Paggahin og Panahon sa Paghimo sa Yano nga mga Butang

Human mogradwar sa hayskul ug nakakuha og trabaho, nanlimbasog ko sa paggahin og oras sa paghimo sa yano nga mga butang matag adlaw aron magpabilin nga lig-on ang akong pagtuo—mga butang sama sa pagbasa sa mga kasulatan ug pag-adto sa institute. Gibati nako nga daw nagkahuyang ang akong pagtuo ug nga nagkawala ang akong relasyon sa akong Langitnong Amahan.

Mao nga usa ka adlaw akong gisulat ang akong duha ka tumong sa usa ka piraso nga papel: “Mobasa sa mga kasulatan kada adlaw” ug “Moadto sa institute matag semana.” Gibutang nako kana nga piraso sa papel diha sa akong bungbong. Nag-ampo ko ngadto sa Langitnong Amahan ug nangamuyo Kaniya nga tabangan ko, ug nianang adlawa misaad ko sa akong kaugalingon nga ako gayod nga buhaton kadto nga mga butang.

Ug akong gibuhat. Nagsugod ko sa pagbasa og duha ka kapitulo diha sa Basahon ni Mormon matag adlaw ug pag-adto sa institute matag semana. Sa ubang mga semana kinahanglan ko nga motrabaho mao nga dili ko makatambong sa institute, ug sa ubang mga adlaw bisi kaayo ko mao nga makalimot ko sa pagbasa sa akong mga kasulatan. Nagtrabaho usab ako sa ubang mga tumong nga nagkinahanglan og panahon ug pagtagad. Apan nagpadayon ko sa pagpaningkamot.

Nabati nako ang akong Langitnong Amahan nga mas nagpaduol nako kaysa kaniadto ug mibati Kaniya nga mas kanunay nga nagtabang nako tungod kay mipili ko nga mosunod Kaniya. Ang pagbasa sa Basahon ni Mormon matag adlaw nakatabang nako nga mas makasabot sa plano sa kaluwasan, nga nakapalipay kaayo nako. Nahimong mas sayon alang kanako ang pagpangita og mga tubag sa akong mga pangutana nga may kalabotan sa hugot nga pagtuo. Ug ang pag-adto sa institute matag semana nakatabang nako nga makita ang kahayag sa Dios bisan asa ko moadto. Sa kinatibuk-an, mas gibati nako ang Espiritu sa akong kinabuhi.

Adunay daghan kaayo nga yano nga mga butang nga atong mabuhat aron matabangan ang atong pagtuo nga malig-on. Mahimo nato nga hinuktokan ang mga mensahe gikan sa atong mga lider, moadto sa simbahan, tinud-anay nga mag-ampo, moapil sa mga kalihokan sa Simbahan, moserbisyo sa uban, ug motambong sa templo. Kini gagmay apan mahinungdanon nga mga butang.

Sa mga young adult nga nagtuo nga sila bisi kaayo aron sa paghimo sa yano nga mga butang nga nagpadayon sa pagpalig-on sa ilang pagtuo: Ako mismo nakakita nga posible ang paggahin og panahon alang niana nga mga butang. Kita nagpili kon unsaon nato sa paggamit ang atong oras kada adlaw.

Usa sa akong paborito nga mga kasulatan kabahin sa hugot nga pagtuo ug mga panalangin mao ang Doktrina ug mga Pakigsaad 63:9: “Apan, tan-awa, ang hugot nga pagtuo moab[o]t dili pinaagi sa mga timailhan, apan ang mga timailhan mosunod niadto nga motuo.”

Ako adunay pagpamatuod nga kon kita mohimo sa atong bahin ug mohimo sa mora og yano nga mga butang kada adlaw, ang Langitnong Amahan mopanalangin kanato. Samtang kita maningkamot nga mas mopaduol ngadto Kaniya, Siya gayod mas mopaduol nganha kanato (tan-awa sa Doktrina ug mga Pakigsaad 88:63). Nakahibalo ko nga kana tinuod tungod kay gibati nako Siya nga mas nagpaduol kanako samtang ako naghimo og paningkamot nga mas mopaduol Kaniya.