Among Hingpit nga Kalipay alang sa Bag-ong Templo sa Vanuatu

“Nakahinumdom ko nga nakadungog sa pulong nga templo sa unang higayon sa dihang ako otso anyos ug gitudloan sa mga misyonaryo. Gipadako ako diha sa nagkalain-laing tinuohan, ug samtang wala ako makasabot sa tibuok nga kahulogan sa pulong nga templo diha sa konteksto sa ebanghelyo ni Jesukristo, akong nahibaloan sa wala madugay kon unsa ang mga templo, nganong importante kaayo kini, ug unsaon nato sa pagpangandam sa pagpahigayon sa mga ordinansa sa sulod.

“Kanunay akong ganahan nga magbasa sa mga magasin sa Simbahan mahitungod sa daghang talagsaon ug milagroso nga mga kasinatian gikan sa mga miyembro sa Simbahan kinsa nakatambong sa templo. Ang ilang mga kasinatian nakapalig-on sa akong tinguha nga magpuyo nga takos, bisan og wala akoy templo sa akong nasod nga isla. Ako usab nakasabot unsa ang gibati sa uban kinsa, sama kanako, walay duol nga magamit nga templo. Apan kini bililhon kaayo kanako nga bisan asa pa kamo magpuyo, ang mga panalangin sa templo kanunay nga moabot sa kaugalingon nga tukma nga panahon sa Ginoo.

“Kanunay akong nasayod nga ang Ginoo dili mohunong sa pagbubo sa Iyang mga panalangin ngari kanato kon kita matinud-anon ngadto Kaniya, dili igsapayan kon kita adunay usa ka templo sa duol. Ug dili nako mahulagway ang akong kamapasalamaton alang sa kayano sa usa ka gamay nga lakang sa hugot nga pagtuo—nga kita matinud-anong makakat-on ug mapailobong maghulat sa Ginoo ‘pagtulun-an human sa usa ka pagtulun-an, lagda human sa usa ka lagda’ (2 Nephi 28:30). Ako moila ug modayeg sa tukma nga panahon sa Ginoo ug sa Iyang talagsaong buhat nga gusto Niya nga ako mamahimong kabahin.

“Sa dihang ang atong pinalanggang propeta, si Presidente Russell M. Nelson, mipahibalo atol sa Oktubre 2020 nga kinatibuk-ang komperensiya nga ang Port Vila, Vanuatu, magkanaa og usa ka templo, mibati ako og dako kaayo nga kalinaw.

“Dili nako makalimtan ang mga luha sa kalipay nga akong gipatulo. Tungod kay Siya nahigugma ug nakaila sa Iyang mga anak, Siya gihapon ‘nahinumdom niadto kinsa anaa diha sa mga pulo sa dagat’ (2 Nephi 29:7).

“Ako mopamatuod nga ang Ginoo adunay lahi nga mga katuyoan ug mga plano alang sa tanang nasod sa tibuok kalibotan. Nasayod Siya sa mga tinguha sa Iyang mga anak nga modawat sa mga panalangin sa ebanghelyo, lakip niadtong nagagikan sa templo. Alang niadtong wala pay mga templo, dapiton ko kamo nga mapailobon nga maghulat, magpadayon nga magmatinud-anon, ug magpaabot sa mga panalangin nga nagpadulong alang kaninyo. Gihigugma gayod kaayo nako kini nga ebanghelyo tungod sa kahingpitan niini sa pagkabalaan ug kahayag.”

Louisette Desire Waiane, Port Vila Stake, Vanuatu

“Kadto usa ka dili mahulagway nga pagbati ug usa ka gutlo nga akong mahalon sa tibuok kinabuhi sa dihang si Presidente Nelson mipahibalo nga usa ka templo ang pagatukoron sa Vanuatu. Wala damha kadto nga balita, apan nagsalig ako sa Ginoo, sa Iyang tukma nga panahon, ug sa Iyang buhat.

“Nakaamgo ako nga ang Ginoo nagpadali sa Iyang buhat sa Iyang kaugalingong kaalam.

“Sa diha nga gihimo ang pahibalo, ang akong bugtong nahunahunaan mao ang akong pamilya, mga higala, mga lider, ug ang tanan kinsa misakripisyo aron sa pagtabang og tukod sa gingharian sa Dios sa Vanuatu. Nakabaton ako og dugang pagpasalamat alang sa atong kaugalingong mga pioneer kinsa miandam sa dalan. Nasayod ako nga ang pipila kanila mibiya na niining mortal nga kinabuhi ug karon nagmaya sa pikas nga habig sa tabil. Ngadto kanila ako moingon og salamat!

“Ako mapainubsanon nga nakahibalo nga ang akong pamilya makaambit na karon sa mga panalangin ug sa mga ordinansa sa templo. Karon, ang mga miyembro sa Simbahan sa Vanuatu mosakripisyo og dako kaayo aron makaadto lang sa templo sa Fiji o New Zealand. Ang pipila makatambong lamang og kausa sa tibuok nilang kinabuhi. Karon napanalanginan kami nga matukod ang balay sa Ginoo sa among kaugalingon nga yuta. Tungod niana ako mapasalamaton sa kahangtoran.

“Gusto nakong dapiton kitang tanan nga mangandam sa espirituhanon nga paagi sa panahon nga atong hangopon ang mga balay sa Ginoo sa atong kaugalingong mga yuta. Kita mohimo og mahangtoron nga mga pakigsaad ug moapil sa buhat sa kaluwasan sa matag habig sa tabil. Nasayod ako nga samtang maningkamot kita nga mahimong takos sa kanunay nga pakig-uban sa Espiritu Santo, mas maandam kita nga mosulod sa balaan nga balay sa Ginoo.

“Karon nagserbisyo ako isip usa ka klerk sa district. Nadasig ako nga tabangan ang among presidente sa district ug ang mga anak sa Dios nga gisalig sa Langitnong Amahan nga among atimanon aron sa pagpangandam alang nianang mahinungdanon nga adlaw sa dihang moabli ang Vanuatu Temple. Ug ako nag-ampo nga ang mao nga Espiritu nga akong nabati sa dihang gihimo ang pahibalo mahimong usa ka pagdasig sa pagtabang kanako nga magpadayon.

“Mapasalamaton ako sa oportunidad nga mapahayag ang akong mga hunahuna ug mga pagbati mahitungod niining mahinungdanon nga makasaysayanong pahibalo. Ang akong masulti lamang mao ang salamat ngadto sa Langitnong Amahan, ug ngadto ni Presidente Nelson sa pagkahimong tigpamaba sa Ginoo dinhi sa yuta karon.”

Dack Tivles, Luganville District, Vanuatu

“Ang tanan nangita og usa ka butang nga makapadasig o moayo kanila, sa espirituhanon ug temporal nga paagi, niining mortal nga kinabuhi. Alang kanako, ang pagkamiyembro sa Ang Simbahan ni Jesukristo sa mga Santos sa Ulahing mga Adlaw mao kana nga butang. Sukad mipasakop ako sa Simbahan 12 ka tuig ang milabay, wala gayod ako nagmahay sa akong desisyon. Kini nakapanalangin sa akong kinabuhi sa dako gayod nga paagi.

“Sa dihang nabunyagan ako, nagsugod ako sa pagkadungog og daghan kabahin sa templo. Ang ubang mga miyembro kanunayng mag-istorya mahitungod kon unsa kini ka importante ngadto kanila. Usa kini ka butang nga kanunay nga nagdala og kalinaw sa akong kasingkasing ug nakapadasig kanako nga magpadayon sa unahan. Nasayod ako nga gusto kong moadto didto usa ka adlaw ug makasinati sa kalipay nga ilang nabati.

“Sa wala madugay, gipili nako nga moserbisyo og misyon ug gitawag ngadto sa Australia Brisbane Mission. Ang pagsulod sa Hamilton New Zealand Temple sa unang higayon mao ang kinanindotan nga pagbati sukad. Dili gayod nako makalimtan kadto nga kasinatian. Ang mga pulong nga gamiton nako sa paghulagway sa unsay akong gibati mao ang hingpit nga kalipay, kalinaw, ug kamaya. Gibati gayod nako ang gugma sa Langitnong Amahan alang kanako, ug ang Espiritu kusog kaayo. Nagdasig kini kanako nga kanunayng magpabilin nga lig-on sa akong tibuok misyon ug sa pagkahuman.

“Isip mga miyembro sa Simbahan sa Vanuatu, kanunay kaming nangandoy nga makabaton og templo sa among nasod, apan dayon, sa dihang gipahibalo kini ni Presidente Nelson, kini ingon og ang among mga damgo nahimong tinuod.

“Ang pagkaanaa og templo dinhi sa Vanuatu nagpasabot nga ang among mga kinabuhi mahimong mas okupado, apan sa maayo nga paagi, tungod kay makabaton kami sa abilidad nga makahimo og dugang nga buhat sa templo ug family history.

“Nakahinumdom ako nga nakadungog og usa ka pakigpulong sa kinatibuk-ang komperensiya mahitungod sa pagtumong kanunay sa inyong panan-aw sa templo.¹ Kon buhaton ninyo, kamo aduna niana nga bandila —kamo adunay usa ka butang nga kanunay nga paaboton.

“Ang templo makatabang kanato sa pagpabilin sa panglantaw nga ang kinabuhi dili limitado sa mga problema. Ang mahangtorong panglantaw didto makahatag kanato sa kadasig nga magpadayon sa pagpaningkamot, magpadayon sa pagtuo, magpadayon sa pagpakita og hugot nga pagtuo, ug magpadayon sa pagsalig. Alang kanako, ang pagkaanaa og templo dinhi sa Vanuatu usa ka dakong panalangin—usa kini ka daklit nga pag-aninaw sa langit.”

Eunice Hoiesi James, Port Vila Stake, Vanuatu