Mga Sukaranan sa Ebanghelyo
Family History Makatabang sa Atong mga Katigulangan
Ang family history mao ang pagdiskobre ug pagkat-on mahitungod sa atong mga sakop sa pamilya. Mahimo usab kita nga mopundok og mga impormasyon sa atong mga katigulangan aron kita makahimo og buhat sa templo alang kanila.
Ang mga pamilya mao ang sentro sa plano sa Langitnong Amahan nga mao ang kalipay. Siya nag-andam og paagi alang sa mga pamilya nga magpadayon sa kahangtoran. Samtang magbuhat kita sa atong family history ug sa buhat sa templo, kita nagtabang nga magkauban ang atong mga sakop sa pamilya, sa buhi ug sa patay. (“Ang buhat sa Templo” nagpasabot sa pagdawat og mga ordinansa sa templo alang sa atong kaugalingon, sama sa pagselyo ngadto sa atong kapikas, ingon man usab sa pagbuhat sa mga ordinansa sa templo alang sa atong mga katigulangan. Alang sa dugang nga impormasyon mahitungod sa mga ordinansa sa templo, tan-awa ang artikulo sa mga Sukaranan sa Ebanghelyo sa Oktubre 2021 nga isyu sa Liahona.)
Family History ug Buhat sa Templo
Ang matag tawo kinsa nakapuyo o mopuyo pa dinhi sa yuta nagkinahanglan sa mga ordinansa sa ebanghelyo. Kon ang atong mga katigulangan wala nakabaton niana nga kahigayonan, kita makapahigayon og mga ordinansa alang kanila diha sa templo. Usa niadto nga mga ordinansa mao ang maselyo ngadto sa mga sakop sa pamilya. Ang “maselyo” nagpasabot nga kita makapuyo sa kahangtoran uban sa atong mga pamilya kon kita matarong. Kita mahimong maselyo ngadto sa atong mga pamilya sa mga templo lamang.
Mga Panalangin sa Buhat sa Family History
Ang family history makatabang kanato sa paglig-on sa atong mga relasyon sa atong buhi nga mga sakop sa pamilya. Samtang mopaambit kita og mga istorya, mga litrato, ug uban pang mga panumdoman sa usag usa, kita nag-establisar og mga kalig-on sa relasyon sa pamilya. Kita makapalig-on usab sa atong gugma alang sa usag usa. Ang mga propeta usab misaad nga ang pagbuhat sa atong family history makapaduol kanato ngadto ni Jesukristo.
Pagpangita sa Atong mga Katigulangan
Gusto sa Langitnong Amahan nga kita maselyo ngadto sa atong kasamtangan nga mga pamilya ug ngadto sa atong mga katigulangan. Sa dili pa kita maselyo ngadto sa atong mga katigulangan, kita kinahanglan mangita ug dayon i-save ang impormasyon mahitungod kanila. Apan ang family history labaw pa kay sa pagsiksik og mga ngalan, mga petsa, ug mga lugar. Samtang magkat-on kita sa atong mga katigulangan, kita mobati nga mas konektado ngadto kanila.
FamilySearch
Ang FamilySearch usa ka libre nga software service nga gisangkap sa Ang Simbahan ni Jesukristo sa mga Santos sa Ulahing mga Adlaw. Makatabang kini sa katawhan sa pagdiskobre sa ilang mga pamilya. Makasugod kamo sa inyong family history diha sa FamilySearch.org o diha sa app nga FamilySearch Family Tree. Ang inyong ward o branch lagmit usab nga adunay tawo kinsa makatabang kanimo.