Mataupu Faavae o le Auaunaga
Auala e Fesoasoani ai i Se Tasi o Loo Saili mo Tali i Fesili o le Talalelei
O le sailiga mo tali e patino lava ia, ae e le tatau ona tupu na o ia.
E tofu tagata uma ma fesili. O fesili o se vaega o le auala tatou te malamalama ai i le lalolagi o siomia ai i tatou. Ua uunaia i tatou e le Atua e fai atu fesili ma saili tali (tagai Mataio 7:7). O lenei faagasologa o se vaega taua o le malaga o le olaga e aoao ma avea atili ai e faapei o Ia (tagai Mataupu Faavae ma Feagaiga 93:36). I le avea ai ma se vaega o lena tuputupu ae, o le a tatou feagai uma lava ma fesili e luitauina ai i tatou. A tupu lenei mea, e mafai ona fesoasoani le i ai o le lagolago a isi.
Sa faasoa mai e se tagata o le Ekalesia i Texas, ISA, lenei aafiaga:
“I le taimi o le Aualofa i se tasi aso, sa i ai se uso ou te lei vaai muamua lava i ai i le lotu sa faasoa mai ona lagona e pei o tamaitai i le Aualofa e pepelo ma e le atoatoa. Ina ua maea le sauniga, sa vave lava ona ia tuumuli, sa le mafai ona ou maua o ia.
“Ina ua tuua le lotu, sa ou alu i lona fale. Sa ou faailoa atu au lava ma fai atu ou te talisapaia ona manatu faaalia i le Aualofa ma sa ou manao e faalogo atili e uiga i ona atugaluga. Sa ia talanoa, ma sa ou faalogo. Sa ou faailoa atu lo‘u alofa mo ia ma lona aiga ma fesili atu pe mafai ona ou toe asiasi ia te ia.
“Sa ou faia le tofiga e auauna atu ua te ia o se faiaoga asiasi. I le aluga o taimi, a o ou malamalama atili i ona atugaluga, sa amata ona ma talanoa e uiga i ana fesili faaleaoaoga faavae. Sa amata ona o mai lana fanau i le lotu. Ona amata lea ona ia sau faatasi ma i laua. Ou te faamemelo i lona lototele ma le faapalepale. Sa avea o ia ma se tasi o a’u uo mamae.”
O fautuaga nei e fa mo auala e mafai ona e fesoasoani ai i se tasi o loo tauivi ma ana fesili.
Manatu mo le Auaunaga ia i Latou e i ai Fesili
1. E sili atu le alofa. Afai o loo tauivi se tasi ma se fesili pe ua oo i se faaiuga e ese mai nai lo i tatou, o loo ia i latou pea le manaomia o le alofa (tagai Luka 10:25–37).
O i latou o loo feagai ma se taimi faigata o le a liliu atu i se tasi latou te faatuatuaina. O le alofa i isi ma le fausiaina o sootaga anoa e mafai ona tuu ai i tatou i se tulaga e auauna atu ai pe a latou manaomia i tatou.E tatalaina ai foi le faitotoa mo se tasi e manao e toe foi mai ae atonue lagona le le toafimalie e toe foi mai (tagai Luka 15:11–24).
(Mo manatu i le faamalolosia o sootaga, faitau le “Fausiainao Sootaga Anoa,” Liahona,Aok. 2018, 6–9.)
2. Faalogo ma le lotomaualalo ma le agaalofa. Tatou te faatapulaaina lo tatou tomai e fesoasoani ai i isi i a latou fesili pe afai tatou te manatu vave ua tatou malamalama nai lo le faalogo ma le onosai ia malamalama. E tele mafuaaga atonu o loo tauivi ai se tasi. O nisi e i ai fesili e uiga i le aoaoga faavae. O isi e i ai fesili e uiga i aiaiga faavae po o le talafaasolopito. O nisi e taumanatunatu pe fetaui i latou i le Ekalesia.
O le faalogo ma le lotomaualalo ma le faia o fesili o le a fesoasoani tatou te malamalama ai i le lavelave o o latou tulaga ina ia mafai ai ona tatou tuuina atu ni tali lelei atu, ma e mafai ona fesoasoani ia i latou e tatala atili ai a tatou tali pe afai latou te lagona ua tatou faalogo moni i ai.
(Ina ia aoao pe faapefea ona faalogo lelei atili, faitau, “E Lima Mea e Fai e Tagata e Faalogo Lelei,” Liahona, Iuni 2018, 6–9.)
3. O le tumau pea i le faatuatua ma iloa o lenei mea e ono umi se taimi e alu ai. O fesili e luitauina moni ai i tatou e seasea foiaina i se aso. O lea e le tatau ai ona tatou tuuina atu se uunaiga faaopoopo ia i tatou lava po o i latou tatou te mananao e fesoasoani i ai e ala i le lagona e pei e tatau ona tatou “faaleleia” i le taimi tatou te iloa ai e uiga i lo latou popolega.
Afai tatou te mananao moni lavae fesoasoani atu, e taua lo tatou saunia e savavali i se auala umi ma i latou ina ia latou iloa a oo i le iuga o lena auala, po o le a lava le iuga atonu o le a i ai, o le a tatou i ai pea iina (tagai Eperu 12:12–13).
4. Faamalosiau ia i latou i la latou malaga. E manaomia ona latou iloa e i ai lo tatou talitonuga ia i latou ma le faatuatua o le a tali mai le Atua i a latou tatalo a o latou sailia Lana taitaiga. Ae i le iuga, o la latou malaga lenei. E mafai ona tatou alolofa ma lagolagoina i latou, ae o le faagasologa o le tuputupu ae e ala i le faatuatuaina o le Atua ma liliu atu ia te Ia mo tali o le mea lea e tatau ia i tatou taitoatasi ona oo i ai mo i tatou lava ma e le mafai ona faia mo se isi (tagai Mamona 9:27).