Ang Unang Tugon ni Jesukristo

Imahe

Si Jesukristo didto sa Getsemani

Christ in Gethsemane [Si Kristo sa Getsemani], ni Michael T. Malm

Ang akong trabaho isip usa ka propesor kasagaran nagkinahanglan nga ako mopahigayon og pagsiksik didto sa Jerusalem bahin sa Biblia ug sa mga Kasulatan nga nakit-an sulod sa mga kuweba dapit sa Patayng Dagat [Dead Sea Scrolls]. Ang akong asawa, si Camille, ug ako napanalanginan nga makalawig sa daghang mga sakayan didto sa Dagat sa Galilea. Among gipahimuslan kini nga mga oportunidad sa pagpamalandong sa daghang kasulatan nga naghisgot bahin sa kadagatan.

Sama pananglit, si Miqueas miingon nga si Jehova “[mo]salibay [sa atong] mga sala ngadto sa kahiladman sa dagat” (Miqueas 7:19)—dili sa pipila lang niini o porsiyon niini apan tanan niini. Ang “tanan” nagpasabot og pagpasaylo sa hingpit. Ang “kahiladman” nagpasabot sa labing lawom nga bahin sa tubig, diin ang atong mga sala mahanaw sa hangtoran.

Magpasalamat kita, si Jehova dili mosalibay sa atong mga sala ngadto sa baybayon, diin makita sa uban. Labot pa, ang tubig sa dagat magsilbi nga pangpalimpyo. Pinaagi sa kaandam ni Jehova sa pagpas-an sa atong mga silot (tan-awa sa Isaias 53:11), ang atong mga sala mahanaw na. Pinaagi sa atong paghinulsol, si Elder Ulisses Soares sa Korum sa Napulog Duha ka Apostoles nagpamatuod, gipasaligan kita og dapit sa Iyang kiliran (tan-awa sa pahina 4).

Ang ubang mga propeta sa Daang Tugon nagpakita og daghang maagnihon ug madayganon nga mga tudling mahitungod sa Manluluwas. Tungod kini kay ang Daang Tugon usa ka teksto nga nakapokus diha kang Jesukristo. Kini, sa tinuod, ang Unang Tugon ni Jesukristo.

Ako naglaom nga kini nga kamatuoran molanog diha kaninyo karong tuiga samtang magtuon kamo sa Daang Tugon, ug maglaom ako nga ang akong gamay nga kontribusyon niini nga bulan sa Liahona (tan-awa sa pahina 40) molig-on sa inyong pagpamatuod niana nga kamatuoran.

Matinuoron,

Donald W. Parry

Propesor, Unibersidad sa Brigham Young