Na Gauna Donu ni Taya

Ena icavacava ni 2020, au sa kunea tiko ni sa dredre vei au meu vakila na yalo ni Siganisucu, au sa mani vakarorogo sara ki na ivola nei John Bytheway, Born This Happy Morning¹, me so na ivurevure ni vakasama. Ena dua na iwase, e wasea kina okoya e dua na ka e sotava ni a volia na nona taya e dua na marama e sa qai sotava walega.

E tukuna o Brother Bytheway ni kila o koya ni sa vakayalia na veivakalougatataki ni wasea vei keda na nona veiqaravi, ia ena rawa ni wasea na reki e vuabale kei na vakacegu e se vakila tikoga ena gauna e nanuma tiko kina na veika a yaco oya. Sa ivakananumi ni na vakalougatataki vakalevu cake na soli-ka mai na ciqoma.

Na reki kei na vakacegu o ya sa ikoya sara ga na ka e yali tiko ena noqu bula. Na Siganisucu o ya, au vakabauta ni yalo oqo ena vukei au me’u vakanamata vakalevu cake vua na noqu iVakabula, ia ena Tiseba, au a lolo me’u iyaya ni cakacaka ena ligana na Tamada Vakalomalagi. Au a vinakata me’u vukea e dua—vakasauri se sega ni namaki—me rawa ni ra kila ni sa dau kauwaitaki ira o Koya, ka vakakina me rawa ni’u vakila na vakacegu kei na reki ni kena gauna. Ni’u tovolea me’u vakamacalataka vei Tamada Vakalomalagi na veika au lolo tiko kina, au a qai tinia na noqu kaya: “O kila, me vakataki John Bytheway, kei na taya”.

Au vakayagataka ena veisiga e tarava me’u vaqara eso na madigi ni veiqaravi, ia, ni’u marautaka tiko e dua na bogi vata kei na dua na noqu itokani lomani, a tukuna okoya ni gadreva tiko na taya vou!

A lutu sobu na gusuqu ka sa vuavuru na yaloqu ni’u rogoca ni vosa vakamatata vei au na Yalotabu: “Sera, oqo na nomuni taya kei na isau ni nomu lolo.”

Au moica lesu na veivosaki ki na taya ka raica ni dina ga ni rau kila na noqu itokani kei na watina ni sa dodonu me vakaisosomitaki na taya, ena vica na siga sa oti, erau vakila ruarua ni sa gadrevi vakatotolo cake na taya vou.

Au tukuna vua na noqu lolo ka’u vakila ni oqo na isaunitaro ni Tamada Vakalomalagi ki na noqu masu. Au a qai kerea ke rawa ni’u sauma na nodrau taya.

A tu galu toka o noqu itokani ena dua na gauna, ka qai deguvacu. Ni oti e vica tale na gauna ni vakasama, a vakamacalataka o koya ni sa sega ni rawa vei rau vakaveiwatini ena gauna oqo me rau sauma na taya vou erau gadreva, ia erau se muria tikoga na veivakauqeti erau a ciqoma ka vakarautaka na taya vou. E qai yaco, na siga donu au a lolo tiko kina me’u sotava e dua na ka, ‘o kila, me vakataki John Bytheway kei na taya’, erau a lolo tiko me rawa ni rau sauma kina na nodrau.

Au rawa ni vakadeitaka vei kemuni ni’u a sega ni namaka tiko na isau ni noqu lolo me sa dina sara! Ia e dua na gauna vinaka kei na veivakurabuitaki na nona sauma na Turaga na noda masu yadua.

Kevaka me mai cava eke na cakamana oqo, e na dua tikoga na gauna taleitaki ni “rogoci Koya” ena noqu bula. Ia, ni oti toka ga e rua na siga ni ratou taura na matavuvale totoka oqo na taya vou, a qiriti au mai na noqu itokani. Au a sega ni taura rawa na nona qiri, kau taleitaka, baleta ni kena ibalebale ni se tiko ga vei au na nona itukutuku ena noqu talevoni ka vakamacalataka tiko ena itekivu ni siga o ya, ni draiva voli vata kei ira na luvena lalai, ena uca bi, e dua na motoka e sega ni tiko na cina ni bereki ka veisugusugu yani vakarerevaki ki na gaunisala eliu ka mai vakavuna me butuka okoya vakaukauwa na bereki. Eratou mai kele sara vakavinaka, ka kila sara o koya ni kevaka se tiko beka na taya makawa, eratou na coqa yani na motoka e liu. E kaya o koya ni dua na cakamana ka mai vakacavara na kaci ena, “Vinaka vakalevu”.

Me’u tokaruataka na veika au rogoca ni kaya o Sisita Joy D. Jones, “Au na sega vakadua ni taura na lagilagi ni nona loloma totoka, uasivi sara na Kalou, ia sa dua na ka na noqu vakavinavinaka ni vakatara o Koya me’u dua na tiki lailai ni Nona ituvatuva!”²

E kaya o Baraca Bytheway, “Nikua e tiko e dua e tautuba, e dua voleka, dua na itokani, dua na lewe ni tabanalevu, ka tovolea tiko me toso ki liu ena taya ka ca sara. Sa rawa ni ratou kacabote ena dua ga na gauna. Nodra taya e rawa ni vakasama, vakayalo se vakayago, se [me vaka au sa raica rawa] era rawa ni taya dina.”³

Me da kunea ka veivukei vakaikeda, sa rawa ni da vakarorogo vei Peresitedi Dallin H. Oaks ena veivakananumi ni, “Na ligada sa Ligana ni da sa rogoci Koya ka vakila ni da vakauqeti me da vukea e dua vei ira na Luvena.” E tukuna vei keda o koya: “Ni ko ciqoma e dua na veivakauqeti, cakacakataka, se cava ga na kena matalia se na kena o vakila ni o sega ni rawata ena nomu vakamuria. Cakacakataka. E tiko e dua na vuna. O na sega beka ni kila na vuna, ia ena yaco mai vei iko kei ira tale eso na veivakalougatataki kevaka o rogoci Koya ka muria na Nona veidusimaki.”⁴