E Na’o le Faatekinolosi: Autalavou Matutua
O Le Auala na Fesoasoani ai le Alii ia ou Malamalama i le Taua Paia i le taimi na Tatala ai La’u Faaipoipoga
A o ou faalagolago i le Faaola e ala i o‘u tofotofoga, sa ou aoao e vaai i isi—ma a’u lava—i se malamalama fou.
Ata na pueina e Tina Lerohl
I le mea ou te sau ai i Aferika i Saute, e i ai ni talitonuga faapitoa faaleaganuu e faamamafa ai foliga vaaia ma tulaga faatonuina o le lalelei, lea e mafai ona lofituina ma e i ai taimi ou te lagona ai le le mautonu e uiga i o‘u foliga vaaia ma po o ai a’u. Ma ua ou aoaoina o le toatele o isi talavou matutua i le salafa o le lalolagi o loo tauivi ma foliga o le tino ma le taua foi o le tagata lava ia.
O se tasi o togafiti malolosi a Satani o le le lagonaina o le le faamalieina i tino. E taumafai o ia e faatalitonu i tatou ia faamasino i tatou lava ma isi e faavae i foliga vaaia. Ae ua ou iloaina afai ou te taumafai e tausisia tulaga faatonuina a le lalolagi o le aulelei ma le taua o le tagata lava ia, o le a ou le lagonaina lava le faamalieina po o le filemu po o ai a’u.
O le ki i le mauaina o le talitonuga mautinoa o le taumafai lea e vaai ia te a’u lava ia ma isi i le ala e faia ai e le Tama Faalelagi. O lenei mea na mafai ai ona ou malamalama i lo’u lava taua moni ma iloa ai foi le taua o isi.
O Le Taulaiga Sese
A o o’u tafao faamasani, sa ou vaaia le tele o tulaga ia sa faavae ai le taua o isi i foliga vaaia. Sa ou faanoanoa i le vaaia o nisi o a‘u uo na o atu i ni tafaoga laiti nai lo i latou o e na foliga mai na fetaui ma tulaga faatonuina a le lalolagi o le lalelei. Ae paga lea, i la‘u lava sailiga mo se soa e faavavau, sa i ai foi la’u lava lisi o uiga—e aofia ai uiga faaletino—sa ou sailia i se tane i le lumanai.
Mulimuli ane, sa ou maua se tasi e faaipoipo i ai i le malumalu. Ma i le amataga, sa ou manatu sa matagofie le ma faaipoipoga. Ae sa amata ona ou matauina le gugutu o lo’u toalua i isi e uiga i le auala na ia faaipoipo ai i le teine e sili ona aulelei i totonu o le potu, ae peitai sa le mafai ona ia fai mai se tala manaia e uiga i o‘u foliga vaaia pe a na o ma’ua. Sa ia ta‘ua i taimi uma pe a suia lo’u mamafa ma ta‘u mai ia te a’u le auala e fai ai lo‘u lauulu ma le auala e fai ai o‘u lavalava.
I ni nai masina talu ona maua la‘u tama muamua, sa faafuasei ona fai mai lo’u toalua ua manao e tatala le faaipoipoga. Ou te le’i iloaina lava se mea na sese. E ui lava i a’u taumafaiga sili, sa le mafai ona faatauanauina o ia e galue i le laveaiina o le ma faaipoipoga, ma sa tuua ai a’u o se tina nofo toatasi.
Mulimuli ane, sa ou iloa ai sa aafia o ia i se isi tamaitai a o ma faaipoipo pea, ma sa ou maofa i le iloaina sa foliga tutusa o ia e pei lava o a‘u ae sa na o ni nai tausaga e laitiiti ai ma sa lei i ai ni suiga na oo mai i le tauaveina ma le fanauina o se pepe. Sa amata ona ou mafaufau pe aisea na le lava ai lo’u lelei ma taulai atu i o’u faaletonu faaletino.
Sa i ai se taimi sa ou aoaoina ai e le o se mea e seāseā tupu lo’u tulaga. A o o’u toe ulu atu i le vaaiga o tafaoga faamasani, sa ou faalogo i le tele o tala e uiga i le tete‘a o tagata talavou ona sa “leai so latou naunau” i o latou taitoalua o e “na tuu i latou lava e o” pe ona sa leai se “tosinaga faaletino” ua toe i ai.
Sa ou faamimigi i taimi uma ou te faalogo ai i se tasi o fai mai o foliga o le vaega aupito sili lea ona taua o se toalua. Soo se taimi lava ou te mafaufau ai e uiga i le vaaiga a le lalolagi o le lalelei, sa ou mafaufau pe sa ou le agavaa mo le alofa ona o suiga na oo i ai lo’u tino i le taimi o le ma’itaga.
O le Matagofie Moni
A o o’u mafaufau loloto i le uiga o le lalelei moni, sa ou maua ai se upusii e faatusatusa i le vaaiga a le lalolagi e uiga i le mataupu: “I le lotolotoi o ‘mea taufaasese uma’ ia atonu e tupu muamua i tafaoga faamasani—e aofia ai le maua o foliga sili i taimi uma—e tatau ona tatou manatua o foliga vaaia ma sitaili ‘e matuai le taua lava.’”1
Sa fesoasoani lenei mea ou te malamalama ai o le vaaia o agaga o le tasi ma le isi, po o mea o i totonu, o le mea moni lea e taua i le sailia o se toalua ma o le ki lea i le alofa atu i isi ma i tatou lava. I le avea ai ma soo o Iesu Keriso, e tatau ona tatou taulai atu i le malosi o le tagata ma o tatou faasinomaga o ni agaga faalelagi.
O le tatalaga o la’u faaipoipoga na tiga tele ai a’u, ae na tuuina mai ai foi ia te a’u se avanoa e toe iloilo ai le uiga o le lalelei moni ma le taua paia. Afai o loo e tauivi ia iloa lou taua paia po o isi, mafaufau i motugaafa nei, na fesoasoani ia te a’u e toe faatulaga ai la‘u vaaiga.
1. Auai Soo i le Malumalu
I totonu o le malumalu, e mou atu le lalolagi i tua atu ae taulai atu i le faavavau. O le tele lava o lo‘u auai i le malumalu ma manatua a’u feagaiga, o le tele foi lea o le suia o la‘u vaaiga tapulaa agai i se vaaiga e faavavau. O mea e foliga mai e taua i tulaga faalelalolagi e foliga mai e le taua tele i le malumalu.
Ae o lenei suiga e le tupu faafuasei. E oo mai e ala i le faaaluina pea lava pea o taimi faamoemoeina i le maota o le Alii. E pei ona aoao mai Peresitene Russell M. Nelson: “O le tausia o se feagaiga o le malumalu e le faamalosia ae e mafai. E siitia ai i tatou i talaatu o tapulaa o la tatou lava vaaiga ma le mana.”2
2 Aoao e Faalogo i le Agaga Paia
O loo valaau mai Peresitene Nelson ia i tatou ina ia “faateleina lo [tatou] gafatia faaleagaga e maua ai faaaliga. … Filifili e fai le galuega faaleagaga e manaomiaina e olioli ai i le meaalofa o le Agaga Paia ma faalogo soo atu ma le manino atili i le siufofoga o le Agaga.”3
A tatou filifili e taulai atu i mea a le Agaga nai lo mea o le lalolagi, o le a sili atu ona tatou saunia e faalogo i Ana uunaiga ma upumoni.
3. Tatalo mo Meaalofa Faaleagaga
O nisi o meaalofa faaleagaga e mafai ona tatou maua ai le malamalama ma le vaaiga e manaomia ona tatou malamalama ai i lo tatou taua ma le taua o isi. Ua uunaia i tatou e le Tama Faalelagi ia “saili … ma le naunautai i meaalofa silisili ona lelei” ma ua ta‘u mai ia i tatou afai tatou te mananao ma tatalo mo i latou, e mafai ona tatou maua mea tatou te manaomia (Mataupu Faavae ma Feagaiga 46:8; tagai foi fuaiupu 9). O meaalofa o le iloatino, alofa mama, ma le poto o meaalofa uma ia e mafai ona fesoasoani e suesue ma tatalo ai a o e saili ia malamalama atili i le uiga o le lalelei moni ma le taua paia.
4. Mulimuli i le Upu o le Poto
O o tatou tino o se meaalofa matagofie mai le Atua. O Satani, o lē o loo saili e faaumatia le fuafuaga a le Atua ma o le a le i ai lava sona lava tino, e osofaia lenei meaalofa paia. O le taulimaina o o tatou tino ma le faaaloalo ma le iloaina o mea e mafai ona latou faia pe a tatou faaaogaina ma aloese mai mea leaga e mafai ona fesoasoani ia i tatou e aoao ai e faataua o tatou tino ma, e ala i faataitaiga, fesoasoani i isi ia faia foi faapea.
5. Taulai atu i le Faaola
Pe a tatou faalagolago ia Iesu Keriso, ua tatou vaai ia i tatou lava po o ai moni i tatou—o fanau paia a ni matua faalelagi. A o tatou aoao e alolofa ia i tatou lava ma agalelei ia i tatou lava e tusa lava pe tatou te faia ni mea sese, e mafai e le Faaola ona fesoasoani ia i tatou e faaauau pea ona tuputupu ae ma atiina ae Ona uiga auaumama.
Na saunoa mai Sister Joy D. Jones, le Peresitene talu ai o le Peraimeri, “Afai o le alofa tatou te lagonaina mo le Faaola ma mea na Ia faia mo i tatou e sili atu i lo le malosi tatou te tuu atu i vaivaiga, masalosalo faaletagata lava ia, po o mausa leaga, ona Ia fesoasoani lea ia i tatou e faatoilalo mea ia e mafua ai puapuaga i o tatou olaga.”4
I le taumafai ai e vaai atu i isi po o ai moni lava i latou, sa amata ona ou faataitai ia ese le vaai atu ia i latou. Afai ou te faamasinoina se tasi e faavae i o latou foliga vaaia, ou te toe vaai toto‘a ma taumafai e vaai i mea na silasila i ai le Tama Faalelagi. Sa ou maofa i le auala na mafai ai e le Atua ona faapupula o‘u mata. Sa ou le toe iloaina ni uiga faaletino ma amata ona malamalama i le lalelei moni ma le taua—o le Malamalama o Keriso i totonu o i tatou taitoatasi.
Faalatalata Atili ia Keriso
E ui lava ina sa ou oo i ni aafiaga tiga, ae ua ou aoao e tuu atu ia Keriso e faamalolo a‘u ma alofa i lo‘u tino ma lo‘u agaga. Na aoao mai Peresitene James E. Faust (1920–2007), o lē sa avea muamua ma Fesoasoani Lua i le Au Peresitene Sili: “O se talitonuga maumaututu o oe o se afafine [po o se atalii] o le Atua e tuuina atu ia te oe se lagona o le mafanafana i lou taua faaletagata lava ia. O lona uiga e mafai ona e maua le malosi i le filemu o Keriso. O le a fesoasoani ia te oe e faafetaiaia ai lototiga ma luitau i le faatuatua ma le toafimalie.”5
Atonu e i ai ni manatu o le lalolagi i le uiga o le lalelei ma le taua paia, ae a o tatou latalata atili atu i le Tama Faalelagi ma Iesu Keriso, o le a tuputupu a‘e lo tatou gafatia e vaai ai e ala i le taufaasese o le lalolagi ma iloa ai o le a tuputupu a‘e le lalelei moni. Tau ina ia faamanuiaina i tatou e vaai sa‘o atu i le matagofie o isi ma i tatou lava—o le ala La te silasila ai ia i tatou.