Mga Young Adult
“Wala Ako Makahibalo sa Kahulogan sa Tanan nga Butang,” ug OK ra Kana
Kon wala kita makahibalo sa tanan nga tubag, ang hugot nga pagtuo mao ang tubag.
Dili gayod ako makalimot sa usa nako ka leksiyon uban sa usa ka batan-on nga babaye sa akong misyon.
Siya kanunay nga nangayo og pisikal o makita nga ebidensiya nga ang Basahon ni Mormon tinuod. Ug ako naglingkod didto, dili sigurado kon unsaon sa pagtubag sa iyang mga pangutana ug mga akusasyon. Usa ako ka batan-on, puno sa kadasig nga misyonaryo, ug ang tanan gayod nga akong nahibaloan mao nga tinuod ang Basahon ni Mormon. Mibati ko og kadismaya tungod kay wala ako makahibalo sa tanang tubag sa iyang mga pangutana. Apan ako nakaamgo, dili siguro kaayo kadto problema kon duna pa koy pisikal nga ebidensiya nga makapamatuod nga ang Basahon ni Mormon tinuod. Ang pruweba dili mohatag niya og hugot nga pagtuo.
Si Elder D. Todd Christofferson sa Korum sa Napulog Duha ka Apostoles mitudlo: “Ang hugot nga pagtuo dili moab[o]t pinaagi sa pagtuon sa karaan nga mga teksto isip lunlon nga akademik nga paningkamot. Dili kini moab[o]t gikan sa arkiyolohiyang mga pagsusi ug mga pagdiskobre. Dili kini moab[o]t gikan sa seyintipikong mga eksperimento. Gani dili kini moab[o]t gikan sa pagsaksi og mga milagro. Kining mga butanga magsilbing isip pagmatuod sa hugot nga pagtuo, o usahay sa paghagit niini, apan kini dili makamugna og hugot nga pagtuo.” 1
Unsa unta kasayon kon atong mapakita ang bulawan nga mga palid ngadto sa tibuok kalibotan? Ang pipila ka tawo sigurado nga mopasakop sa Simbahan, apan ang uban tingali dili, tungod kay ang pisikal nga ebidensiya dili mao ang tanan nga gikinahanglan aron makabaton og hugot nga pagtuo ni Jesukristo ug sa Iyang ebanghelyo. Agig tubag, sama sa giingon ni Jesus ngadto ni Tomas, “ Bulahan kadtong motuo bisan wala makakita kanako” (Juan 20:29).
Busa, Unsa ang Hugot nga Pagtuo?
Ang hugot nga pagtuo dili lang tinuohan—kini baroganan sa paglihok. “Ang hugot nga pagtuo kang Kristo makapalihok. Makaaghat kini og sinsero ug mahangt[o]ron nga paghinulsol.” 2 Ug samtang ang kalibotan nag-ingon nga ang hugot nga pagtuo mao ang pagsunod bisan wala ka makasabot niini, ako nakasabot nga ang hugot nga pagtuo mao ang pagsalig nga ang Dios mohatag kanako og mga kompirmasyon sa kamatuoran kon ako molihok.
Ang pagbaton og hugot nga pagtuo ni Jesukristo nagpasab[o]t og hingpit nga pag-alagad Kaniya—nagsalig sa Iyang walay kinut[o]ban nga gah[o]m, kaalam, ug gugma. Naglakip kini sa pagtuo sa Iyang mga pagtul[o]n-an. Nagpasab[o]t kini sa pagtuo nga bisan tuod wala ka makasab[o]t sa tanan nga mga butang, Siya nakasab[o]t.” 3
Wala kanato ang tanan nga tubag, apan samtang kita mosalig diha sa atong maalamon sa tanan nga Langitnong Amahan, mogiya Siya kanato sa unsa ang tinuod (tan-awa sa Mga Pulong ni Mormon 1:7).
Tutoki ang Unsay Imong Nahibaloan
Makapabalaka ang makadungog og tambag nga motukod og dili matarog nga hugot nga pagtuo sa usa ka kalibotan nga nagpadayon sa pagtay-og kanato. Apan ang pagpalambo og dili matarog nga hugot nga pagtuo kay posible. Ang hugot nga pagtuo usa ka pagpili. Kon kita makanunayon ug motuyo gayod sa pagpili nga magkinabuhi uban sa hugot nga pagtuo matag adlaw, kita nagtukod og lig-on nga pundasyon ug dili matarog nga pagpamatuod.
Si Hari Benjamin nagtudlo sa iyang katawhan og usa ka sumbanan sa pag-ugmad og dili matarog nga hugot nga pagtuo: “Tuo sa Dios; tuo nga siya mao, ug nga siya ang milalang sa tanan nga mga butang, lakip sa langit ug sa yuta; tuo nga siya aduna sa tanan nga kaalam, ug tanan nga gah[o]m, sa langit ug sa yuta; tuo nga ang tawo dili makasab[o]t sa tanan nga mga butang diin ang Ginoo mahimo nga makasab[o]t” (Mosiah 4:9).
Alang nako, kon akong dawaton nga dunay mga butang nga dili gayod nako hingpit nga masabtan niini nga kinabuhi ug motutok sa unsay ako gayod nga nahibaloan, ang ubang butang dili motarog sa akong pagpamatuod sa gugma sa Dios alang kanako ug sa katinuod niini nga Simbahan.
Akong balikon ang pamahayag ni Elder David A. Bednar sa Korum sa Napulog Duha ka Apostoles:
“Wala ko kahibalo sa tanang mga rason, sa tanang mga katuyoan, ug wala ko kahibalo sa tanan kabahin sa panahon sa Ginoo. Uban ni Nephi, kamo ug ako makaingon nga kita ‘wala masay[o]d sa kahul[o]gan sa tanan nga mga butang’ (1 Nephi 11:17).
“Apan ang ubang mga butang nakahibalo gay[o]d ako. Nasay[od ko nga kita espiritung anak nga mga lalaki ug mga babaye sa atong Langitnong Amahan. Nasay[o]d ko nga ang Amahan sa Kahangt[o]ran mao ang tigpasiugda sa plano sa kalipay. Nasay[o]d ko nga si Jesukristo mao ang atong Manluluwas ug Manunubos.” 4
Kini nga sukaranang mga baroganan importante nga mga bahin sa akong pagpamatuod. Ang Dios mipadayag og daghan nga maanindot ug importante nga mga butang; ayaw pagpundo diha sa mga misteryo nga wala pa Niya ipadayag (tan-awa sa Mga Artikulo sa Hugot nga Pagtuo 1:9).
Naay daghang butang nga wala pa nato mahibaloi. Ug OK ra kana!
Si Elder Neal A. Maxwell (1926–2004) sa Korum sa Napulog Duha ka Apostoles miingon: “Dayag lang nga dili nato masabtan kining tanan karon dayon! Dayag lang nga dili nato masabtan kining tanan karon dayon. Apan kita mahimong makahibalo, karon dayon, nga ang Dios nakaila kanato ug nahigugma kanato sa matag usa!” 5
Lihok inubanan sa Hugot nga Pagtuo Imbes sa Pagduhaduha
Daghang matinud-anon nga mga miyembro ang nangawala sa diha nga ilang gitugotan nga mopatigbabaw ang ilang pagduhaduha kay sa ilang hugot nga pagtuo. Ang pagtutok diha sa pagduhaduha mahimong maoy hinungdan nga ang atong pagtan-aw “[mo]lapas sa tumong” (Jacob 4:14).
Ang batan-ong babaye nga akong gitudloan sa akong misyon motuo lang nga ang Simbahan tinuod kon ako ug ang akong kompanyon adunay pruweba nga sayop ang tanan niya nga akusasyon. Apan ang bugtong butang nga akong ikapamatuod niya mao ang kamatuoran sa pagkaplag og mga tubag pinaagi sa personal nga pagpadayag. 6
Ako makapamatuod sa gamhanan nga ebidensiya sa Espiritu Santo diha sa akong kinabuhi. Nakahibalo ko nga ang Basahon ni Mormon tinuod, dili tungod kay nakahibalo ko sa tanan nga tubag apan tungod kay ang Espiritu nagpamatuod kanako nga kini dili gayod ikalimod nga tinuod. Ang akong pagsaksi wala moabot pinaagi sa usa ka milagroso nga mga pagpakita, apan sa kadugayan, pinaagi sa makanunayon nga pagtuon ug pag-ampo. Sa laing pagkasulti, ang akong pagpamatuod wala moabot tungod sa pisikal nga ebidensiya, apan tungod kay milihok ko inubanan sa hugot nga pagtuo ug magpadayon sa paghimo niini.
Busa, unsay atong buhaton kon dili kita makakaplag og mga tubag sa atong mga pangutana? Si Sister Camilla Kimball, asawa ni Presidente Spencer W. Kimball, mipakigbahin sa iyang estratehiya sa paghulat alang sa mga tubag sa lisod nga mga pangutana. Siya adunay makahulogan nga estante alang sa mga butang nga wala siya makahibalo unsa ang mga tubag. Ug samtang siya magkupot sa mga butang nga iyang nahibaloan samtang nagtuon ug nag-ampo kabahin sa iyang mga pangutana, siya nakakuha og mas dako nga panabot.
“Duna gihapon koy mga pangutana nga naa niana nga estante,” miingon siya, apan nasabtan ra nako ang daghan kaayong uban nga butang sa akong kinabuhi diin andam kong mogahin sa akong panahon sa paghulat alang sa nahibiling mga tubag.” 7
Balik ngadto sa mga Sukaranan
Adunay mga higayon nga dili ko makasabot sa piho nga mga sugo. Mga higayon nga ako adunay mga pangutana kabahin sa poligamiya, pagkaibog ngadto sa sama og sekso, o uban pang mga butang.
Apan nakat-on ko og gamhanan nga leksiyon gikan sa paagi nga ang Dios nagtudlo ni Adan ug Eva.
Gitudloan kita nga, “ang Dios mihatag ngadto kanila sa mga sugo, human ikapahibalo ngadto kanila ang laraw sa katubsanan” (Alma 12:32).
Dili ko masurprisa kon si Adan ug Eva adunay daghan nga pangutana kabahin sa mga sugo nga sila gihangyo sa pagsunod. Apan una pa nila masabtan ang mga sugo, kinahanglan usa nila nga makat-onan ang kabahin sa plano sa kaluwasan.
Unsa ka maayo ninyo nga nasabtan ang plano sa kaluwasan? Kon kamo adunay mga pangutana, mobalik ba kamo ngadto sa sukaranang mga baroganan sa plano sa Dios? Samtang nangita ko og mga tubag sa akong mga pangutana, ang pagtuon sa plano sa kaluwasan nakatabang nako nga makadawat og mga tipik sa mga tubag sa Dios.
Kon motutok ko sa mga sukaranang kamatuoan nga akong nahibaloan, makabarog ko sa usa ka lig-on nga tukoranan. Dili ko motugot sa walay hinungdan nga mga butang nga motay-og sa akong hugot nga pagtuo. Wala ko makahibalo sa tanang butang apan igo na ang akong nahibaloan. 8
Mahimo Kita nga Mopili Kanunay sa Hugot nga Pagtuo
Akong gitapos ang among leksiyon uban nianang batan-on nga babaye pinaagi sa lig-on nga pagpamatuod sa Basahon ni Momon. Giingnan nako siya nga ang bugtong paagi nga siya tinuod nga makakita og mga tubag sa tanan niya nga pangutana mao ang pagpangutana sa Langitnong Amahan kon tinuod ba ang Basahon ni Momon. Hangtod nga siya makasabot sa mga sukaranan sa ebanghelyo ni Jesukisto, mahimo niyang ibutang sa estante ang uban niya nga mga pangutana ug balikan lang unya kini uban sa mas dako nga panabot ug hugot nga pagtuo. Apan sa tinud-anay lang, di ba magamit kini natong tanan? Kita makapalambo sa atong hugot nga pagtuo pinaagi sa paglihok uban sa hugot nga pagtuo.
Ako napanalanginan sa matag higayon nga mipili ko sa hugot nga pagtuo kon mag-atubang og walay kasiguradohan. Ug samtang nisalig ko sa Langitnong Amahan nga mopadayag sa mga tubag sa Iyang kaugalingong panahon, nakahibalo ko nga mobati ko og kamaya ug hingpit nga kalipay sa pagsunod sa ebanghelyo—bisan kon wala ko makahibalo sa tanan nga tubag.