Mga Ideya alang sa Paghiusa sa Family History, Pagserbisyo sa Templo, ug Misyonaryo nga Buhat

Sa inyong pag-apil sa family history ug pagtabang sa uban sa paghimo niini, miapil kamo sa buhat sa Dios bahin sa kaluwasan ug kahimayaan sa duha ka habig sa tabil.

• Apil sa family history ug buhat sa templo. Pagsugod pinaagi sa paghimo og inyong kaugalingong family tree diha sa FamilySearch.org, dayon modugang og mga litrato, mga istorya, o mga pagrekord sa audio bahin sa mga sakop sa inyong pamilya. Ang mga consultant sa templo ug family history makatabang ninyo sa pagdugang og impormasyon ngadto sa inyong family tree. Sila makatabang usab ninyo sa pagpangita sa katigulangan nga nagkinahanglan og mga ordinansa sa templo.

• Ilailaha ang inyong katigulangan, bisan kon ang tanan nilang mga ordinansa sa templo nakompleto na. Kon mas nakaila kamo sa inyong pamilya, mas sayon ang pagpaambit sa ilang mga istorya ngadto sa uban. Ang inyong kasingkasing mas mobati usab ngadto sa inyong katigulangan, mopalambo sa inyong abilidad sa pagpamatuod uban sa kombiksiyon.

• Ilailaha ang inyong mga consultant sa templo ug family history sa ward. Ipamilyar ang mga kapanguhaan diha sa inyong lokal nga family history center kon adunay usa sa duol. Pagkat-on kon unsaon paggamit sa FamilySearch.org, sa FamilySearch Tree ug FamilySearch Memories nga mga app, ug ubang online nga mga kapanguhaan nga magamit sa mga miyembro sa Simbahan diha sa inyong dapit. Kon mas nakahibalo kamo, mas daghan kamo og mga opsiyon sa pagtabang sa mga higala nga makabaton og interes nga makat-on pa og dugang mahitungod sa ilang mga pamilya.

• Sulayi ang paghisgot ngadto sa mga sakop sa pamilya, mga higala, ug mga katrabaho nga dili mga sakop sa Simbahan mahitungod sa ilang katigulangan o ilang kagikan. Hisgoti ang mahitungod sa mga istorya sa pamilya, kon diin gikan ang ilang katigulangan, mga kinaiya nga ilang napanunod, mga yutang natawhan nga ilang nakita o gusto nga bisitahan, ug mga kabilin nga gipanunod. Ang bisan unsa niini nga mga hilisgotan mahimong mosangpot ngadto sa makahuloganong mga panaghisgotan mahitungod sa yutan-on ug mahangturon nga mga pamilya.

• Himoang yano ang inyong mga panagsultihanay. Pagpokus sa makadani nga mga hilisgotan nga makapainteresado sa uban nga makat-on pa og dugang mahitungod sa ilang katigulangan. Ayaw pagdali-dali sa hilisgotan bahin sa pagsiksik sa family history. Hinoon, tugoti ang Espiritu nga mogiya sa panagsultihanay ug mopabati sa mga kasingkasing sa mga tawo ngadto sa ilang katigulangan. Kon andam na sila nga makat-on pa og dugang, salig sa Espiritu nga ipahibalo kini kaninyo.

• Ang mga panaghisgotan bahin sa family history kasagaran makapadasig sa uban sa pagpangutana mahitungod sa inyong tinuohan ug pagkamiyembro sa Simbahan, sama sa “Nganong ang inyong Simbahan mihatag man niining tanan nga libre?” o “Nganong morag makapainteresado ug importante man kaayo kini?” Labing maayo nga tugotan kini nga mga panagsultihanay nga mahitabo sa natural nga paagi, nga dili ipamugos. Pag-ampo ug tinguhaa ang Espiritu isip inyong giya.

Ang pagkat-on mahitungod sa family history sa dili pa kamo moserbisyo sa inyong misyon makahatag ninyo og importante nga mga kahanas nga maoy hinungdan nga ang mga indibidwal ug mga kinabig mobati sa espiritu bahin niining mahinungdanon nga buhat. Ang inyong mga kasinatian makatabang usab ninyo sa pagpamatuod bahin sa mahangturong mga pamilya.

• Siguroa nga kamo adunay account sa Simbahan. Memoryaha ang inyong username ug password. Gamita ang inyong account sa pagsugod sa inyong kaugalingong family tree diha sa FamilySearch.org.

• Pagkat-on og sukaranang mga kahanas sa FamilySearch.org, sama sa paghimo sa inyong kaugalingong family tree, pagdugang og ngalan ngadto sa inyong tree, ug pagdugang og litrato o istorya ngadto sa Mga Handomanan nga seksiyon.

• Pagkat-on og mga istorya mahitungod sa inyong katigulangan ug mag-andam sa pagpaambit niadto nga mga istorya gikan sa handomanan.

• Pangitaa ang ngalan sa usa o mas daghan pa nga katigulangan nga nanginahanglan og mga ordinansa sa templo. Kon kamo nagpuyo duol sa templo, kompletoha ang ilang bunyag ug kompirmasyon. Buhata kini kauban ang inyong pamilya kon mahimo. Kon kamo natugahan, ipahigayon ang ubang mga ordinansa sa templo. Kon kamo wala magpuyo duol sa templo, isumiter ang mga ngalan aron tugotan ang uban sa pagpahigayon sa buhat sa ordinansa.

• Kon kamo adunay smartphone o tablet, i-download ang FamilySearch Tree ug FamilySearch Memories nga mga app. Pagkat-on unsaon paggamit niini sa pagtan-aw sa mga profile, mga litrato, ug mga istorya sa inyong katigulangan. Praktisa ang pagtabang sa mga higala sa pagpangita sa impormasyon mahitungod sa ilang katigulangan.

• Ipamilyar ang mga Kalihokan sa Family History ug Mangita sa Tawo nga mga seksiyon sa FamilySearch Tree nga app aron makat-on og makalingaw nga mga paagi sa pagpaapil sa mga tawo diha sa mga kalihokan ug panaghisgotan sa family history.

• Kon buhi pa ang inyong apohan o apohan sa tuhod, gamita ang FamilySearch Memories nga app sa pag-interbiyo nila mahitungd sa ilang kinabuhi. Ibutang ang rekord sa audio diha sa FamilySearch.org, uban sa ilang litrato.

• Ipamilyar ang Akong Pamilya: Mga Istorya nga Naghiusa Namo nga booklet ug ang Mga Pamilya ug mga Templo [Families and Temples] nga pamphlet sa misyonaryo.

• Pag-ampo alang sa Espiritu nga mogiya kaninyo ngadto sa mga kasinatian nga makapalambo sa inyong pagpamatuod bahin sa mahangturong mga pamilya.

Ang mga oportunidad sa pag-apil diha sa family history ug pagserbisyo sa templo managlahi sa nagkalainlaing misyon. Ang inyong presidente sa misyon motabang ninyo nga masayod kon unsay angay diha sa inyong misyon.

• Pag-ampo alang sa Espiritu nga mogiya kaninyo ngadto sa mga tawo kansang katigulangan nag-ampo aron makadawat sa mga ordinansa sa templo.

• Ilailaha ang mga consultant sa templo ug family history diha sa dapit diin kamo nagserbisyo.

• Praktisa ang pagpasiugda og panagsultihanay sa mga tawo mahitungod sa ilang mga pamilya. Pagkat-on kon asa gikan ang ilang katigulangan ug kon unsay ilang nasayran mahitugod sa mga istorya sa ilang katigulangan.

• Pagdala og kopya sa inyong fan chart o pedigree chart nga nagpakita sa inyong family tree. Pag-andam sa pagpaambit niini diha sa papel o gamit ang FamilySearch Tree nga app. Pagtanyag og tabang sa uban sa pagsugod sa ilang kaugalingong family tree o paghimo sa ilang kaugalingong fan chart.

• Kon mangutana ang mga tawo kon ngano nga ang atong Simbahan nagpakabana og maayo mahitungod sa mga pamilya ug family history, pag-andam sa pagtubag sa ilang mga pangutana. Hatagi og panahon ang Espiritu sa pagtandog sa ilang kasingkasing ug sa pagpamatuod bahin sa posibilidad nga mahiusa uban sa ilang pamilya sa kahangtoran.

• Kon magtudlo, sunda ang ideya gikan ni Sister Wendy W. Nelson nga maghunahuna og labing minos 100 pa ka tawo diha sa lawak. “Kadtong 100 ka tawo mao, siyempre, ang katigulangan sa mga investigator ug katigulangan sa mga misyonaryo.”¹

• Pagkat-on kon unsa nga mga kapanguhaan ang magamit diha sa inyong dapit, sama sa family history center. Kon angay, dad-a kadtong inyong gitudloan ngadto sa family history center aron makat-on pa og dugang mahitungod sa ilang mga pamilya.

• Kon duol ra ang templo, dapita ang inyong gitudloan nga mobisita sa mga nataran. Paggahin og panahon didto nga maghisgot mahitungod sa plano sa kaluwasan ug sa mga panalangin sa mahangturong mga pamilya. Paghisgot mahitungod sa kalipay sa pagserbisyo sa atong namatay na nga mga minahal didto sa templo.

• Hangyoa ang usa ka pamilya nga miyembro nga mopaambit og mga istorya bahin sa ilang katigulangan o mohatag nila og makahuloganong kasinatian sa pagdiskobre gamit ang FamilySearch.org o ang FamilySearch Tree nga app. Modapit kini sa Espiritu. Niini nga kahimtang, pangutana kon unsay ilang gibati kon maghisgot mahitungod sa ilang katigulangan. Dayon, kon giaghat sa Espiritu, pangutana kon sila aduna bay mga higala o mga sakop sa pamilya nga ganahang makatagamtam og susama nga kasinatian.

• Awhaga ang bag-ong nabunyagan nga mga miyembro sa pag-apil sa family history ug sa buhat sa templo. Usa kini ka gamhanang paagi sa pagtabang nila nga magpabilin diha sa dalan sa pakigsaad.

Mahimo kamong talagsaong suporta ngadto sa mga misyonaryo kon mosunod kamo sa Espiritu sa pagpaambit sa inyong kahibalo.

• Makugihong mag-ampo alang sa Espiritu nga magauban kaninyo samtang motabang kamo sa uban, ilabi na niadtong dili pa mga miyembro sa Simbahan karon, niadtong mibalik sa pagkaaktibo, ug niadtong bag-ong nabunyagan. Tugoti nga ang mga interes, mga panginahanglan, ug mga tinguha sa uban nga mogiya ninyo sa inyong panagsultihanay ug ang matang sa tabang sa family history nga inyong ihatag.

• Ilailaha ang mga misyonaryo nga nagserbisyo sa inyong dapit. Dapita sila ngadto sa family history center aron makaila sa mga tawo ug mga kapanguhaan didto. Abi-abiha ang mga misyonaryo ug ang ilang mga gitudloan kon moabot sila. Ilailaha ang usag usa sa dili pa moadto sa mga hilisgotan bahin sa family history.

• Sa mga misyon nga kini gitugotan, pagtanyag nga motudlo sa mga misyonaryo og pipila ka kahanas bahin sa family history. Tudloi sila sa pagtabang sa uban sa paghimo og importante nga mga pagdiskobre sa pamilya ug pagpreserbar sa bililhong mga handomanan sa pamilya.

• Kon gidapit, apil sa mga misyonaryo diha sa mga panagsabot sa pagtudlo nga maghisgot bahin sa mga pamilya ug mga templo. Pag-andam sa pagpaambit sa inyong mga pagbati mahitungod sa kaimportante sa mahangturong mga pamilya ug sa buhat nga atong gihimo alang sa atong mga minahal didto sa templo. Himoang yano ang inyong mga pagpasabot.