Ang Kirtland Temple—usa ka Dapit sa Pagkabalaan

Ang akong unang buluhaton mao ang Ashtabula Ward, kabahin sa stake sa Kirtland. Sa among pagpadulong ngadto sa akong unang area, ang akong kompanyon, si Elder Shawn Patrick Murphy, ug ako mihunong sa tindahan ni Newel K. Whitney sa Kirtland. Karon adunay usa ka dakong dawatanan sa mga bisita [visitors’ center] didto, apan kaniadto nga panahon kini usa ka gamay nga dapit. Nahinumdom ako nga nagsaka sa hagdanan padulong sa kwarto ibabaw sa tindahan diin gipahigayon ni Joseph Smith ang Tulonghaan sa mga Propeta. Ako nahibalo og diyutay sa kasaysayan sa dapit, apan gibati gihapon nako ang usa ka butang nga klaro samtang kami misulod nianang yano nga kwarto uban sa yano nga mga bangko nga kahoy niini.

Ang direktor sa sentro usa ka kanhi presidente sa misyon, si Presidente Brewer. Samtang siya namulong mahitungod niini nga dapit diin ang mga Kaigsoonan nagtuon ug nagkat-on og dungan, akong gibati ang Espiritu pag-ayo. Ako misugod sa pagkakita sa tahas sa Kirtland isip usa ka importanting dapit sa kasaysayan sa Simbahan.

Sa sayo sa mga 1830, ang Independence, Missouri, nailhan isip ang dapit sa Bag-ong Jerusalem. Ang mga Santos misugod sa pagpuyo didto. Apan sila gipugos dayon sa pagpapahawa tungod sa mga kalainan sa ubang mga lumulupyo sa Missouri ug sa pagsupak ngadto sa mga pagtuo sa mga Santos. Kaniadtong 1834, miorganisar si Joseph og usa ka grupo sa 230 ka mga lalaki, babaye, ug mga bata, sa wala madugay nailhan isip Kampo sa Zion. Sila kinahanglan nga mobiyahe gikan sa Ohio ngadto sa Missouri aron sa pagtabang sa mga Santos sa pag-angkon og balik sa yuta nga ilang napalit sa legal nga paagi. Ang 900 ka milya (1,450 km) nga panaw wala molampos sa pagkuha og balik sa yuta, apan mihimo kini og usa ka kahimtang nga nakatabang sa pag-andam sa umaabot nga mga Presidente sa Simbahan nga si Brigham Young ug Wilford Woodruff ug sa ubang mga lider, lakip ang mga Apostoles ug mga Seventy.

Dili lamang ang pag-andam og mga lider ang importante—ang balaanon nga epekto sa Kampo sa Zion miandam og usa ka katawhan nga andam sa pagsakripisyo sa pagtukod og templo.

Didto sa Kirtland, ang Propeta nakadawat og nagsunod-sunod nga mga pagpadayag mahitungod sa organisasyon sa Simbahan, ang tanan sa pagpangandam alang sa unsay mahimong labing importanting kalamposan—ang pagtukod sa templo.¹ Ug ang sakripisyo sa tinuod midala sa mga panalangin sa langit.² Ang mga Santos mga kabus kaayo nga dili sila hapit makapalit sa mga kinahanglanon sa kinabuhi. Apan sila mipahinungod sa ilang panahon, mga talento, ug mga kabtangan—ang mao gayod nga pakigsaad nga atong gihimo sa templo karon—ang pagtukod sa balay sa Ginoo.

Karon ang Templo sa Kirtland gipanag-iya ug gipadayon sa laing simbahan—ang Komunidad ni Kristo. Sa dihang usa ka giya gikan niana nga simbahan midala kanamo ngadto sa gambalay, akong gibati ang Espiritu samtang siya mikutlo gikan sa mga journal niadtong kinsa nakasaksi sa talagsaong mga panghitabo diha sa pagpahinungod sa templo. Kini nga mga panghitabo naglakip sa pagkakita og mga anghel ug ang templo maingon og nagdilaab sa kahayag.³ Ang Espiritu mipamatuod ngari kanako nga kini sa pagkatinuod nahimong usa ka balay sa Dios.

Nagserbisyo ako sa Ashtabula Ward sulod sa pito ka bulan. Hapit kada adlaw sa pagpangandam, gidala namo kadtong among gitudloan sa pagbisita sa tindahan ni Newel K. Whitney ug naghisgot mahitungod sa Templo sa Kirtland. Sa makadaghang higayon among giistorya ang makapadasig nga asoy sa pagpakita ni Kristo didto sa templo:

Imahe

the Savior appearing in the Kirtland Temple

The Lord Appears in the Kirtland Temple [Ang Ginoo Nagpakita didto sa Templo sa Kirtland], ni Del Parson

“Ang iyang mga mata ingon sa usa ka siga sa kalayo; ang buhok sa iyang ulo puti sama sa lunsay nga yelo; ang iyang panagway mihayag labaw sa kahayag sa adlaw; ug ang iyang tingog ingon sa dahunog sa dagko nga mga katubigan, gani ang tingog ni Jehova, nag-ingon:

“Ako mao ang sinugdanan ug ang katap[o]san; Ako mao siya kinsa nabuhi, Ako mao siya kinsa gipatay; Ako mao ang inyong manlalaban ngadto sa Amahan” (Doktrina ug mga Pakigsaad 110:3–4).

Agig dugang ngadto sa Manluluwas, ang uban usab mibisita sa templo—si Moises, Elias, ug Elijah. Gisalig nila ngadto ni Joseph ang mga yawe sa pagpundok sa Israel, ang dispensasyon sa ebanghelyo ni Abraham, ug ang buhat sa templo ug family history. (Tan-awa sa Doktrina ug mga Pakigsaad 110:10–16.)

Tungod kay kini nga mga pagbisita importante kaayo, ako nagtuo nga kita usahay wala maghatag og importansya sa ubang mga butang nga nahitabo usab. Sa pagpahinungod nga pag-ampo, si Joseph Smith namulong ngadto sa Ginoong Dios sa Israel, “kinsa naghupot sa pakigsaad ug nagpakita og kalooy,” ug nangamuyo ngadto sa Ginoo nga “dawata ang pagpahinungod niini nga balay nganha kanimo, ang buhat sa among mga kamot, diin kami mitukod ngadto sa imong ngalan” (Doktrina ug mga Pakigsaad 109: 1, 78).

Pinaagi sa pagpakita agi og tubag ngadto niana nga pag-ampo, si Jesukristo, isip ang tigpama-ba sa Dios nga Amahan, mipakita nga gidawat Niya ang Iyang balay, ang mga ordinansa nga ipahigayon didto, ug ang mga pakigsaad nga pagahimoon didto. Kana nga pagdawat gihatag sa matag templo nga gipahinungod sukad kaniadto, ingon man sa mga pakigsaad nga gihimo ug sa mga ordinansa nga gipahigayon didto niana nga mga templo.

Sa pagpahinungod nga pag-ampo, si Joseph usab piho nga mihangyo sa Ginoo sa pagpanalangin niadtong kinsa miserbisyo diha sa mga kapangulohan, ingon man sa ilang mga pamilya. Karon, kadto nga mga panalangin gilugway ngadto sa mga presidente sa Relief Society, mga presidente sa korum, mga presidente sa Young Women, mga presidente sa stake, mga presidente sa misyon, ug uban pa. (Tan-awa sa Doktrina ug mga Pakigsaad 109:71.) Dayon mihangyo si Joseph sa Ginoo nga “hinumd[o]mi ang imong tanan nga simbahan, O Ginoo, uban sa ilang tanan nga mga banay … aron ang imong simbahan moguwa gikan sa kangitngit sa kamingawan, ug mosiga nga mahayag” (Doktrina ug mga Pakigsaad 109:72–73).

Nangayo si Joseph og piho nga mga panalangin alang sa mga kapangulohan ug sa ilang mga pamilya, alang sa mga miyembro ug sa ilang mga pamilya ug alang sa Simbahan sa kinatibuk-an. Kita kanunay nagsaksi sa katumanan niadtong mga panalangin samtang ang Simbahan naghayag ngadto sa kangitngit.

Ang pagpahinungod sa Templo sa Kirtland nagpakita kanako sa tulo ka sukaranang mga kamatuoran:

1. Kita mapanalanginan kon kita mangandam alang sa templo.Ang mga Santos kinahanglan nga mangandam alang sa Templo sa Kirtland nga matukod. Kinahanglan sila nga mosakripisyo, molimpyo sa ilang mga kaugalingon, ug mopalambo og andam nga mga kasingkasing. Kita nagkinahanglan nga mobuhat og sama aron mahimong mas andam sa pagdawat sa mga panalangin nga ang Ginoo aduna alang kanato.

2. Kita makadawat og pagpadayag diha sa balay sa Ginoo. Ang mga panan-awon nga gihatag ngadto ni Joseph Smith ug Oliver Cowdery sa Templo sa Kirtland mihatag og giya, direksyon, ug pagsabot. Sa personal nga paagi, kita makakaplag usab og inspirasyon kon kita moadto sa templo nga mangita og mga tubag.

3. Kita makakaplag og dangpanan diha sa templo. Sa usa ka panahon sa pagpanggukod ug kakabos, ang mga Santos sa Kirtland nakaamgo nga ang balay sa Ginoo usa ka dangpanan gikan sa mga kaguol nga naglibot kanila. Mao usab katinuod kini ngari kanato karon.

Sulod sa mga katuigan, akong nakita nga ang mga butang nga akong nakat-onan mahitungod sa templo isip usa ka batan-ong misyonaryo sa Ohio mipanalangin sa akong pamilya ug kanako. Sama pananglit, diha sa templo usa ka tuig human kami naminyo, ang akong asawa, si Amy, ug ako nakadawat og panghunahuna nga panahon na nga manganak. Kami mga estudyante, ug tungod sa kalisod sa mga panalapi natintal ako sa pagsalikway sa pag-aghat. Apan ang Ginoo nag-andam kanamo.

Nakuhaan kami og katulo sulod sa sunod duha ka tuig, ug naghunahuna ako, “Nganong nag-aghat sa pagpanganak kon kita dili makabaton kanila?” Dayon kami mibalhin ngadto sa California, nagpatabang sa usa ka espesyalista sa pagpanganak, ug sa kataposan nakabaton sa among unang anak, si Mackenzie.

Pinaagi sa pagsunod sa inspirasyon nga among nadawat diha sa templo, kami misugod og usa ka proseso nga mikabat og tulo ka tuig. Kon wala pa kami misunod sa pag-aghat sa panahon nga among gihimo, kini tingali unta dili mominos sa laing tulo ka tuig sa dili pa kami makabaton sa among unang anak. Giisip namo kana nga kasinatian isip usa ka panalangin sa pagpangandam ug pagpadayag.

Kami dihay ikaduhang anak, si Emma, apan dayon nakuhaan pa kami og lain ug namatay ang among anak nga lalaki, si Stewart. Sa misunod nga mga bulan ug katuigan, samtang nagtinguha kami og kalinaw, among nakat-onan nga kadaghanan sa mga simbolo diha sa templo nagtudlo kanato ngadto sa Manluluwas ug sa makaayo nga haplas nga ang Iyang Pag-ula lamang ang makahatag.

Mapasalamaton ako alang sa mga panalangin sa templo. Ako mopamatuod nganha kaninyo nga kini usa ka dapit sa pagpangandam, pagpadayag, ug kalinaw.