ITUKUTUKU NI VEILIUTAKI NI IWASEWASE

Nuitaki ira na Mataveiliutaki ni Kuoramu ni Talatala Qase kei na Soqosoqo ni Veivukei

Mai vei Elder Kazuhiko Yamashita

President, Pacific Area Presidency

Ena gauna madaga oqo ni matedewa ni COVID-19, e tomani tikoga na tubu ni Lotu i Jisu Karisito ni Yalododonu Edaidai. Baleta na loloma ni Kalou vei keda, e tuberi keda tiko o Koya mai vua na noda Parofita bula, o Peresitedi Russell M. Nelson.

Na vei vunau kei na ivakavuvuli e sega ni veisau ia au sa raica ni levutale na veisau e rawa ni kauta mai na veivakalougatataki levu ki na Lotu vakakina ki na vuvale. E dua na veisau wale tikoga qo me ra vakaitavi vakalevu ena cakacaka ni veivakabulai na mataveiliutaki ni kuoramu ni talatala qase kei na Soqosoqo ni Veivukei.

Ena dua na notisi ki na iliuliu ni vei iteki kei na tabacakacaka ena ika 6 ni Okotova 2018, na itavi ni cakacaka ni lewenilotu daukaulotu, kei na cakacaka ni valetabu kei na tuva kawa ena tabanalevu, sa lesi vei na mataveiliutaki ni kuoramu ni talatala qase kei na Soqosoqo ni Veivukei. Na mataveiliutaki oqo sa dodonu me ra vakaraica ka veisematitaka na cakacaka ni veiqaravi, ka qaravi ira era vakaleqai tu.¹

Sa dua na veisau totoka! Au sa vakavinavinaka ki na veisau oqo.

Na cava na kena ibalebale ni veisau totoka oqo? Vei au, e kena ibalebale vei au ni o ira na mataveiliutaki ni kuoramu ni italatala qase kei na Soqosoqo ni Veivukei me ra cakacaka kei ira na matavuvale me vakatavulica na ivakavuvuli ni bula rawati ira, ka vakasalataki ira ena veitiki ni cakacaka, qaravi ni ituvatuva vakailavo, se na ibolebole ni bula veimaliwai ni matavuvale.

O ira na Bisopi mera sa rai vakatabakidua ki na vakaukauwataki ni itabagone—o ira na iliuliu tubu cake tiko ni tabatamata tarava—me ra tiko ena salatu ni veiyalayalati.

Na lewenilotu kece e sa gadrevi mera kila na veisau levu oqo. Ia na cava eda rawa ni cakava o keda na lewenilotu?

Cakacaka vata kei ira na mataveiliutaki ni kuoramu ni talatala qase kei na Soqosoqo ni Veivukei.

Meda vakamuria na ivakavuvuli cecere ni Loloma, Veiwasei, ka Veisureti meda sureti ira na tani mera lako mai vei Karisito. Meda cakacaka vata kei ira na daukaulotu. Me tiko vei keda e dua na ivolatara ni curu ena valetabu, ka kunea na yacadra na noda qase eliu ka kauti ira ki na valetabu. Meda kere ivakasala vei ira na kenadau ni valetabu kei na tuvakawa.

Nuitaki ira na mataveiliutaki ni kuoramu ni talatala qase kei na Soqosoqo ni Veivukei.

Na gauna eda sotava kina na ibolebole ni cakacaka, ilavo, veimaliwai ni matavuvale, ira na luveda se bula ni vakamau, sa dodonu meda gole ki vei ira na noda mataveiliutaki ni kuoramu ni talatala qase kei na Soqosoqo ni Veivuke ka kerea na nodra veivuke. Era rawa ni solia vei keda na veivakauqeti, veituberi kei na ivakasala ni ra vakasaqara na veivakauqeti vakalou mai na ivolanikalou, na iVoladusidusi ni Lotu kei na nodra masu e veisiga.

E vakasalataki keda o Sister Jean B. Bingham, Peresitedi Raraba ni Soqosoqo ni Veivukei: “Mai na itekivu kei bisopi, sa gadreva na lewenilotu me vulica me tekivu vata kei ira na mataveiliutaki ni Soqosoqo ni Veivukei kei na kuoramu ni italatala qase.”²

Vakayacora na Veiqaravi Vakagumatua.

Me vaka ena iVoladusidusi ni Lotu, na dauveiqaravi e kena I balebale mo qaravi ira na tani me vaka e cakava na iVakabula (raica na Maciu 20:26–28). oKoya e lomani, vakavulica, masulaki ira, vakacegui, ka vakalougatataki ira na tu wavoliti Koya (raica na Cakacaka 10:38). Ni da tisaipeli ni Jisu Karisito, eda vakasaqara meda veiqaravi vei ira na luve ni Kalou.

Na Turaga e vinakati keda kece na lewenilotu meda ciqoma na veiqaravi vakaoqo. Sa kena inaki oqo, sa lesi o ira na taura tiko na matabete me dauniveiqaravi turaga vei ira kece na matavuvale ni lewenilotu. Na dauniveiqaravi marama sa lesi ki vei ira yadua na marama. Na veilesilesi oqo e vukea me vakadeitaka ni na nanumi ka qaravi kece o ira na lewe ni Lotu (raica na Moronai 6:4).

Na dauveiqaravi e dua na sala bibi me da maroroya kina na vunau ni lomana na Kalou kei na lomana na wekamu (raica na Maciu 22:36–40). Sa dua talega na sala bibi me vukea na kena vakavatukanataki ni cakacaka ni veivakabulai kei na bula vakalou.

O ira na mataveiliutaki ni kuoramu ni italatala qase kei na Soqosoqo ni Veivukei na vukei ira na turaga kei na marama mera vulica mera veiqaravi vakacava vei ira na tani. Era na solia talega na veivakauqeti, veituberi, kei na veitokoni. Era rawa ni vakayacora oqo ena gauna ni veitarogi ni dauniveiqaravi³ (raica na 21.3), ena soqoni ni Sigatabu, kei na veitalanoa yadua.⁴ (iVoladusidusi Raraba 21.0)

Kemuni na taciqu kei na ganequ, meda dauveiqaravi vakagumatua, me vaka ga ni a cakava na iVakabula.

Nuitaki ira na dauniveiqaravi turaga kei na marama.

E vakasalataka o Elder Paul B. Pieper, main a Vitusagavulu Raraba: “Sa dodonu meda nuitaki ira na noda dauniveiqaravi turaga kei na marama ni ra sa kacivi ka lesi mai vua na Kalou me vukei keda. Sa dodonu meda vakabauta ni oya na imatai ni laini e veitaratara mai kina vei keda na Kalou. E sa dodonu meda vakayagataki ira.

“Era rawa ni vakalevutaki ena sala vataga ira na bisopi e rawa ni veivuke me sotavi na gagadre ni lewenilotu. O sa sega ni gadrevi mo gole ki vei bisopi mo vakayagataka na kaukauwa ni matabete oya.”⁵ (Bisopi, Kemuni Beka Sa Vakadrukai? Oqo Na Veika E Rawa Ni Cakava O Ira Na iLiuliu kei na Lewenilotu Mera Veivuke Kina, ika 8 ni Noveba, 2019)

Ni da sa veiqaravi vakaikeda yadua me dauniveiqaravi turaga se marama, eda na rawa ni tauyavutaka na matanitu ni Kalou ena noda vanua.

Tomana tiko na sasaga ni veitokoni ni-Lotu e yavutaki-ivale.

Vei keda yadua kei na noda matavuvale, sa dodonu meda tomana tiko na vulici ni kosipeli e yavutaki-ivale. Ena noda vakayacora tiko na vuli ivolanikalou ena noda vale, ena vakaukauwataki na noda vakabauti Jisu Karisito kei na noda ivakadinadina.

Au vakadinadinataka ni na Tamada Vakalomalagi kei na Luvena lomani o Jisu Karisito e lomani keda ka kilai keda. Erau liutaki keda tiko e na noda parofita bula nikua, o Peresitedi Russell M. Nelson. Au sa vakavinavinaka ki na nona veiliutaki vakasakiti kei na bula vakatisaipeli. Me da nuitaka ka tokoni ira na noda mataveiliutaki ni kuoramu ni italatala qase kei na Soqosoqo ni Veivukei ka cakacaka vata kei ira. Ni da cakava vakakina, na bisopi kei na matabisopi e sa na galala vakalevu sara me vaqaqacotaki ira na noda itabagone ena kosipeli ni Jisu Karisito.

Ena yaca I Jisu Karisito, emeni.