Manatu mo le Aumaia Faatasi o Talafaasolopito o Aiga, Auaunaga i le Malumalu, ma le Galuega Faafaifeautalai

A o e aafia i talafaasolopito o aiga ma fesoasoani i isi ia faia lea lava mea e tasi, ua e auai i le galuega a le Atua o le faaolataga ma le faaeaga i itu uma e lua o le veli.

• Auai atu ai i talafaasolopito o aiga ma galuega o le malumalu. Amata i le fatuina o lou lava gafa o le aiga i le FamilySearch.org, ona faaopoopo lea o ata, tala, po o leo pue o tagata o lou aiga. E mafai e faufautua o malumalu ma talafaasolopito o aiga ona fesoasoani ia te oe e faaopoopo faamatalaga i lau gafa o le aiga. E mafai foi ona latou fesoasoani ia te oe e sue tuaa e manaomia sauniga o le malumalu.

• Ia iloa ou tuaa, e tusa lava pe ua mae‘a uma o latou sauniga o le malumalu. O le tele o lou iloa e uiga i lou aiga, o le faigofie foi lena o le faasoa atu o a latou tala i isi. O le a liliu atili atu foi lou loto i ou tuaa, ma faateleina lou tomai e molimau atu ai ma le talitonuga maumaututu.

• Ia faamasani i faufautua o le malumalu ma talafaasolopito o aiga a lau uarota. Ia faamasani i punaoa i la outou nofoaga autu o talafaasolopito o aiga i le lotoifale pe afai e i ai se tasi e lata ane. Aoao e faaaoga le FamilySearch.org, polokalama o le Gafa o le FamilySearch ma Manatuaga o le FamilySearch, ma isi punaoa i luga o le initoneti o loo avanoa mo tagata o le Ekalesia i la outou eria. O le tele o lou iloa, o le tele foi lea o filifiliga o le a e maua mo le fesoasoani i uo ia maua se fiafia e aoao atili e uiga i o latou aiga.

• Taumafai e talanoa i tagata o le aiga, uo, ma tagata faigaluega e le o ni tagata o le Ekalesia e uiga i o latou tuaa po o lo latou tofi. Talanoa e uiga i tala o aiga, fea na o mai ai o latou tuaa, o uiga na latou maua mai ai, o nuu moni na latou vaaia pe faamoemoe e asiasi i ai, mea taua na tuufaasolo mai. Soo se tasi o nei autu e mafai ona taitai atu ai i talanoaga anoa e uiga i aiga faalelalolagi ma faavavau.

• Ia faafaigofie au talanoaga. Taulai atu i mataupu mananaia o le a fiafia i ai isi e aoao atili e uiga i o latou tuaa. Aua le faanatinatia le mataupu o le sailiga o talafaasolopito o aiga. Ae, tuu atu i le Agaga e taitaia le talanoaga ma liliu atu loto o tagata i o latou tuaa. Pe a latou saunia e aoao atili, faalagolago i le Agaga e faailoa atu ia te oe.

• O talanoaga e faatatau i talafaasolopito o aiga e masani ona musuia ai isi e fai ni fesili e uiga i lou faatuatua ma le avea ai ma tagata o le Ekalesia, e pei o le “Aisea ua tuuina mai ai e lau Ekalesia nei mea uma e aunoa ma se totogi?” po o le “Aisea e lagona ai e lenei mea le manaia tele ma le taua?” E sili atu le faatagaina o nei talanoaga ia tuputupu a‘e faalenatura, e aunoa ma le faamalosia. Tatalo mo ma saili le Agaga e fai ma ou taiala.

O le aoao e uiga i talafaasolopito o aiga ae e te le‘i auauna atu i lau misiona o le a tuuina atu ai ia te oe ni tomai taua e mafai ona taitai atu ai tagata taitoatasi ma tagata liliu mai ia lagonaina le agaga o lenei galuega tele. O le a fesoasoani foi ou aafiaga ia te oe e molimau atu ai i aiga e faavavau.

• Faamautinoa ua i ai sau faitotoa a le Ekalesia. Tauloto lou igoa faaaoga ma le uputatala. Faaaoga lau faitotoa e amata ai lau oe lava gafa o le aiga i le FamilySearch.org.

• Aoao ni tomai autu i le FamilySearch.org, e pei o le fatuina o lou lava gafa o le aiga, faaopoopo se igoa i lau gafa, ma faaopoopo se ata po o se tala i le vaega o Manatuaga.

• Aoao i tala e uiga i ou tuaa ma ia saunia e faasoa atu na tala mai lou manatuaga.

• Saili se igoa se tasi po o le sili atu foi o ou tuaa e manaomia sauniga o le malumalu. Afai e te nofo latalata i se malumalu, faamae‘a o latou papatisoga ma faamauga. Fai lenei mea ma lou aiga pe a mafai. Afai ua maua ou faaeega paia, faatino isi sauniga o le malumalu. Afai e te le nofo latalata i se malumalu, ia auina atu igoa e tuu atu ai i isi e faatino le galuega o sauniga.

• Afai e i ai sau telefonipoto po o se tapeleti, sii mai polokalama o le Gafa o le FamilySearch ma Manatuaga o le FamilySearch. Aoao pe faapefea ona faaaoga e tilotilo ai i talaaga otooto, ata, ma tala a ou tuaa. Faataitai le fesoasoani i uo e sue faamatalaga e uiga i o latou tuaa.

• Faamasani i vaega o le Gaoioiga o Talafaasolopito o Aiga ma Saili se Tagata o le polokalama o le Gafa a le FamilySearch e aoao ai ni auala malie e faaauai ai tagata i gaoioiga ma talanoaga o talafaasolopito o aiga.

• Afai e i ai sou matua o matua o loo soifua po o se matua o matua o matua, faaaoga le polokalama o Manatuaga o le FamilySearch e faatalanoa ai i latou e uiga i o latou olaga. Teu le puega o le leo i luga FamilySearch.org, faatasi ai ma lo latou atapue.

• Ia faamasani i le tamaitusi o le O Lo‘u Aiga: O Tala e Aumaia Faatasi ai i Matou ma le tamaitusi a faifeautalai o Aiga ma Malumalu .

• Tatalo mo le Agaga e taiala oe i aafiaga o le a faalolotoina ai lau molimau i aiga e faavavau.

O avanoa mo le auai i talafaasolopito o aiga ma auaunaga i le malumalu e eseese lava mai lea misiona i lea misiona. O le a fesoasoani lau peresitene o le misiona ia te oe ia iloa le mea e talafeagai i lau misiona.

• Tatalo mo le Agaga e taitai atu oe ia i latou o loo tatalo o latou tuaa ina ia maua sauniga o le malumalu.

• Ia faamasani i faufautua o malumalu ma talafaasolopito o aiga i le eria o loo e auauna atu ai.

• Faataitai talanoaga amata ma tagata e uiga i o latou aiga. Aoao po o fea na o mai ai o latou tuaa ma mea latou te iloa e uiga i tala a o latou tuaa.

• Ave se kopi o lau siata ili po o le siata o le faasologa o gafa o loo faaalia ai lou gafa o le aiga. Ia saunia e faasoa atu a le o luga o le pepa po o le faaaogaina o le polokalama o le Gafa o le FamilySearch. Ofo atu e fesoasoani i isi e amata a latou lava gafa o le aiga pe fatu a latou lava siata ili.

• A fesili mai tagata pe aisea e popole tele ai la tatou Ekalesia e uiga i aiga ma talafaasolopito o aiga, ia saunia e tali a latou fesili. Tuu atu i le Agaga le taimi e pa‘i atu ai i o latou loto ma molimau atu i le avanoa e mafai ai ona faatasia ma o latou aiga mo le faavavau.

• Pe a aoao atu, mulimuli i se manatu mai ia Sister Wendy W. Nelson e vaai faalemafaufau e le itiiti ifo ma le 100 tagata i totonu o le potu. “O na tagata e 100, ioe, o tuaa o tagata sailiili ma tuaa o faifeautalai.”¹

• Aoao po o a punaoa o loo maua i lo outou eria, e pei o se nofoaga autu o talafaasolopito o aiga. Pe a talafeagai ai, aumai i latou o loo e aoaoina i le nofoaga autu o talafaasolopito o aiga e aoao atili ai e uiga i o latou aiga.

• Afai e lata ane se malumalu, valaaulia i latou o loo e aoaoina e asiasi i lotoa. Faaalu se taimi iina e talanoa ai e uiga i le fuafuaga o le faaolataga ma faamanuiaga o aiga e faavavau. Talanoa e uiga i le olioli i le auauna atu i e pele ua maliliu i le malumalu.

• Fai atu i se tagata lotu o le aiga e faasoa mai ni tala e uiga i o latou tuaa pe tuuina atu ia i latou se aafiaga anoa i le faaaogaina o le FamilySearch.org po o le polokalama o le Gafa o le FamilySearch. O lenei mea o le a valaaulia ai le Agaga. I lenei faatulagaga, fesili atu pe o a ni o latou lagona pe a talanoa e uiga i o latou tuaa. Ona, e pei ona uunaia ai e le Agaga, fesili atu pe i ai ni a latou uo po o tagata o le aiga o e o le a olioli i se aafiaga faapena.

• Uunaia tagata fou o le ekalesia e auai i le faatinoga o talafaasolopito o aiga ma galuega o le malumalu. O se auala mamana e fesoasoani ai ia i latou ia tumau i luga o le ala o feagaiga.

E mafai ona avea oe ma se lagolago matagofie i faifeautalai a o e mulimuli i le Agaga i le faasoaina atu o lou malamalama.

• Tatalo ma le filiga mo le Agaga ina ia faatasi ma oe a o e fesoasoani atu i isi, aemaise lava mo i latou e le o ni tagata o le Ekalesia i le taimi nei, i latou o e ua toe toaaga mai, ma i latou o e faatoa papatiso. Tuu atu i mea e fiafia i ai, manaoga, ma mea e fiafia ai isi e taialaina au talanoaga ma le ituaiga o talafaasolopito o aiga e fesoasoani ia te oe e tuuina atu.

• Ia faamasani i faifeautalai o loo auauna atu i la outou eria. Valaaulia i latou i le nofoaga autu o talafaasolopito o aiga ia faamasani i tagata ma punaoa iina. Faafeiloai atu i faifeautalai ma i latou o loo latou aoaoina pe a latou o mai. Ia faamasani le tasi i le isi a o lei totofu atu i autu o talafaasolopito o aiga.

• I misiona e faatagaina ai, ofo atu e aoao faifeautalai i le tele o tomai o talafaasolopito o aiga. Aoao i latou e fesoasoani i isi ia faia mea taua e maua e le aiga ma faasaoina manatuaga taua faaleaiga.

• Pe a valaaulia ai, auai faatasi ma faifeautalai i le aoaoina atu i taimi faatulagaina e talanoaina ai aiga ma malumalu. Ia saunia e faasoa atu ou lagona e uiga i le taua o aiga e faavavau ma le galuega tatou te faia mo e pele ia i tatou i le malumalu. Ia faafaigofie au faamalamalamaga.