Digital Lamang: Dali, Sunod Kanako
Pag-ila sa mga Sugo isip mga Panalangin
Kon tinud-anay kitang nakasabot sa mga sugo, atong makita nga kini mga ebidensiya sa dakong gugma nga ang Langitnong Amahan ug si Jesukristo aduna alang kanato.
Atol sa kataposang katunga sa akong mga tuig sa kolehiyo, nagtrabaho ko isip usa ka producer alang sa akong pasundayag sa university radio. Makalingaw kadto nga trabaho nga may daghang kagawasan sa pagmugna, apan dihay daghan usab nga mga lagda. Ang akong kinatibuk-ang deskripsiyon sa trabaho mao ang pag-produce og radio content; bisan kon kini morag dali ra nga sabton, ang mga detalye sa trabaho dinokomentohan sa usa ka komprehensibo, daghang mga pahina nga dokumento. Naglakip kini og mga lagda mahitungod sa tukmang paagi sa pag-email, pagpangandam sa interbyo, mga audio cut, ug tanang matang sa mga butang nga sukad wala pa nako madunggi.
Makahahadlok kadto sa sinugdanan samtang naninguha ko sa paghinumdom sa tanang detalye. Apan mapasalamaton ako niadto nga lista—nakatabang kini nako nga mahimong mas maayo nga producer. Dili kadto usa ka lista nga nagdili kanako sa paggamit sa akong kamamugnaon; hinoon, nakatabang kini nako sa paghimo sa akong mga ideya ngadto sa usa ka tinuod, nahuman na nga produkto. Hut-ong kadto sa mga lagda, hinimo sa mga tawo kinsa mas nasayod sa trabaho kay kanako.
Gusto kong maghunahuna sa mga sugo sa samang paagi. Ang duha ka mahinungdanong sugo—ang paghigugma sa Dios ug ang paghigugma sa atong isigkatawo sama sa atong kaugalingon (tan-awa sa Mateo 22:35–40)—kabahin sa atong kinatibuk-ang deskripsiyon sa trabaho isip katawhan sa kalibotan. Ang ubang mga sugo mas detalyado nga mga instruksiyon kon unsaon sa pag-angkon niadto nga mga tumong sa epektibong paagi, gilatid sa usa ka mahigugmaong Amahan sa Langit kinsa hingpit nga nasayod sa buhat.
Ang mga Sugo mga Panalangin
Kon kita tinud-anay nga nakasabot sa mga sugo, ato kining makita isip mga panalangin. Mga gidugang kini nga mga instruksiyon nga ang Langitnong Amahan, uban sa Iyang hingpit nga panglantaw, naghatag kanato aron pagtabang kanato sa pagbalik ngadto Kaniya. Ingon sa gipasabot ni Presidente Russell M. Nelson, “Tungod kay ang Amahan ug ang Anak nahigugma kanato uban sa walay kinutoban, hingpit nga gugma ug tungod kay nasayod Sila nga kita dili makakita sa tanan nga Ilang nakita, Sila mihatag kanato og mga balaod nga mogiya ug mopanalipod kanato.” 1
Si Sister Carole M. Stephens, kanhi Unang Magtatambag sa Kinatibuk-ang Kapangulohan sa Relief Society, mihulagway niini nga punto sa dihang miasoy siya sa istorya sa iyang lagsik nga tres anyos nga apo nga babaye, si Chloe, kinsa dili gayod makombinsir nga itaod ang iyang bakos sa lingkoranan [seat belt] sa sakyanan. Bisan sa bug-os nga pagsulay sa pag-awhag kaniya, si Chloe padayon sa pagtangtang sa iyang bakos ug midumili sa pagpuyo og tarong aron luwas ra sa iyang lingkoranan.
Sa kataposan, human mipasabot sa iyang apo nga babaye nga ang bakos sa lingkoran mao ang iyang kaugalingon nga kahilwasan, mikislap ang nawong ni Chloe, ug siya miingon, “Lola, gusto kang magseat belt ko tungod kay gihigugma ko nimo!” 2 Sa kataposan nakasabot ra si Chloe, ang mga lagda kasagaran magagikan sa usa ka lugar sa gugma. Mao kini ang nahitabo sa mga sugo sa Dios.
Ang mga sugo ebidensiya sa dakong gugma nga ang Langitnong Amahan ug si Jesukristo aduna alang kanato. Kini usab oportunidad alang kanato sa pagpakita sa atong gugma ug pagmasulundon ngadto Kanila. “Kon nahigugma kamo kanako, tumana ninyo ang akong mga sugo” (Juan 14:15) usa ka kasulatan nga kanunay natong madunggan, ug ang gipasabot niini makatandog sa pagbati. Sigon sa gitudlo ni Elder Jeffrey R. Holland sa Korum sa Napulog Duha ka Apostoles, “Ang kinatas-ang kinaiya sa gugma mao kanunay ang pagkamaun[o]ngon.” 3 Makahunahuna lamang ako sa gugma nga gibati sa Langitnong Amahan ug ni Jesukristo kon maninguha kita sa pagsunod sa Ilang mga instruksiyon ug magpuyo sa paagi nga motugot kanato sa pagbalik ngadto sa Ilang presensiya sa umaabot.
Ang Pagpanaw sa Unahan
Wala gayod kini magpasabot nga ang pagsunod sa mga sugo sa Dios masayon. Bisan og nakasabot kita sa gugma sa Dios ug ang mga rason luyo sa mga sugo, ang uban niini mahimong lisod gihapon sundon (tan-awa sa 2 Nephi 2:11; Mosiah 3:19).
Namulong si Moises mahitungod niini human gyod dayon niya gidala ang Napulo ka Sugo sa pagkanaog gikan sa Bukid sa Sinai, misulti ngadto sa mga Israelita nga “mianhi ang Dios aron pagsulay kaninyo” (Exodo 20:20). Ang sulayi nagpasabot sa pagpaningkamot o sa pagpaninguha. Ingon sa kamahigugmaon niining mga sugo, kini usab mga mahinungdanon nga bahin sa plano sa Langitnong Amahan alang sa Iyang mga anak sa “[pag]sulay kanila … , sa pagsuta kon sila mobuhat ba sa tanan nga mga butang bisan unsa ang isugo sa Ginoo nga ilang Dios ngadto kanila” (Abraham 3:25). Ang mga sugo naghatag kanato og oportunidad sa pagtuyo og gamit sa atong kabubut-on nga, sigon sa gitudlo ni Presidente Nelson, “mopili nga mobalik Kaniya, andam, takos, natugahan, nabugkos, ug matinud-anon sa mga pakigsaad nga gihimo diha sa balaang mga templo.” 4
Kon gibati nato nga adunay daghang balansehon ug buhaton, makahinumdom kita nga ang kalibotan, dili ang ebanghelyo, mao ang nagmugna sa kakomplikado sa atong kinabuhi. Si Elder Gary E. Stevenson sa Korum sa Napulog Duha ka Apostoles nagtudlo:
“Ginaingon nga ang ebanghelyo ni Jesukristo ‘yano ang katahom ug matahom ang kayano.’ Ang kalibotan dili. Kini komplikado, lisod, ug puno sa kasamok ug kagubot. Kita mapanalanginan kon kita mag-amping nga dili motugot sa kakomplikado, nga komon kaayo sa kalibotan, nga mosulod sa paagi sa atong pagdawat ug pagtuman sa ebanghelyo. …
“… Hinaot nga atong ipabiling yano ang ebanghelyo.” 5
Atol niadto nga mga panahon sa dihang gibati nato nga nabug-atan sa mga hangyo sa kinabuhi, makatabang ang paghinumdom sa mga sugo sa labing yano nga porma niini: Higugmaa ang Dios. Higugmaa ang imong silingan. Higugmaa ang imong kaugalingon. Ang tanang ubang sugo sa Dios kanato sumpay niining kinauyokan sa mga sugo, ug sumpay sa Iyang gugma alang kanato.