O Meaalofa Silisili o le Kerisimasi
Saunia e Elder Dieter F. Uchtdorf
O Le Korama a Aposetolo e Toasefululua
O le a se meaalofa e mafai ona tatou tuuina atu i lo tatou Faaola mo mea uma ua Ia faia mo i tatou?
Ata pue mai le Getty Images
O le Kerisimasi sa avea pea ma se taimi faapitoa mo au. O se taimi mo le alofa. O se taimi mo le foai atu. O se taimi mo le manatuaina.
Ou te manatua tu ma aga masani, mataina o le Kerisimasi ua au tausagā o Siekisolovakia lea na ou maofa ai a o ou laitiiti lava. Ou te manatuaina laau Kerisimasi e mumu i moligao, o meaalofa na fai e tagata, o manogi sasala o taumafataga i aso fiafia. Ou te manatua pesepesega matagofie ma musika mamalu o le okeni lea na faasusuluina auala pogisa o Zwickau i Siamani i Sasae. Ou te manatua foi le falealuga faatauvaa na tumutumu ai lo matou aiga ina ua matou sosola mo se taimi lona lua mai tulaga faigata ma amata ai se olaga fou i Siamani i Sisifo ina ua mavae le Taua Lona II a le Lalolagi.
A o ou toe tepa i tua ma le lototiga ma le olioli, atonu o le mea e sili ona ou manatuaina e uiga i le taimi o le Kerisimasi o le alofa lea sa i ai i lo‘u aiga mo le tasi ma le isi, le auala na matou fiafia ai ma taliaina le Ekalesia toefuataiina a Iesu Keriso, ma le ala na matou alolofa ai i le Faaola.
A o toe oo mai foi le Kerisimasi, ua faamanatu mai ai ia te au upu na faasoa mai talu ai nei e Peresitene Russell M. Nelson e faatatau i la tatou taulaiga i le vaitau o le Kerisimasi: “E leai se isi mea e sili atu ona taua e mafai ona tatou faia i lenei Kerisimasi nai lo le tausia o la tatou taulaiga i le Faaola ma i le meaalofa o le uiga moni o Lona soifua ia i tatou taitoatasi.”1
Ua faamanatu mai foi ia te au ia Peresitene Ezra Taft Benson (1899–1994), o le sa tofia e fesoasoani i tagata o le Ekalesia i Siamani ina ua mavae le Taua Lona II a le Lalolagi. “E ala i le polokalama o le uelefea musuia a le Atua, sa ia fafagaina moni ai e fiaaai, faamafanafana i e na fetagisi, ma siitia latalata atili atu ai i le lagi i latou uma sa ia feiloai i ai.”2
I ni tausaga mulimuli ane, sa ta‘ua ai e Peresitene Thomas S. Monson (1927–2018) lena mea na tupu i se sauniga o le faapaiaga i Zwickau. I le fonotaga, sa alu atu se tagata matua o le Ekalesia ia te ia ma fai atu: “Faamolemole ta‘u atu ia Peresitene Benson matou te alolofa ia te ia. Sa Ia faasaoina o matou ola: o lo‘u toalua, o la’u fanau, ma le toatele o isi.’ Sa pei o ia o se agelu na auina mai e le Atua e toefuatai moni mai ia i tatou le faamoemoe ma le talitonuga i le lumanai.”3
Uso e ma tuafafine pele, uo pele, e leai se isi taimi e sili atu nai lo le taimi nei, lenei lava vaitau o le Kerisimasi, e mulimuli ai i na faataitaiga ma toe tuuto atu i tatou lava i mataupu faavae na aoao mai e Iesu le Keriso. O le taimi sa‘o lava lea e alofa ai i le Alii lo tatou Atua ma o tatou loto atoa—ma o tatou tuaoi e pei o i tatou lava.
E lelei le manatua “o ia o lē e tuuina atu tupe, e tele mea na te tuuina atu, o lē e tuuina atu le taimi, e tele atu mea na te tuuina atu, ae o ia o lē na te foai atu o ia lava e tuuina atu mea uma. Ia avea lenei mea ma se faamatalaga o a tatou meaalofa o le Kerisimasi.”4
Taulai atu i Lona Soifuaga
O le toatele o le lalolagi e faamanatuinale Kerisimasi, ae i le avea ai ma soo mae mulimuli ia Iesu Keriso, ua tatou osia se feagaiga e “manatua pea o ia” (Mataupu Faavae ma Feagaiga 20:77, 79). I le Kerisimasi, tatou te iloa ai e faapitoa lava le faigofie ona taulai atu i le tamaitiiti o Keriso lea na avea ma o tatou Faaola ma Tupu.
Tatou te taulai atu ia Iesu Keriso a o tatou olioli i Lona soifua mai. Tatou te faamanatuina ma aiga ma uo le “talalelei e olioli tele ai” (Luka 2:10). Tatou te faalogologo i musika paia o loo folasia mai ai Lona afio mai i le lalolagi. Tatou te faitau i le talafaamaumau o tusitusiga paia o Lona soifua mai i le Mataio, Luka, ma le 3 Nifae. Matou te molimau atu o Iesu o le Emanuelu lea na valoia, na fanau mai ia Maria, o le na “aui ia te ia i le ieie, ma faataoto o ia i se faatanoa vao; aua sa leai se avanoa mo i latou i le faletalimalo”(Luka 2:7; tagai foi Mataio 1:23; Isaia 7:14).
Tatou te taulai atu ia Iesu Keriso a o tatou suesue ma talia Ana aoaoga. Tatou te taumafai ia agamalu ma alofa mutimutivale, o e faatupuina le filemu ma loto mama, lotofaamagalo ma faamaoni. E faatelegese ona tatou faamasino atu ma vave ona tatalo ma faamagalo atu. Tatou te taulimaina isi a o tatou mananao ia taulimaina i tatou. Tatou te sailia le “fua lelei” lea e sau mai le aoaoga faavae paia. Tatou te “faia le finagalo” o lo tatou Tama oi le Lagi.5
Tatou te taulai atu ia Iesu Keriso a o tatou mulimuli i Lana faataitaiga atoatoa. Sa Ia aoaoina i tatou i le auala e alolofa atu ai, faasoa atu, ma valaaulia e ala i le auauna atu, usiusitai, tatalo, ositaulaga, ma le tumau.
E pei o Iesu, tatou te sailia avanoa e faamanuia ai fanau a le Atua a o tatou o atu “e agalelei” (Galuega 10:38; tagai foi Mataio 5:16). Tatou te mulimuli i Lana faataitaiga o le usiusitai i le Tama a o tatou toe tautino atu e ola i le afioga a le Atua ma faafou a tatou taumafaiga e tausi Ana poloaiga (tagai Ioane 14:15).6
Tatou te taliaina Lana valaaulia e “o mai ma mulimuli mai ia te au” (Mataio 19:21). Matou te valaaulia o tatou uso a tagatanuu o le lalolagi ia o mai ma vaai, o mai ma fesoasoani, o mai ma auai, e tusa lava pe tatou te feagai ma sauaga, faaosoosoga, po o puapuaga.
Taulai Atu i Ana Meaalofa
O le meaalofa o le uiga o le soifua mai ma le soifuaga o le Faaola ia i tatou e maua ai lona faataunuuga i le Togiola ma le Toetu o Iesu Keriso. Sa gatete le Faaola ona o le tiga, sa Ia afutoto i pu afu uma, sa mafatia o Ia i le tino ma le agaga (tagai Mataupu Faavae ma Feagaiga 19:18). O Lana taulaga mo fanau uma a le Atua ma Lona manumalo i le agasala ma le oti o se meaalofa sili. Ina ia malamalama i lena meaalofa le mafaatauina, e manaomia ona tatou faaaluina se taimi e mafaufau loloto ai i le Togiola a le Faaola ma le uiga ia i tatou taitoatasi.
Ona o le Togiola a Iesu Keriso, ua tatou iloa ai e mafai ona tatou maua le laveai mai le faanoanoa. Tatou te iloa e mafai ona tatou suia, faaleleia, ma faatoilaloina. Ua tatou iloa e mafai ona tatou salamo i a tatou agasala ma faamagaloina. Ma a o tatou faatinoina le faatuatua e salamo ai, ua tatou iloa ua faamalieina manaoga o le faamasinotonu (tagai Alema 34:16).
“O le salamo o se meaalofa ofoofogia,” na saunoa ai Peresitene Nelson. “O se faagasologa e le tatau ona matatau i ai. O se meaalofa mo i tatou ia maua ma le olioli ma ia faaaoga—ia taliaina—i lea aso ma lea aso a o tatou saili atu ia avea atili e faapei o lo tatou Faaola.”7
Ona o le tamaitiiti o Keriso, sa tatou maua ai le meaalofa paia o le Togiola a Iesu Keriso. Ona o lenei meaalofa, ua mafai ai ona tatou maua le alofa tunoa ma le taitaiga. E mafai ona tatou malamalama i puapuaga. E mafai ona tatou maua le filemu, “e le pei ona avatu e le lalolagi” ae pei ona tuuina mai e le Alii ia i tatou (Ioane14:27).
E mafai ona sa‘o mea sese. E mafai ona faamamaina avega. Ona o le taulaga e le iu a Iesu Keriso, ua mafai ai ona tatou maua le faamoemoe ua faasaolotoina.
Ma o le a le mea tatou te faamoemoe i ai?
Na tali Mamona: “Faauta ou te fai atu ia te outou, tou te faamoemoe, e ala i le togiola a Keriso ma le mana o lona toetu, ia faatutu mai outou i le ola faavavau, ma o le pogai ona o lo outou faatuatua ia te ia e tusa ma le folafolaga” (Moronae 7:41).
O le Togiola ma le Toetu o le Faaola ua mafai ai ona avea ma meaalofa silisilio meaalofa uma o le Kerisimasi: o le olae faavavau (tagai Mataupu Faavae ma Feagaiga 6:13; 14:7).
E leitioa a tatou usuina le, “Le lalolagi ia fiafia.”8
O La Tatou Meaalofa ia te Ia
Faatasi ai ma le Aposetolo o Paulo, tatoute tautino atu ai, “Ia faafetaia le Atua molana meaalofa e le mafaamatalaina”(2 Korinito 9:15).
Ae o le a le tatou meaalofa e taui atu ai?
O le meaalofa ua Ia poloai mai ai ia i tatou e le mafai ona faatauina i tupe. O le a tatou le mauaina i se faleoloa i luga o le initoneti. E le mafai ona tatou fai atu i se tasi e faia mo i tatou. E le mafai ona tatou tuua i lalo o le laau Kerisimasi.
O le mea o loo finagalo ai le Faaola mai iai tatou o o tatou loto.
O le a se mea e mafai ona ou avatu ia te Ia,
Mativa e pei o Au nei?
Afai o au o se leoleo mamoe
Ou te aumaia se tamai mamoe,
Pe ana faapea o a‘u o se Tagata Poto
O le a ou faia la‘u vaega,—
Ae o le mea e mafai ona ou avatu ia te Ia,
Tuu atu lo‘u loto.9
Ina ia avatu ia te Ia o tatou loto, e manaomia ona tatou taliaina muamua Lana fesoasoani. O le tuuina atu i le Faaola o o tatou loto atoa o lona uiga o le o mai ia te Ia ma se loto mo ma se agaga salamo o le salamo (tagai i le 3 Nifae 12:19). Ona faatoa mafai lea ona tatou maua atoatoa Lana meaalofa o le Togiola ma agavaa ai mo le meaalofa a le Atua o le ola e faavavau. A o tatou salamo ma le naunautai, tatou te faaalia lo tatou alolofa ma le lotofaafetai mo le meaalofa a le Atua ma mo le taulaga a le Faaola mo i tatou.
Pe a toe faaatoatoa e Iesu Keriso o tatou loto, e atoatoa lo tatou olioli. Ma a tumu lo tatou olioli, tatou te mananao e faasoa atu lenei aafiaga tulaga ese o le alofa, filemu, ma le faamoemoe i fanau uma a le Atua. Tatou te mananao e auauna atu i le Atua ma o tatou uso a tagata ma tamaitai. Ma tatou te mananao e ofo atu i meaalofa aupito sili ona taua ua tuuina mai, “o le areto o le ola” (Ioane 6:35) ma le “vai o le ola” (Ioane 4:10).
A o tatou faia le Faaola ma Lana meaalofa faalelagi ia i tatou o le totonugalemu o o tatou olaga i lenei vaitau o le Kerisimasi ma taimi uma, o le a tatou tautino atu i le lalolagi ma le olioli ma le mamalu o le soifuaga o Keriso “e lei amataina i Peteleema pe faaiuina foi i Kalevaria.”10
O i latou uma o e talia Lana meaalofa alofa o le a le fia ai lavape fia inu. O le a latou maua le malologa mo o latou agaga (tagai Mataio 11:29) ma olioli ma o latou loto ma agaga atoa “ua afiomai le Alii.”11
O lenei vaitau o le Kerisimasi ma le tausaga atoa, tau ina ia tatou maua ma tuuina atu meaalofa silisili o le Kerisimasi.