Pag-ampo alang sa usa ka Dalan nga Makit-an ang Akong mga Rekord sa Pamilya

Imahe

tawo nga nagtan-aw sa mga rekord sa pamilya

Litrato sa maayong kabubut-on sa tagsulat

Daghang katuigan ang milabay, mibati ko nga kinahanglan kong makig-istorya sa akong lolo mahitungod sa among kasaysayan sa pamilya. Sa dihang mibisita ko ni Lolo, luya ug talandugon na siya. Ang akong tiya mihangyo nako sa dili pag-isturbo kaniya, busa wala ako mangutana kaniya mahitungod sa among kasaysayan sa pamilya. Pipila ka bulan ang milabay, naminyo ko ug mibalhin gikan sa Taiwan ngadto sa Estados Unidos. Nagmahay ko nga wala nakabaton og laing oportunidad nga makaistorya si Lolo sa wala pa siya mamatay. Nangutana ko og laing sakop sa pamilya mahitungod sa genealogy, apan walay usa nga makatabang kanako. Naguol ko ug nasagmuyo sa akong kaugalingon tungod sa dugay kaayong paglangay nga makat-on mahitungod ni Lolo ug sa pagbaliwala sa mga pag-aghat sa Espiritu sa pagpakig-istorya kaniya mahitungod sa iyang kasaysayan.

Usa ka adlaw samtang nagbasa ko sa akong patriyarkal nga panalangin, ganahan ko sa usa ka tudling nga naghulagway kon sa unsang paagi nga ako makatabang sa paghimo og usa ka kahibulongan nga buhat alang sa akong mitaliwan nga mga katigulangan ug sa uban kinsa buhi. Naghunahuna ko, “Unsaon man ni nako paghimo kon wala ko makahibalo kon asa ko magsugod?” Sa kadugayan nabasa nako diha sa Doktrina ug mga Pakigsaad 82:8, 10:

“Ako mohatag nganha kaninyo og bag-o nga sugo, nga kamo unta makasab[o]t sa akong kabubut-on mahitungod kaninyo; …

“Ako, ang Ginoo, mapugos sa pagtuman kon kamo mobuhat sa unsa nga Ako misulti; apan kon kamo dili mobuhat sa unsa nga Ako misulti, kamo dili makaangkon og saad.”

Gibati nako ang Ginoo nag-awhag kanako, ug ako nag-ampo alang sa usa ka dalan sa unahan nga makit-an ang akong mga rekord sa kasaysayan sa pamilya.

Pipila ka bulan ang milabay samtang didto sa Shanghai, China, akong nahimamat si Shirley Wu, kinsa nagbisita gikan sa Taiwan. Sa wala madugay kami nahimong maayong managhigala. Sa dihang iyang nasayran nga ako nangita sa genealogy sa akong pamilya, miawhag siya nako nga dili moundang. Misugyot siya og dapit nga kasugdan, kinahanglan moadto ko sa lokal nga departamento sa mga rekord sa panimalay didto sa Taiwan aron mangayo sa karaan nga mga pinuy-anan. “Tingali adunay makit-an,” miingon siya.

Milarga ko ngadto sa Taiwan, nanghinaot sa pagpangita sa rekord sa panimalay sa akong apohan sa tuhod, apan subo lang, wala na kini. Wala usab ako masayod sa iyang yutang natawhan o sa ngalan sa akong katigulangan kinsa unang miabot sa Taiwan. Bisan pa niini nga mga kapakyasan, si Shirley misulti nako nga dili mabalaka. “Pagbaton lang og hugot nga pagtuo,” miingon siya. “Ang Dios motabang kanato, ug ang imong mga katigulangan sa pikas habig sa tabil motabang usab.” Pipila ka adlaw ang milabay, mibalik ko sa Shanghai, naglaom ug nag-ampo og milagro.

Usa ka Dominggo sa hapon, si Shirley mipadala nako og usa ka litrato sa pipila ka mga rekord sa genealogy. Nangutana siya nako kon aduna bay bisan usa sa mga ngalan nga pamilyar ko.

Nahingangha ako. Ang mga ngalan sa akong mga katigulangan anaa sa pahina! Sa dihang nangutana ko kon sa unsang paagi niya kini nakit-an, misulti siya nako sa mosunod nga milagroso nga mga istorya:

Ako naghunahuna mahitungod sa imong genealogy sulod sa pipila ka semana, ug akong gibati nga kinahanglan kong moadto sa pinuy-anan sa imong apohan sa tuhod aron susihon ang dapit.

Human sa duha ka oras nga sakay sa hilabihan ka kusog nga tren, ako misakay og bus padulong ngadto sa siyudad sa Chi Kan, usa ka dapit nga wala pa gayod nako naadto sukad. Nakatulog ko, ug sa kataposang hununganan gipukaw ko sa drayber. Mikanaog ko, mitan-aw sa palibot, ug akong nakita nga anaa ko sa usa ka balangay sa pangisdaan. Nangutana ko sa usa ka batan-on nga tag-iya sa tindahan og direksiyon sa dalan. Mitawag siya og taxi alang nako ug gitudloan ang drayber ngadto sa usa ka dapit diin nagpuyo ang usa ka tigulang nga lalaki. Sa dihang miabot ko ug nangutana niadtong lalaki kon asa ko makakita sa rekord sa genealogy sa lungsod, misulti siya nako nga molakaw og pipila ka eskina ngadto sa usa ka templo subay sa baybayon.

Didto sa templo, akong nakita ang usa ka grupo sa mga lalaki nga nag-inom og tsaa ug nag-istoryahanay. Sila miingon nga bag-o lang nilang gisugdan ang tinuig nga miting sa genealogy sa pamilyang Liu Shi aron maandam alang sa dakong komperensiya sa Oktubre. Akong gipasabot nga anaa ko didto aron sa pagpangita sa mga ngalan sa pamilya alang sa akong higala.

“Sa kasagaran walay tawo niini nga templo,” miingon sila. “Ang mga pultahan gitrangkahan gawas sa duha hangtod sa tulo ka oras kon kami magpahigayon sa tinuig nga miting. Swerte kaayo ka nga nakaabot ka namo dinhi.”

Sa dihang akong gisultihan ang mga kalalakin-an nga nangita ko sa ngalan nga Liu Bei, misulti sila nako nga sila nagkolekta sa genealogy sa pamilyang Liu sulod na sa katuigan ug wala na makahinumdom niana nga ngalan. Usa sa kalalakin-an mabination nga mitanyag sa iyang mga rekord sa genealogy aron akong matan-aw. Nagpadayon sila sa ilang miting samtang akong gisiksik ang mga rekord. Human sa mga 10–15 minutos, misinggit ako, “akong nakit-an!”

Nakuratan, mihunong sila sa pag-istorya ug gikuha ang libro. Akong gipakita kanila ang ngalan, ug miingon sila nako nga kini nagagikan sa linya sa pamilya ni Mr. Liu Qiu Shan, kinsa nagtambong sa ilang miting nianang adlawa. Mipalit ko og kopya sa libro sa genealogy, diin naglangkob sa rekord pabalik 26 ka henerasyon ug 2,460 ka tuig sa mga ngalan sa katigulangan sa linya sa kaliwat sa pamilya.

Si Mr. Liu Qiu Shan sa kadugayan mihatod kanako ngadto sa estasyonan sa tren. Misulti siya nako nga kon miabot pa ko nga nag-una og usa ka oras o sa sunod pa nga adlaw, wala gyod koy bisan usa nga makit-an o bisan unsang butang nga makita didto. Siya miingon, “Kini nga dapit kanunay gitrangkahan. Tingale usa gayod kini ka panalangin sa pagtugot gikan sa mga katigulangan. Tinuod gayod kini nga milagro.”

Si Shirley ang akong anghel. Puno siya sa gugma ni Kristo ug kanunayng matinguhaon sa pagtabang sa pagbuhat sa buluhaton sa Dios. Siya usa ka talagsaong ehemplo sa pagpangalagad ngadto sa uban. Ang iyang kaandam sa pagserbisyo nakahatag og dagkong mga panalangin ug milagro sa gatosan ka mga kalag. Ako mopamatuod nga adunay mga anghel taliwala kanato, apan kita kinahanglan makabaton og tinguha sa pagbuhat sa buluhaton sa Ginoo aron madawat ang ilang tabang. Si Presidente Gordon B. Hinckley (1910–2008) miingon: “Motuo diha sa imong kaugalingon. Tuohi ang inyong kapasidad sa paghimo og talagsaon ug maayong mga butang. Tuohi nga walay bungtod ang taas ra kaayo nga dili ninyo matungas. Tuohi nga walay bagyo nga kusog kaayo nga dili ninyo masugakod.”¹ Kon kita magtinguha sa giya sa Ginoo, atong makita Iyang kamot ug ang mga anghel sa atong kinabuhi, ug kita makatuman sa unsay Iyang gisugo nga atong buhaton.