandam sa pagsulod sa templo.
Apan nasurprisa kaayo ko, pagkahuman nako sa akong klase sa pagpangandam sa templo ug samtang ang adlaw sa akong pagtuga nagkaduol na, misugod nako sa pag-atubang og daghang mga tintasyon.
Sa samang paagi, nakita nako ang daghang oposisyon sa pagpangandam sa pagserbisyo og full-time nga misyon. Ako nakasinati og dakong kabalaka. Ang akong kahimsog sa pangisip misugod sa pagkaluya, ug kinahanglan ko nga mohimo og lakang sa pag-atubang sa akong mga pagbati ug mopadayon sa unahan uban sa hugot nga pagtuo.
Samtang nahitabo kini, akong naamgohan nga ang kaaway dili gusto nga ako mohimo niining dakong espirituhanong mga lakang.
Pagkaplag og Kalig-on diha ni Kristo
Sa pagbatok niini nga oposisyon, nag-ampo ko sa matag adlaw alang sa tabang sa pagbuntog sa tintasyon ug sa akong mabalak-on nga mga pagbati. Misalig ko sa Langitnong Amahan ug ni Jesukristo labaw pa kay sa kaniadto. Nagpuasa ko, nagtuon sa mga kasulatan, ug nagtinguha og pagpadayag. Nag-ampo ko alang sa kalig-on nga makahimo og husto nga mga desisyon, nga mabuntog ang akong mga kahuyang, ug yanong mabati ang kalinaw sa akong kasingkasing ug mabatonan ang mahangtorong panglantaw.
Kadtong ginagmay nga espirituhanong mga buhat nakatabang nako nga mas makaila ug makasunod sa mga pag-aghat sa Espiritu. Gibati usab nako ang akong kabalaka mikunhod. Nakabaton ko og mas dakong panabot sa makaayo nga gahom ni Jesukristo ug sa kasagaran gilibotan sa kalinaw kon ako midangop Kaniya.
Sa sukwahi nga paagi, pinaagi sa pag-atubang sa mga tintasyon ug mga kahadlok nga ako nakahimo nga mas mapaduol kang Kristo ug maandam ang akong kaugalingon sa pagdawat sa akong pagtuga.
Ug sa dihang misulod ko sa Sapporo Japan Temple, ang pamilyar nga Espiritu nga akong nabati sa bata pa ko didto sa lobby sa Tokyo Temple anaa, apan niining higayona mas nilig-on pa kini, sama sa kanunay nakong gilauman niini.
Human sa pagdawat sa akong pagtuga, hilom ko nga milingkod sa lawak nga celestial ug nag-ampo, mihangyo sa Langitnong Amahan kon unsay Iyang gusto nga akong mahibaloan.
Gipadayag sa Espiritu ngari kanako nga ang Langitnong Amahan nakaila kanako ug sa akong mga kahimtang (tan-awa sa Doktrina ug mga Pakigsaad 38:2). Nasayod ko nga Siya nahimuot kanako tungod sa paghimo og mga pakigsaad ug nga Siya gusto nga moadto kita sa Iyang balay—usa ka balay nga tinuoray nga makapalayo kanato gikan sa samok nga kalibotan samtang naglig-on kanato ug nagdala kanato duol ngadto Kaniya ug ni Jesukristo.
Akong gibati ang labing gamhanan nga mga pagbati sa kalinaw sa akong kasingkasing. Ug ako nakadawat usab sa pagpadayag nga akong gikinahanglan aron mobati nga masaligon sa akong desisyon sa pagserbisyo og misyon.
Ang Langitnong Amahan Nasayod sa Atong mga Kasingkasing
Ako nakaamgo pinaagi sa akong panaw nga ang Dios nasayod sa mga tinguha sa atong mga kasingkasing ug nga Siya makatabang nato nga molampos. Kon kita mosunod Kaniya uban sa hugot nga pagtuo ug mosalig diha Kaniya alang sa giya ug kalig-on, Siya makatabang kanato sa pag-andam sa atong kaugalingon sa pagpuyo nga takos ug pagsulod sa Iyang sagrado nga balay.
Ang mga ordinansa sa templo mas mahimong espesyal diha kaninyo kon inyong maandam ang inyong kaugalingon sa pagsulod ug kon mopadayon kamo sa pagbalik ug moserbisyo didto. Ako nasayod nga gusto sa Langitnong Amahan nga atong madawat ang mga ordinansa ug mohimo og mga pakigsaad aron kita mahimong makauban Kaniya pag-usab. Ug bisan kon kita dili kasagaran makatambong sa templo, kon kita maningkamot sa pagpabilin nga takos sa rekomend sa templo, kita takos sa tanan nga mga panalangin nga Iyang gitanyag pinaagi sa pagtuman sa atong mga pakigsaad sa templo.1
Nasayod ko nga kon kita motuman sa atong mga pakigsaad ug maningkamot sa pagsunod ni Jesukristo, kita lig-unon aron makasugakod kita sa matag hagit ug tintasyon nga atong giatubang. Ug kita makadapit sa Espiritu ug sa mga panalangin ug hingpit nga kalipay nga modagayday gikan sa templo paingon ngadto sa atong mga kasingkasing ug panimalay.