Pagtudlo sa Inyong mga Anak sa Paghigugma sa Templo

Ni Nancy Dance ug Dana Wright

Kanhi mga Sakop sa Konseho sa Kinatibuk-ang Advisory sa Primary

Wala gayoy sayo ra kaayo sa pagtabang sa inyong mga anak sa pagpangandam alang sa templo.

Imahe

batan-ong pamilya nga nagbisita sa Manila Temple

Sa iyang unang pakigpulong sa publiko isip Presidente sa Ang Simbahan ni Jesukristo sa mga Santos sa Ulahing mga Adlaw, si Presidente Russell M. Nelson namulong kanamo gikan sa annex sa Salt Lake Temple, kauban ang tanang Apostoles nga nagkuyog kaniya. Kini nga dapit makahuluganon—usa ka simbolo sa “pagsugod sa gilantaw nga sangpotanan,”¹ usa ka pagpunting sa dalan sa pakigsaad ug sa buhat sa Dios sa paghimaya sa mga pamilya.

“Karon, ngadto sa matag miyembro sa Simbahan,” miingon siya, “pabilin diha sa dalan sa pakigsaad. Ang inyong pasalig sa pagsunod sa Manluluwas pinaagi sa paghimo og mga pakigsaad uban Kaniya ug dayon sa pagtuman niadto nga mga pakigsaad moabli sa pultahan ngadto sa tanang espirituhanong mga panalangin ug pribilehiyo nga mahimong maanaa sa mga lalaki, babaye, ug mga anak bisan asa.”²

Mipadayon siya sa pagsulti, “Ang mga ordinansa sa templo ug ang mga pakigsaad nga inyong gihimo didto mahinungdanon sa pagpalig-on sa inyong kinabuhi, sa inyong kaminyoon ug pamilya, ug sa inyong abilidad sa pagbatok sa mga pag-atake sa kaaway.”³

Pinaagi sa mga templo, ang tibuok tawhanong pamilya magkahiusa. Parehas batan-on ug tigulang, buhi ug patay. Ang gahom sa templo mopanalangin sa tanan.

Ang pagtabang sa atong mga anak sa pagpangandam alang sa templo mahimong usa ka natural ug normal nga kabahin sa atong kinabuhi. Samtang ang templo ug ang mga panalangin niini importante ngari kanato, ang atong mga lihok ug mga pulong motudlo sa atong mga anak sa paghigugma usab sa templo. Kon ang mga bata makasabot sa kaimportante sa paghimo og mga pakigsaad uban sa Dios, ang ilang tinguha sa pagpangandam alang niadtong mga pakigsaad lagmit kaayo nga molambo.

Sa ubos mao ang pipila ka yano nga mga ideya sa pagtabang sa atong mga anak nga makakat-on sa paghigugma sa templo samtang mangandam sila sa paghimo ug pagtuman sa mga pakigsaad didto.

Alang sa mga 3–7 anyos:

Pagpakita og litrato sa templo diha sa inyong balay.
Mag-istoryahanay kabahin sa templo.
Kon mahimo, mobisita sa mga nataran sa templo, mohikap sa templo, o motan-aw og mga litrato sa templo online.
Pagdrowing o paghimo og usa ka modelo sa inyong templo gamit ang unsay anaa nga mga materyales sama sa mga bato ug lapok, gimasa nga lapok, gimasa nga harena, o mga bloke. Inig ka taud taud, buhata kini pag-usab alang sa lain nga templo.
Pag-apil sa kalihokan sa pamilya nga gihatag sa FamilySearch.org/discovery.
Idrama-drama ang makahuloganon nga mga istorya sa pamilya o paghimo og tradisyonal nga mga resipe sa pamilya. Ipasabot ang kaimportante nga makahibalo kita kabahin sa atong mga katigulangan.

Alang sa 8–11 anyos:

Isip usa ka pamilya, basaha kanunay ug mag-uban sa paghisgot sa mga pangutana sa interbiyo sa rekomend sa templo. Awhaga ang inyong mga bata nga mahimong takos sa rekomend dili igsapayan kanus-a sila mahimong motambong.
Pagtudlo mahitungod sa gahom, proteksiyon, ug sa kaimportante sa pagtuman sa mga pakigsaad ug mga saad.⁴
Mag-uban sa pagrebyo sa impormasyon ug mga video diha sa temples.ChurchofJesusChrist.org, sama sa virtual tour sa Rome Italy Temple.
Mopaambit og personal nga mga kasinatian o mga istorya gikan sa mga sakop sa pamilya, lakip ang kaliwat sa pamilya.
Kon ang inyong bata mag 10 o 11 na, paghimo og yano nga kalendaryo sa pag-ihap sa adlaw, semana, o bulan hangtod nga siya makasulod sa templo.
Mag-uban sa paghisgot sa istorya sa kasulatan kabahin sa Manluluwas diha sa templo sa dihang nagpangedaron pa siya og 12 (tan-awa sa Lucas 2:42–51).
Paghimo og plano aron sa pag-andam alang sa unang pagbisita sa imong anak ngadto sa templo. Kon mahimo, himoa kini nga kalihokan sa pamilya. Aron matabangan ang imong anak nga mobati og mas komportable, ilakip ang paghisgot mahitungod sa praktikal nga mga aspeto sa mga bunyag ug kumpirma, sama sa kon unsay isul-ob padulong sa templo ug unsay isul-ob sa sulod mismo sa templo, asa sila mosulod sa bunyaganan, kinsa ang motabang kanila, kon sa unsang paagi ang mga bunyag ug kumpirmasyon gipahigayon, ug sa han-ay sa unsay mahitabo sa sulod.
Pagkat-on sa paghimo sa buhat sa family history ug sa pag-andam sa mga ngalan sa pamilya nga dad-on ngadto sa templo.

Ang mga Panalangin sa Buhat sa Templo ug Family History

Daghang mga propeta ug apostoles namulong sa kaimportante sa templo ug sa buhat sa family history ug sa mga panalangin nga ikahatag niini kon kita moapil niini nga buhat, lakip sa pagpalig-on sa atong mga anak ug mga pamilya. Sama pananglit, si Elder Dale G. Renlund sa Korum sa Napulog Duha ka Apostoles namulong og dugang nga panabot kabahin sa Manluluwas ug sa Iyang Pag-ula, sa impluwensiya sa Espiritu Santo aron atong mabati ang kalig-on ug direksiyon, hugot nga pagtuo, kalipay, mga panalangin sa pamilya, gugma ug pasalamat, gahom sa pag-ila, ug panalipod gikan sa kaaway.⁵ Makatabang kita sa atong mga anak nga makadawat niini nga mga panalangin samtang kita modapit kanila sa pag-apil sa buhat sa templo ug sa family history uban kanato.

Ang buhat sa templo ug family history mao ang kabahin sa sama nga buhat sa kaluwasan ug kahimayaan. Ug ang buhat sa family history adunay mahinungdanong tahas sa pagpangandam sa templo.

Si Presidente Nelson miingon: “Ang balay sa Ginoo mao ang balay sa pagkat-on. Didto ang Ginoo nagtudlo sa Iyang kaugalingong paagi. Didto ang matag ordinansa nagtudlo bahin sa Manluluwas. Didto kita makakat-on unsaon sa pag-abli sa tabil ug makigsulti sa langit sa mas klaro. … Unsa kaha kita kamatinguhaon sa pagtinguha og kadangpan didto.”⁶

Sugdi Karon

Alang sa tanang pangedaron, ang paghimo sa buhat sa templo ug family history usa ka normal ug natural nga bahin sa atong kinabuhi nga makahatag og mga panalangin. Paghisgot mahitungod sa templo samtang kamo mag-uban sa pagbiyahe. Iapil kini sa Dali, Sunod Kanako nga pagtuon ug sa ubang mga panaghisgotan sa ebanghelyo uban sa inyong pamilya. Tudloi ang inyong mga anak nga sila mahimong mas mahisama sa Manluluwas samtang sila mangandam ug mosulod sa Iyang templo. Matag usa niining mga butanga makatabang sa inyong mga anak sa paghigugma ug pag-andam sa pagsulod sa balay sa Ginoo.

Si Sister Joy D. Jones, kanhi Kinatibuk-ang Presidente sa Primary, miingon: “Nag-ampo ko kada adlaw nga ang atong kabatan-onan ug ang ilang pamilya mobati sa gugma sa Manluluwas ug sa pag-ila ug pagsunod sa Iyang Espiritu. Nasayod ko nga Siya mogiya kanila ngadto sa Iyang balaan nga templo ug sa mga panalangin sa kahangtoran nga makita diha sa pagdawat sa mga ordinansa ug paghimo og pakigsaad uban sa atong Amahan sa Langit.”⁷

Walay gayoy sayo ra kaayo sa pagtudlo sa mga bata mahitungod sa templo.

Samtang kita mogahin og panahon sa pagpaambit sa atong mga kasinatian ngadto sa atong mga anak, maghisgot mahitungod sa gahom ug proteksiyon nga moabot gikan sa pagtuman sa pakigsaad, pagtudlo kanila sa kaimportante sa templo, pagpamatuod sa unsay atong bation sa sulod, ug pagpaambit og mga istorya sa atong mga katigulangan, atong mapalambo diha kanila ang usa ka gugma alang sa templo sa ilang labing sayo nga katuigan. Samtang magtudlo kamo sa inyong mga anak sa paghigugma ug pagpangandam alang sa templo, kamo makahatag kanila og usa sa labing mahinungdanon nga gasa nga inyong mahimo—usa ka kahibalo nga ang pamilya magkauban hangtod sa kahangtoran ug usa ka tinguha sa paghimo ug pagtuman sa mga pakigsaad nga mohiusa sa ilang pamilya alang sa kahangtoran.