Mga Baroganan sa Pagpangalagad
Unsaon sa Pagtabang sa usa ka Tawo nga Nangita og mga Tubag sa mga Pangutana bahin sa Ebanghelyo
Ang pagpangita og mga tubag personal, apan dili kini kinahanglan nga mahitabo nga mag-inusara.
Ang tanan adunay mga pangutana. Ang mga pangutana kabahin sa paagi nga kita makasabot sa kalibotan nga naglibot kanato. Ang Dios nag-awhag kanato sa pagpangutana ug sa pagtinguha og mga tubag (tan-awa sa Mateo 7:7). Kini nga proseso usa ka mahinungdanon nga bahin sa panaw sa kinabuhi sa pagkat-on ug mahimong mas sama Kaniya (tan-awa sa Doktrina ug mga Pakigsaad 93:36). Isip kabahin niana nga pagtubo, kitang tanan mag-atubang og mga pangutana nga maghagit kanato. Kon kini mahitabo, makatabang kini nga adunay suporta sa uban.
Usa ka miyembro sa Simbahan sa Texas, USA, mipaambit niini nga kasinatian:
“Atol sa Relief Society usa ka adlaw, usa ka sister nga wala gayod nako nakita sa simbahan sukad mipaambit kon sa unsang paagi siya mibati nga daw ang mga babaye sa Relief Society wala nagbuhat sa unsay ilang gituohan [hypocritical] ug wala nag-apil sa tanan [exclusive]. Human sa miting, paspas kaayo siyang mibiya nga wala na ako makaistorya kaniya.
“Human sa pagsimba, miadto ko sa iyang balay. Gipaila-ila nako ang akong kaugalingon ug misulti nga nagpasalamat ako sa iyang mga komentaryo sa Relief Society ug gusto nga maminaw pa bahin sa iyang mga problema. Miistorya siya, ug naminaw ako. Gipahayag nako ang akong gugma alang kaniya ug sa iyang pamilya ug mihangyo kon makabisita ba ako kaniya pag-usab.
“Gidawat nako ang buluhaton nga moserbisyo isip iyang visiting teacher. Sa kadugayan, samtang mas nasabtan nako ang iyang mga problema, nagsugod kami sa paghisgot mahitungod sa iyang doktrinal nga mga pangutana. Ang iyang mga anak nagsugod sa pagsimba. Dayon nagsugod siya sa pagsimba uban kanila. Nakadayeg ako sa iyang kaisog ug paglahutay. Nahimo siya nga usa sa akong labing suod nga mga higala.”
Ania ang upat ka sugyot kon sa unsang paagi kamo makatabang sa usa ka tawo nga nanglimbasog sa iyang mga pangutana.
Mga Ideya alang sa Pagpangalagad Niadtong adunay mga Pangutana
1. Gugma labaw sa tanan. Kon ang usa ka tawo nanglimbasog sa usa ka pangutana o adunay lahi nga panghunahuna kay sa atoa, nagkinahanglan gihapon sila og gugma (tan-awa sa Lucas 10:25–37).
Kadtong mga naglisod modangop ngadto sa usa ka tawo nga ilang gisaligan. Ang paghigugma sa uban ug ang pagpalambo og makahuluganon nga mga relasyon makabutang kanato sa usa ka posisyon nga mangalagad kon sila magkinahanglan kanato. Kini magmugna usab og kahigayonan alang sa usa ka tawo kinsa gusto nga mobalik apan tingali dili komportable (tan-awa sa Lucas 15:11–24).
(Alang sa mga ideya sa papalig-on sa mga relasyon, basaha ang “Pagtukod og Makahuluganong mga Relasyon,” Liahona, Ago. 2018, 6–9.)
2. Maminaw uban ang pagpaubos ug kaluoy. Gilimitahan nato ang atong abilidad sa pagtabang sa uban sa ilang mga pangutana kon kita dali ra kaayong maghunahuna nga kita nakasabot kay sa mapailobon nga maminaw aron makasabot. Adunay daghang rason nga ang usa ka tawo tingali nanglimbasog. Ang uban adunay mga pangutana mahitungod sa doktrina. Ang uban adunay mga pangutana mahitungod sa polisiya o kasaysayan. Ang uban naghunahuna lamang kon sila ba nahisakop sa Simbahan.
Ang mapainubsanong pagpaminaw ug pagpangutana makatabang kanato nga makasabot sa kakomplikado sa ilang kahimtang aron makahatag kita og mas maayo nga mga tubag, ug kini makatabang kanila nga mahimong mas bukas sa atong mga tubag kon mabati nila nga tinuoray kitang naminaw kanila.
(Aron magkat-on kon unsaon pagpaminaw og maayo, basaha ang, “Lima ka Butang nga Buhaton sa Maayong mga Tigpaminaw,” Liahona, Hunyo 2018, 6–9.)
3. Magpadayon inubanan sa hugot nga pagtuo ug ilhon nga kini tingali magkinahanglan og panahon. Ang mga pangutana nga tinud-anay nga mohagit kanato panagsa ra masulbad sulod sa usa ka adlaw. Mao nga kinahanglang dili nato butangan og dugang nga kabug-at ang atong kaugalingon o kadtong gusto nato nga tabangan pinaagi sa pagbati nga daw kinahanglan natong “sulbaron kini” sa higayon nga mahibaloan nato ang ilang problema.
Kon gusto gayod kita nga motabang, importante nga andam kita nga motabang kanila latas sa taas nga proseso aron masayod sila nga kon sila makabaton na og kasulbaran sa ilang problema, bisan unsa pa kana, anaa gihapon kita nga mosuporta kanila (tan-awa sa Mga Hebreohanon 12:12–13).
4. Awhaga sila sa ilang panaw. Kinahanglan sila nga masayod nga kita adunay pagsalig kanila ug hugot nga pagtuo nga ang Dios motubag sa ilang mga pag-ampo samtang magtinguha sila sa Iyang direksiyon. Apan sa kataposan, kini ilahang panaw. Kita makahigugma ug makasuporta kanila, apan ang proseso sa paglambo pinaagi sa pagsalig sa Dios ug pagdangop ngadto Kaniya alang sa mga tubag usa ka proseso nga ang matag usa kanato kinahanglan gayod nga masinati sa atong kaugalingon ug dili makahimo sa lain (tan-awa sa Mormon 9:27).