Aoaoga Autu o le Talalelei
E Fesoasoani Talafaasolopito o Aiga i o Tatou Tuaa
O le talafaasolopito o aiga o le mauaina ma le aoaoina e uiga i tagata o o tatou aiga. Tatou te aoina mai foi faamatalaga e uiga i o tatou tuaa ina ia mafai ona tatou faia galuega faalemalumalu mo i latou.
O aiga o le totonugalemu lea o le fuafuaga o le fiafia a le Tama Faalelagi. Ua Ia saunia se ala mo aiga e faaauau ai pea i le faavavau atoa. A o tatou faia a tatou galuega o talafaasolopito o aiga ma le malumalu, tatou te fesoasoani e aumai faatasi tagata o o tatou aiga, o e o soifua ma e ua maliliu. (“Galuega faalemalumalu” o lona uiga o le mauaina o sauniga o le malumalu mo i tatou lava, e pei o le faamauina i o tatou taitoalua, faapea foi ma le faia o sauniga i le malumalu mo o tatou tuaa. Mo nisi faamatalaga e uiga i sauniga o le malumalu, tagai i le tusiga o Aoaoga Faavae o le Talalelei i le lomiga o Oketopa 2021 o le Liahona.)
Galuega o Talafaasolopito o Aiga ma le Malumalu
O tagata uma na soifua pe o le a ola i le lalolagi e manaomia ia sauniga o le talalelei. Afai e lei maua e o tatou tuaa lena avanoa, e mafai ona tatou faatinoina sauniga mo i latou i totonu o le malumalu. O se tasi o na sauniga o le faamauina lea i tagata o le aiga. O le “faamauina” o lona uiga o le a mafai ona tatou ola e faavavau ma o tatou aiga pe afai tatou te amiotonu. E na o malumalu e mafai ona faamauina ai i tatou i o tatou aiga.
O Faamanuiaga o le Galuega o Talafaasolopito o Aiga
E mafai e talafaasolopito o aiga ona faamalolosia o tatou sootaga ma tagata o tatou aiga o loo soifua. A o tatou fefaasoaai tala, ata, ma isi manatuaga i le tasi ma le isi, tatou te faavaeina sootaga faaleaiga. Tatou te faamalosia foi le alofa o loo ia i tatou mo le tasi ma le isi. Ua folafola mai foi e perofeta o le galulue i o tatou talafaasolopito o aiga o le a tatou latalata atili atu ai ia Iesu Keriso.
Sailia o o Tatou Tuaa
E finagalo le Tama Faalelagi ia faamauina i tatou i o tatou aiga o i ai nei ma o tatou tuaa. A o lei mafai ona faamauina i tatou i o tatou tuaa, e manaomia ona tatou sailia ona sefe lea o faamatalaga e uiga ia i latou. O le talafaasolopito o aiga e sili atu nai lo nao le sailiga o igoa, aso, ma nofoaga. A o tatou aoao e uiga i o tatou tuaa, o le a tatou lagonaina le fesootai atili atu ia i latou.
FamilySearch
O le FamilySearch o se polokalama mauafua na saunia e Le Ekalesia a Iesu Keriso o le Au Paiao Aso e Gata Ai. E fesoasoani i tagata ia iloa o latou aiga. E mafai ona e amata i lau talafaasolopito o aiga i le FamilySearch.org po o le polokalama o le Gafa o le Aiga i le FamilySearch. E mafai foi e lau uarota po o le paranesi ona i ai se tasi e mafai ona fesoasoani ia te oe.