Digital Lamang: Mga Young Adult
4 ka Paagi aron Makahinumdom sa Imong Balaanong Bili
Dali kaayo nga makalimot kon kinsa gayod kita—mga anak sa langitnong mga ginikanan nga may napanunod nga balaanong bili. Aniay pipila ka paagi aron makahinumdom.
Ang pagsabot sa atong balaanong kailhanan [identity] makahatag nato og kalig-on, pagsalig, ug katuyoan. Apan ang atong inadlaw-adlaw nga kinabuhi sa kanunay puno sa mga pagsulay ug mga pagbalda nga maoy daling makapawala sa panan-aw kon kinsa kita isip mga anak sa Dios nga may mahangturong bili ug walay kinutobang potensyal.
Maayo na lang, ang mga lider sa Simbahan naghatag og tambag aron matabangan kita nga makahinumdom sa atong balaanong bili.
1. Magkat-on sa Pag-ila sa Espiritu
“Ang espirituhanong bili nagpasab[o]t sa paghatag og bili sa atong kaugalingon sama sa paghatag og bili sa Langitnong Amahan, dili sama sa paghatag og bili kanato sa kalib[o]tan. Ang atong bili natino na sa wala pa kita moanhi niini nga yuta. ‘Ang gugma sa Dios walay sukod ug kini mohangt[o]d.’ …
“… Kon mobati kita sa Espiritu, … makahibalo kita nga unsay atong gibati gikan sa atong mahigugmaong Langitnong Amahan. …
“Hunahunaa nga nagbasa mo sa mga kasulatan usa ka buntag ug ang Espiritu hinay nga naghunghong ninyo nga unsay inyong gibasa tinuod. Makaila ba kamo sa Espiritu ug magmalipayon nga inyong gibati ang Iyang gugma ug tak[o]s nga modawat?
“… Panagsa ra kita, kon duna man, makadawat og dakong espirituhanong timailhan sa atong kinabuhi; apan makatagamtam kita sa maanindot nga mga hunghong sa Espiritu Santo, nga nagsulti sa kamatuoran sa atong espirituhanong bili.”1
—Sister Joy D. Jones, kanhi Kinatibuk-ang Presidente sa Primary
2. Magpabilin diha sa Dalan sa Pagkadisipulo
“Tingali ang pagkamasulundon dili lamang mahitungod sa pagbawog, pagliso, ug pagdukdok sa atong mga kalag ngadto sa usa ka butang nga wala nato kinahanglana. Hinoon, mao kini ang proseso diin kita makadisk[o]bre kon unsa gay[o]d kita.
“Kita gilalang sa Labawng Makagagah[o]m nga Dios. Siya ang atong Langitnong Amahan. Kita sa literal Iyang mga anak sa espiritu. Kita gihimo sa langitnon nga materyal nga bililhon ug lunsay kaayo, ug mao nga nagdala kita sa atong kaugalingon og diosnon nga kinaiya.
“… Ang kahugaw sa kalib[o]tan makapamansa sa atong mga kalag, naghatag nato og kalis[o]d sa pag-ila ug paghinumdom sa atong panulundon ug katuyoan.
“Apan kining tanan dili makapausab kon kinsa gay[o]d kita. Ang labing mahinungdanon nga pagkadiosnon sa atong kinaiya magpabilin. Ug sa higayon nga kita mopili nga ipahiuyon ang atong kasingkasing ngadto sa atong minahal nga Manluluwas ug mosubay sa dalan sa pagkadisipulo, adunay milagrong mahitabo. Ang gugma sa Dios mopuno sa atong mga kasingkasing; ang kahayag sa kamatuoran mopuno sa atong mga hunahuna; ang atong tinguha sa pagpakasala mosugod sa pagkawala; ug dili na kita maglakaw sa kangitngit.
“Makita nato nga ang pagkamasulundon dili usa ka silot apan usa ka gawasnong proseso aron makaab[o]t sa atong balaan nga padulngan. Ug sa anam-anam, ang pagkadunot, kahugaw, ug mga limitasyon niini nga kalib[o]tan mosugod sa pagpahilayo. Sa katap[o]san, ang labing bililhon, mahangturong espiritu sa langitnong pagkabinuhat nga ania kanato mapadayag, ug mahimo kitang mga kapanguhaan sa kamaayo.”2
—Presidente Dieter F. Uchtdorf, kanhi Ikaduhang Magtatambag sa Unang Kapangulohan
3. Pangitaa ang Kamot sa Dios diha sa Inyong Kinabuhi
“Unsa gayod ang inyong gikinahanglang pangitaon diha sa inyong kaugalingong kinabuhi? Unsa ang mga milagro sa Dios nga makapahinumdom kaninyo nga Siya anaa sa duol, nag-ingon, ‘Ako ania dinhi’? Hunahunaa kadtong mga higayon, ang pipila sa inadlaw adlaw, kon kanus-a ang Ginoo milihok diha sa inyong kinabuhi—ug dayon milihok pag-usab. …
“… Matag usa kanato dunay kabalaan sa sulod kanato. Kon atong makita ang Dios nga naglihok pinaagi kanato ug uban kanato, unta madasig kita, gani magmapasalamaton alang niana nga giya. Sa dihang ang atong Amahan sa Langit miingon, ‘Mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo’ [Moises 1:39], naghisgot Siya mahitungod sa tanan Niyang mga anak—ilabi na ninyo.”3
—Elder Ronald A. Rasband sa Korum sa Napulog Duha ka Apostoles
4. Ayaw Wagtanga ang Panan-aw sa Inyong Balaanong Kailhanan
“Adunay usa ka importante nga kailhanan nga atong giambitan karon ug sa kahangtoran, usa nga kinahanglang dili gayod nato wagtangon sa panan-aw. … Ikaw karon ug sa kanunay usa ka anak sa Dios sa espiritu. …
“Ang lig-ong kamatuoran bahin sa langitnong ginikanan dili lamang ako o inyo nga kamatuoran. Kini mahangturong kamatuoran. Nahisulat kini diha sa dako, pinabaga, dagkong mga letra. Ang pagsabot niini nga kamatuoran—tinuoray nga pagsabot niini ug paghangop niini—makapausab sa kinabuhi. Makahatag kini kaninyo og talagsaong kailhanan nga wala gayoy tawo nga makakuha gikan kaninyo. Apan labaw pa niana, makahatag kini kaninyo og nindot nga pagbati nga bililhon ug pamati sa inyong walay kinutobang bili. Sa kataposan, makahatag kini kaninyo og usa ka balaanon, halangdon, ug takos nga katuyoan sa kinabuhi. …
“… Ako mangamuyo sa matag usa kaninyo nga palihog ipabilin ang inyong balaanong kailhanan diha sa sentro sa tanan ninyong buhaton.”4
—Presidente M. Russell Ballard, Akting nga Presidente sa Korum sa Napulog Duha ka Apostoles