“ʻOku ou Fili ke Fanongo Kiate Ia,” Liahona, Māʻasi 2022.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní: Houʻeiki Fafine ʻo e Tuí
ʻOku ou Fili ke Fanongo Kiate Ia
ʻI he taimi naʻe lave ai ha fefine ki ha foʻi keke lolotonga ʻene fakamoʻoní, naʻá ku hanga hake pea kamata ke u tokanga.
Naʻe fāʻeleʻi au ʻi he Siasí, ko ia ne u ʻalu ki he ngaahi ʻekitivitī ʻa e Palaimelí mo e toʻu tupú. Naʻá ku saiʻia ʻi he Palaimelí koeʻuhí ko e ngaahi hivá mo e ngaahi lēsoní.
Ka ʻi hoku taʻu hongofulu tupú, naʻe kamata ke u hē atu hili ʻeku hiki ki ha uooti foʻoú. Naʻá ku ʻalu ki he ngaahi ʻekitivitī ʻa e toʻu tupú ʻi ha ngaahi uike lahi, ka naʻá ku kei mā pē ʻo ʻikai ke faʻa lahi ha meʻa te u kau ki ai. Naʻe ʻikai ke u manako ʻi he lotú he Sāpaté, ka naʻá ku faʻa ʻalu pē he taimi ʻe niʻihi. Naʻá ku fakatokangaʻi naʻe ʻikai ke u ului moʻoni ki he ongoongoleleí mo hono ngaahi akonakí. Naʻe ʻikai ke ʻi ai haʻaku fakamoʻoni.
Hangē ko e angamahení, lolotonga ha houalotu ʻaukai mo fakamoʻoni ʻe taha, naʻe takai pē ʻeku fakakaukaú. Naʻe ʻikai ke u fuʻu fanongo ki hono fakahoko ʻe he kāingalotu ʻo e uōtí ʻenau fakamoʻoní, ka naʻá ku lea ʻēmeni pē ʻi he fakaʻosinga ʻo e fakamoʻoni takitaha. Naʻe ʻalu atu leva ha fefine ki he tuʻunga malangá ʻo kamata fakahoko ʻene fakamoʻoní. ʻI he taimi naʻá ne lave ai ki ha foʻi keké, naʻá ku hanga hake pea kamata ke u tokanga.
Naʻá ne pehē, “ʻOku ou fakataufolofola maʻu pē ki he Tamai Hēvaní, ʻo aʻu pē ki he taimi ʻoku ou taʻo ai ha foʻi keké. ʻOku ou fakahoko ha kiʻi lotu ke tupu lelei e foʻi keké pea moho fakaʻofoʻofa. ʻOku ou ʻilo ʻokú Ne tali ʻetau ngaahi lotú.
Naʻe ʻikai ke u fuʻu fakakaukau ki he fakamoʻoni ko iá kae ʻoua kuo ʻikai lava ʻemau kaá ʻo moʻui ʻi he taimi naʻe fie maʻu ai ke mau ʻalu ki he falekoloá ke kumi mai ha meʻakai. Naʻá ku manatuʻi ʻi he momeniti ko iá e ngaahi lea ʻa e fefiné. Ko ia, naʻá ku foki ki hoku loki mohé ʻo kole ki he ʻOtuá ke tokoniʻi kimautolu ke moʻui ʻa e kaá. Naʻá ku tūʻulutui hifo ʻo lotu. ʻI heʻene ʻosí, ne u toʻo e kī ʻo e kaá ʻo fakamoʻui ia. Pea hoko mai leva e tali ki heʻeku lotú—ʻa e ongo ʻo e kaá ʻoku moʻuí.
Koeʻuhí ko e tali ko ia ki ha kiʻi lotu faingofuá, naʻá ku tafoki mei ha hala naʻá ku mei hē aí ki ha hala kuó ne tokoniʻi au ke u maʻu ha fakamoʻoni fakataautaha mo ului kakato ki he ongoongoleleí. Naʻe ope atu e ʻuhinga ʻo e foʻi hiva Palaimeli ʻoku ou manako taha ai ko e, “ʻOku Ongo ʻa e ʻOfá,”1 ʻi ha ngaahi lea pē ki ha foʻi hiva. Ne nau hoko ko ha ngaahi ongo ʻoku ou maʻu moʻoni.
ʻOku ou lotua ʻa e meʻa kotoa pē he taimí ni. Pea neongo ʻoku ʻikai hoko maʻu pē ʻa e talí pe taimí ko e meʻa ne u fakaʻamu ki aí, ka ʻoku ou kei fili pē ke fanongo kiate Ia ʻi heʻeku manatu ki he ngaahi lea ʻa Nīfaí: “Kae vakai, ʻoku ou pehē kiate kimoutolu kuo pau ke mou lotu maʻu ai pē, pea ʻoua naʻa fiu” (2 Nīfai 32:9).