Digital Lamang
Multiple Sclerosis ug ang Akong Pagpamatuod kang Jesukristo
Ang tagsulat nagpuyo sa Washington, USA.
Naglaom ko og usa ka milagro gikan sa Manluluwas. Akong nadiskobrehan nga nakadawat na ko og duha ka milagro.
Usa ko ka tawo nga malingaw gyod og golf sulod sa daghang tuig. Pipila ka tuig na ang milabay, ang paglakawlakaw sa golf course nahimong mahagiton. Mipadayon kog dula og golf, apan napugos ko sa pagsakay og gamayng sakyanan sa golf. Sa dihang nagkagrabe ang akong mga hagit, nakahukom ko nga panahon na aron makigkita ko sa doktor. Human sa pila ka medikal nga mga test niadtong 2017, sa kataposan na dayagnos ko og primary progressive multiple sclerosis, usa ka sakit nga autoimmune nga makaapekto sa utok ug spinal cord.
Sukad niadto nga dayagnos, nagsige na ko og pamalandong sa mga milagro sa Manluluwas, ilabi na sa Iyang mga milagro sa pagtambal. Naghunahuna ko, nagkinahanglan ko og usa sa Iyang mga milagro. Ako adunay hugot nga pagtuo, nganong dili man ko makaangkon og usa ka milagro nga mamaayo sa akong sakit?
Pagkaplag og Espiritwal nga Pagkaayo
Pinaagi sa pagtuon sa makaayo nga mga milagro sa Manluluwas, miabot ko sa dakong pagsabot ug pasalamat alang sa usa niini sa partikular.
Sa pagkasayod sa pagpauli ni Jesus sa Capernaum, nanugok ang daghan kaayong mga tawo, tingali tungod kay nakadungog sila sa Iyang miagi nga pagpang-ayo. Upat ka tawo miyayong og usa ka tawo nga masakiton nga paralitiko nga naghigda sa higdaanan aron makakita sa Manluluwas. Daghan kaayo ang mga tawo nga dili sila makasulod sa pultahan ug dayon ngadto sa lawak aron makakita Kaniya. Busa unsay ilang gihimo? Miadto sila sa atop, giukab nila ang usa ka bahin niini, ug ilang gitunton ang tawo sa pisi. (Tan-awa sa Marcos 2:1–4.) Unsa ka talagsaon ang mga higala niini nga tawo.
Nakita ni Jesus ang ilang hugot nga pagtuo ug miingon, “Anak, gipasaylo na ang imong mga sala” (Marcos 2:5).
Sa pagkadungog niini, ang mga escriba miakusar sa Manluluwas sa sala nga pagpasipala, miingon, “Walay tawo makapasaylog sala, gawas sa Dios lamang?” (Marcos 2:7).
Mitubag si Kristo, “Hain may mas sayon: ang pag-ingon ba ngadto sa paralitiko, Ang imong mga sala gipasaylo na; o ang pag-ingon, Bangon, dad-a ang imong gihigdaan, ug lakaw?” (Marcos 2:9). Aron sila makaila nga Siya usab adunay gahom sa pagpasaylog mga sala isip ang Anak sa Dios ug Manluluwas sa kalibotan, Siya dayon miayo sa tawo sa iyang pagkaparalitiko (tan-awa sa Marcos 2:10–11).
Naghunahuna ko mahitungod niini nga kasinatian sa makadaghan. Dinhi kini nga tawo gidala ngadto sa Manluluwas aron tingali maayo sa iyang pisikal nga sakit, ug unsa may unang buhaton sa Manluluwas? Siya namahayag sa tawo nga napasaylo na sa iyang mga sala. Siya nag-ayo kaniya sa espirituhanong paagi. Samtang wala kita mahibalo unsa nga mga sala kini nga tawo nagkinahanglan og pasaylo ni unsa ang pag-antos niini nga tawo tungod sa iyang mga sala batok sa iyang sakit, akong nakita nga ang una nga pagtambal nga gihimo sa Manluluwas niini nga tawo mao ang pag-ayo kaniya sa espiritwal nga paagi.
Sa akong pagpamalandong niini, nakadawat ko sa mosunod nga impresyon: Nadawat na nako ang usa sa mga milagro ni Jesukristo—ang makaayo nga milagro nga nahimong posible pinaagi sa Iyang Pag-ula. Kitang tanan adunay espirituhanong sakit. Kitang tanan nagkinahanglan og espiritwal nga pagpaayo. Ang Manluluwas nakapahigayon sa milagro sa Iyang Pag-ula alang kanatong tanan aron kita makahinulsol ug mobalik ngadto sa presensiya sa Langitnong Amahan. Nagkinahanglan lamang kita sa hugot nga pagtuo aron makadawat sa mga panalangin nga Iyang giandam kanatong tanan. Kining espiritwal nga milagro labing mahinungdanon kay sa bisan unsang milagro sa pisikal nga pagkaayo nga sukad nahimo.
Pagbati og Paglaom sa Pagkabanhaw
Gusto gihapon kong mamaayo ingon man sa pisikal nga paagi.
Ug nakaamgo ako nga ang Langitnong Amahan ug ang Manluluwas miatiman usab niana. Tungod sa pagkamatay ug Pagkabanhaw ni Kristo, nasayod ako nga ako usab mabanhaw ug makadawat og mahangturon, nahingpit nga lawas. Mamaayo ako sa bisan unsang sakit nga nagtakboy kanako karon. Samtang kana nga milagro gitakda nga mahitabo sa usa ka panahon sa umaabot ug maoy usa ka butang nga gilaoman, sa akong opinyon dili kini usa ka mas ubos nga milagro kay sa usa ka kalit nga pisikal nga pagkaayo.
Niining mortal nga kinabuhi, kita naglakaw subay sa pagtuo, wala masayod unsay naa sa unahan. Mapasalamaton kaayo ko sa akong hugot nga pagtuo ug kahibalo nga si Jesus mao ang Kristo, ang Anak sa buhing Dios, ang Manluluwas sa kalibotan. Iya tang gihatagan og ingon ka dagkong mga gasa. Gibati ko ang Iyang gugma sa makadaghan. Ako nag-ampo nga kamo usab mobati sa Iyang gugma.
Unta ang atong hugot nga pagtuo ug kahibalo Kaniya kanunay nga magpabiling lig-on.