“ʻUluaki Tā Mai Kiate Au,” Liahona, Māʻasi 2022.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní: Houʻeiki Fafine ʻo e Tuí
ʻUluaki Tā Mai Kiate Au
ʻOku ou fiefia naʻe ʻikai mole meiate au ʻa e faingamālie ke u tokoni ki ha fefine naʻá ne fie maʻu au pea ne u fie maʻu foki ia.
ʻI heʻeku kei hoko ko ha faʻē kei talavou mo ʻeku fuofua pēpeé, naʻe kei ako ʻunivēsiti hoku husepānití. Naʻá ma fakatou ngāue fakataimi ke feau e ngaahi fiemaʻú.
ʻI heʻeku hanganaki atu ki ha ʻaho mālōlō ʻe taha mei he ngāué, ne u palani ke mamata ʻi ha foʻi faiva motuʻa ʻi he televīsoné. Naʻe kimuʻa ʻeni ia he ngaahi faiva DVD mo e faiva ʻoku hulu mai he netí.
ʻE kamata e faivá ʻi ha taimi lelei ʻaupito—10:00 a.m.—ʻa ia ko e taimi ia ʻe mohe ai homa fohá. Naʻe ʻeti ai ʻa Keli Kalānite, ko e taha ʻo e kau ʻeti faiva ʻAmelika ʻoku ou saiʻia taha aí.
ʻI he pō kimuʻa he ʻaho mālōlō ne u hanganaki atu ki aí, naʻe tā mai e palesiteni Fineʻofa ʻo e uōtí. Naʻe ʻi ai ha fefine ʻi homau uōtí naʻe kiʻi pākālava pea naʻe fie maʻu ha taha ke ne tokangaʻi ia kae ʻoua kuo foki mai hono fohá mei he ngāué.
Naʻe pehē ʻe he palesiteni ʻo e Fineʻofá, “Ne u mei fai pē ʻeni ʻe au, ka ʻe ʻi ai ha kau ʻaʻahi mai ia kiate au.” Naʻá ne pehē ne ʻikai ha toe taha ke kole ki ai peá ne fokotuʻu mai ke ne tokangaʻi homa fohá ka u tokangaʻi ʻa e fineʻeikí. Naʻá ku loto ki ai.
ʻI he pongipongi hono hokó, ne u tukuʻi ki ai homa fohá peá u ʻalu ʻo ʻaʻahi ki he fineʻofá. Ko hono hingoá ko Luʻisa, pea naʻá ku ongoʻi fakafokifā ha ʻofa kiate ia. Naʻá ne matuʻotuʻa feʻunga ke hoko ko ʻeku kuifefiné, ʻa ia naʻe toki mālōloó.
Ne u tokoni kia Luʻisa mo teuteuʻi ʻene meʻatokoni pongipongí. Naʻá ne tangutu lelei atu ki ha sea peá ne fakamoʻui ʻa e televīsoné. Ne ʻikai fuoloa kuo hoko e 10:00 a.m. ʻI heʻene fetongitongi e ngaahi sēnoló ʻaki e remote, naʻá ne pehē mai, “ʻOku ʻikai ha meʻa ia ke ta sio ai he televīsoné.”
Naʻá ku kiʻi momou peá u pehē ange leva, “ʻOku ʻi ai ha foʻi faiva Keli Kalānite ʻi he sēnolo 11.”
Naʻá ne fakapapauʻi mai, “Ko hoʻo moʻoni? ʻOku ou saiʻia he ngaahi faiva ʻa Keli Kalānité!”
Naʻá ma sio he foʻi faivá pea ne ma mālieʻia ai. Hili iá, naʻá ne vahevahe mai ha ngaahi meʻa fekauʻaki mo ʻene moʻuí ʻi heʻene kei ʻi hoku taʻu motuʻá. Naʻá ne vahevahe mai fekauʻaki mo hono fohá peá u talanoa ange ki ai hoku fohá. Naʻá ne talanoa fekauʻaki mo e Siasí pea mo ʻene ongoʻi ʻa e ʻikai lava ki aí.
ʻI he foki mai hono fohá, ne u palōmesi ange te u toe haʻu pē. Naʻá ku talaange ki he palesiteni Fineʻofá ke ʻuluaki tā mai kiate au kapau ʻe fie maʻu ʻe Luʻisa ha taha.
ʻI he uike ʻe ua hono hokó, naʻe toe pākālava pē ʻa Luʻisa peá ne siʻi mālōlō kimuʻa peá u maʻu ha faingamālie ke toe sio kiate iá. Ne ma feohi ʻi ha houa pē ʻe hiva mo sio ʻi ha foʻi faiva ʻe taha, ka naʻá ne hoko ko ha kaungāmeʻa mamae. ʻOku ou faʻa fakakaukau kiate ia.
ʻOku ou fakamālō naʻe ʻikai mole hoku faingamālie ke tokoniʻi ha fefine naʻá ne fie maʻu au—pea mo u fie maʻu ia, neongo naʻe ʻikai ke u fakatokangaʻi.