Mga Tingog sa mga Santos sa Ulahing mga Adlaw
Mga Kasoy sa Pasko
Ang gasa sa akong higala ngadto sa laing residente sa sentro nga inabagan ang pagpuyo [assisted-living center] mipahinumdom kanako nga ang tinuod nga kalipay makaplagan sa Kristohanong gugma.
Samtang nagsugod ko sa akong oras sa trabaho ug mikuha og mga order ug midalit og pagkaon, usa sa akong paborito nga mga residente, si Stan (dili tinuod niya nga ngalan), misulod sa kan-anan. Nagtrabaho ako sa usa ka sentro nga inabagan ang pagpuyo ug migahin og daghang oras sa pagpakigdait uban niining talagsaon nga lalaki. Siya usa ka malamposong tagsulat ug kanhi propesor kinsa miserbisyo isip presidente sa misyon, patriyarka sa stake, ug sealer sa templo.
Nanghinaot ko nga samtang migahin ako og panahon uban kaniya, makakuha ako sa pipila sa iyang pagkaespirituhanon ug nindot nga personalidad. Kanunay akong nakadayeg sa iyang pagkamapainubsanon ug matinud-anong tinguha sa pagserbisyo sa uban. Ang iyang asawa sa 63 ka tuig bag-ohay lang namatay, ug bisan tuod nagsubo siya, nakakaplag siya og kalipay samtang nagtinguha siya og mga paagi sa paghimo sa uban nga mobati nga gihigugma ug komportable.
Uban sa grabeng pagkatap sa COVID-19 nga epidemya, ang 2020 nahimong lisod kaayo alang sa among komunidad nga inabagan ang pagpuyo. Apan ang pag-abot sa panahon sa Pasko nagdala og nabag-o nga paglaom alang sa umaabot.
Niana nga gabii, milingkod si Stan uban sa laing lalaki diha sa lamesa nga akong giserbisyohan. Pagkahuman og kaon niana nga tawo, mihangyo siya kanako og pipila ka pangmeryenda nga dad-on og balik ngadto sa iyang kwarto. Mikuha ko sa mga meryenda, apan subo lang, nahutdan na mi sa unsay iyang gusto. Sa dihang mibalik ako sa iyang lamesa ug gisultihan siya, nasagmuyo siya. Mitanyag ako og lain nga mga meryenda, apan matinahoron siyang mibalibad.
Si Stan, nga nakadungog sa among panag-istoryahanay, mibarog sa iyang gilingkoran. Gamit ang iyang walker, hinay-hinay siyang miadto sa hawanan. Mibalik siya pipila ka minuto ang milabay uban sa pipila sa iyang paborito nga mga meryenda—mga kasoy nga giputos og tsokolate. Gitanyag niya kini sa lalaki, gipasalamatan siya alang sa iyang pakigkauban, ug mibalik sa iyang kwarto.
Samtang naghunahuna ako sa akong higala nga nagsagubang sa pagkamatay sa iyang asawa ug sa among komunidad nga nakasinati og pag-quarantine tungod sa COVID-19, ang mga pulong sa Manluluwas adunay mahinungdanon nga impluwensiya kanako. Miingon Siya, “Ang buot moluwas sa iyang kaugalingong kinabuhi mawad-an hinuon niini. Apan kadtong maghalad sa iyang kinabuhi alang kanako ug sa Maayong Balita dili mawad-an niini” (Marcos 8:35).
Si Stan nakakaplag og hingpit nga kalipay samtang nagpadayon siya sa pagserbisyo. Nakahinumdom ko nga naghunahuna, “Sa pagkatinuod, kini usa ka tawo sa Dios.”
Kanunay nakong hinumdoman ang epekto niini nga kasinatian ngari kanako. Kini nakatabang kanako sa paghimo og tumong sa tibuok kinabuhi nga mahimong usa ka mapasaligon nga disipulo ni Jesukristo, sama ni Stan. Siya mipakita kanako nga ang tinuod nga kalipay makaplagan sa padayon nga pagpanghatag sa gagmay nga mga butang, sama sa mga kasoy sa Pasko.