“Nagbarog isip mga Saksi sa Iyang Pagluwas,” Liahona, Abr. 2022.
Mga Baroganan sa Pagpangalagad
Nagbarog isip mga Saksi sa Iyang Pagluwas
Ang Manluluwas nagpakita sa Iyang kaandam sa pagtabang sa Iyang katawhan sa mga paagi nga dagko ug yano.
Sa dihang si Lourdes Cutti de Alvarez sa Uruguay nahibalo nga may duha siya ka tumor sa utok, iyang giingnan iyang higala nga si Marcela Suarez Albano nga maospital siya alang sa operasyon ug magkinahanglan og taas nga pagpaayo human sa operasyon. Nabalaka siya kon unsaon pagsugakod sa iyang pamilya nga may upat ka anak niining makaugtas nga sitwasyon.
Milingkod si Marcela uban sa iyang 16 anyos nga anak nga babaye, si Rocio, sa pagpamalandong og mga paagi nga makapangalagad ngadto kang Lourdes. Si Marcela mismo bag-ohay lang pod naospital. Nahinumdom siya sa pagbati nga nag-inusara ug may kalahian gyod sa dihang gibisita siya nila ni Lourdes ug sa mga sister sa iyang ward. Mao nga si Marcela ug si Rocio mitabang sa pag-organisar og grupo sa pag-text sa mga sister sa ward. Nagtugot kini kanila nga sayon ra pag-eskedyul og pagkaon alang sa pamilya. Ang pag-andam og mga panihapon nakapasayon sa alantuson ni Lourdes. Ang mga sister usab kanunay magpadala og kasulatan o mensahe aron malig-on ang iyang espiritu ug pagpakita sa ilang gugma alang kaniya.
Ang anak nga babaye ni Lourdes, si Ana Clara, mipakigbahin: “Lisod kon wala si Mama sa balay. Apan ang Langitnong Amahan mipadala og tabang kanako ug sa akong pamilya. Usa kadto ka dakong pagpakita sa Iyang gugma. Ang gibuhat ni Marcela sa paghiusa sa mga miyembro sa ward aron sa pagtabang kanamo makapanghingangha. Matag higayon nga makakita kami og pamilya nga moabot, mibati kami, pinaagi kanila, sa tiunay nga gugma ni Kristo. Mipakigbahin sila og mga pulong sa pag-awhag, nangatawa uban kanamo, ug mitabang sa pagpalig-on kanamo. Ang among Langitnong Amahan sa walay pagduda diha uban kanamo sa matag higayon. Mabati namo kini pinaagi sa mga pahiyom nga among makita sa mga nawong niadtong nangabot sa pagtabang kanamo.”
Usa ka tuig human niadto, si Marcela kinahanglan nga maospital tungod sa usa ka problema sa kasingkasing. Si Lourdes ug si Ana Clara nahinumdom giunsa sa Ginoo paghupay ug paglig-on kanila pinaagi ni Marcela ug ni Rocio ug matinguhaon sa pagpakita sa ilang gugma ug pasalamat agig balos.
Ang Dios Nagdapit Kanato sa Pagluwas sa Uban
Ang Ginoo andam nga moduaw sa Iyang katawhan diha sa ilang kasakit (tan-awa sa Mosiah 24:14). Siya naghatag kanato og mga oportunidad sa pag-apil sa pagluwas sa Iyang mga anak nga nanginahanglan. Siya nagpakita niini sa makadaghan diha sa basahon sa Exodo. Ang Ginoo migamit kang Moises sa pagtabang nga maluwas ang mga Israelita gikan sa pagpakaulipon didto sa Ehipto ug pagtabang kanila nga mabuhi sa kamingawan (tan-awa sa Exodo 12–16). Nagkinahanglan kini og hugot nga pagtuo alang ni Moises sa pag-isa sa iyang kamot, apan ang Ginoo ang “[mi]pasibog sa dagat” (Exodo 14:21).
Mga Baroganan nga Hunahunaon
Samtang maghunahuna sa inyong mga oportunidad ug mga buluhaton sa pagpangalagad sa uban, hunahunaa kining mga baroganan nga gipakita diha niini nga mga istorya:
-
Kon mobuhat kita inubanan sa hugot nga pagtuo sa pagtabang sa uban, sama ni Marcela ug Moises, ang Ginoo makapakita sa Iyang gahom sa ilang kinabuhi.
-
Ang pagtabang ngadto sa usa ka higala nga nanginahanglan dili kinahanglan nga dako nga butang (tan-awa sa Alma 37:6). Usa ka init nga pagkaon o bisan usa ka yano nga mensahe sa text makatabang sa tawo nga mobati nga gihigugma ug giamuma.
-
Ang batan-ong tigpangalagad nga mga kaigsoonan makatabang sa pagluwas niadtong anaa sa ilang palibot gikan sa mga kabalaka ug pag-antos. Ayaw kalimot sa paglakip kanila kon kamo mamalandong og mga paagi sa pagtabang.
-
Kon kita mopakigbahin kon giunsa sa Ginoo pagluwas kanato sa atong kaugalingong kinabuhi, kita mobarog ingon nga mga saksi sa Iyang gugma ug kaandam sa pagluwas sa Iyang katawhan (tan-awa sa Mosiah 24:13–14). Pangita og natural nga mga paagi sa pagpakigbahin diha sa pagpakigsulti, sa social media, o sa mensahe sa text.
-
Kita dili kinahanglan nga magpaabot sa Ginoo aron magiyahan. Kon kita buot nga motabang, mamahimo kita nga paagi sa paghimo og daghang kaayohan. (Tan-awa sa Doktrina ug mga Pakigsaad 11:8; 58:27–28.)
Unsa ang Atong Mabuhat?
Ang Manluluwas nagpakita, sa makadaghan, sa Iyang kaandam sa pagluwas sa Iyang katawhan sa pakigsaad gikan sa pisikal ug espiritwal nga pag-antos sa mga paagi nga makapatingala ug yano. Iya kining gibuhat aron makabarog kita isip mga saksi ngadto sa uban. Unsaon nimo pagpakigbahin sa unsay Iyang nahimo alang kanimo?