Tun-an ang Buhat sa Tig-ayo

Ni Kerri Nielsen

Lisensyado nga Clinical Social Worker, Family Services

Unom ka baroganan ang makatabang nato nga mas masuportahan ang kadtong mga nanginahanglan.

Imahe

duha ka babaye nga kuyog nga nanglakaw sa parke

Aduna bay higala nga nakasulti nimo og usa ka makahagit nga sitwasyon ug dili ka sigurado kon unsaon nga labing makatabang, o milingi ka human niana ug nangandoy nga unta lahi ang imong gihimo? Ikaw ba adunay gidawat nga calling ug nabalaka unsaon nga ikaw mas makatabang niadtong diin ikaw gitawag nga moserbisyo?

Ang ikatulong bersikulo sa himno nga “Sundon Ko Ikaw Ginoo” (Mga Himno, nu.133) nagdasig, “Tun-an kong pagpangayo [pagtambal].” Pagkagamhanan nga hugpong sa mga pulong! Matag usa kanato, bisan unsa pa man ang gigikanan o mga kahimtang, mahimong mas mahisama sa Manluluwas pinaagi sa pagkat-on kon unsaon sa pagbayaw ug paglig-on sa uban.

Ania ang unom ka baroganan nga makatabang kanimo sa pagkat-on sa buhat sa Tig-ayo. ¹

1. Mag-una sa paghigugma.

Ang tanang anak sa Dios takos alang sa gugma ug kamabination. Tingali dili kita makasabot sa indibidwal nga mga kasinatian sa usa ka tawo, apan sa kanunay makapakita kita og gugma ngadto kaniya. Kon kita tinud-anay nga nagpakabana kabahin sa usa ka tawo, kana makita diha sa atong mga interaksiyon. Kini magmugna og pundasyon sa pagsalig nga makatabang gayod kaayo samtang kita mosulay sa pag-apil sa makahagit nga mga pag-istoryahanay—ilabi na kon kita dili mosulti sa hingpit nga mga butang diha sa hingpit nga higayon.

2. Paminaw aron makasabot.

Pagbantay nga dili ka makahimo og mga pagtagna kabahin sa unsa ang gibati sa uban o ngano nga ilang gihimo ang unsay ilang gibuhat. Kondili, pangutana ug paminaw nga adunay tumong nga makasabot kon unsa ang naagian sa laing tawo. Hinumdomi, dili nimo kinahanglan nga ayohon ang sitwasyon. Kon kita motutok lamang diha sa pagsulbad sa problema, kita mahimong makapadala og dili tinuyo nga mensahe nga unsa ang gipaambit sa lain nga tawo dili importante.

Kondili, kita mahimong magbansay sa mapailobon nga pagpaminaw—maningkamot sa pagsabot nga wala magplano kon unsa ang sunod nga isulti. Samtang kita makat-on sa pagpaminaw lang ug molingkod uban sa usa ka tawo diha sa ilang kasakit, kita magmugna og usa ka koneksiyon nga diha ug sa iyang kaugalingon mahimong hilom nga pagkaayo.

3. Pagtudlo og kamatuoran.

Human nato masabti ang sitwasyon, mahimong bation nato nga gustong mopaambit kon unsa ang atong nahibaloan kabahin sa makahupay nga mga baroganan sa ebanghelyo. Sa mainampoong paagi pangayo og tabang sa Espiritu aron mahibalo kon unsa ang ipaambit. Tutoki ang mga kamatuoran nga makatabang sa tawo nga maglakaw og dalan padulong sa mahangtorong kalipay.

Si Sister Michelle D. Craig, Unang Magtatambag sa Kinatibuk-ang Kapangulohan sa Young Women, nagtudlo, “Tingali ang labing importanting butang nga klaro natong makita kon kinsa ang Dios ug kinsa gay[o]d kita—anak nga mga lalaki ug anak nga mga babaye sa langitnong mga ginikanan nga adunay ‘diosnong kinaiya ug mahangt[o]rong padulngan.’” ²

4. Alimaha ang pagtuo.

Kita mahimong modasig sa uban sa pagbaton og hugot nga pagtuo diha sa ilang Langitnong Amahan, kinsa nakaila ug nahigugma kanila; ilang Manluluwas, kinsa hingpit nga nakasabot kanila; ug sa Espiritu Santo, kinsa mahinamon nga mogiya kanila. Ang usa ka yano nga butang sama sa pag-ampo uban kanila o dungan nga pagbasa sa mga kasulatan makatabang sa pag-amuma sa ilang hugot nga pagtuo.

Si Presidente Russell M. Nelson misaad:

“Ang Ginoo wala magkinahanglan og hingpit nga hugot nga pagtuo aron kita makagamit sa Iyang hingpit nga gahom. Apan mihangyo gayod Siya kanato nga motuo. …

“… Sugdi karon ang pagpalambo sa inyong hugot nga pagtuo. Pinaagi sa inyong hugot nga pagtuo, si Jesukristo mopalambo sa inyong abilidad sa pagbalhin sa mga bukid diha sa inyong kinabuhi, bisan og ang inyong personal nga mga hagit pareha kadako sa Bukid sa Everest.” ³

Kini magamit sa atong mga kinabuhi ingon man sa mga kinabuhi niadtong kinsa atong gipaningkamotan sa pagtabang.

5. Padayon sa pagpangalagad.

Samtang kita mag-ugmad og mga relasyon ug mainampingon nga maminaw kon unsa ang gikinahanglan sa uban, kita makasalig nga ang Espiritu motabang kanato nga makahibalo unsaon sa paglihok—dihadiha dayon ug sa magpadayon nga pamaagi. Ang ubang mga pagsulay ug mga hagit molungtad sa taas nga panahon. Kadtong atong gipangalagaran tingali magkinahanglan og padayon nga tabang human nga ang nag-unang krisis miabot ug nawala. Kon kita mainampoon nga mangita og giya ug dayon moabli sa atong mga mata ug mga kasingkasing, kita makadawat og langitnong tabang aron makahibalo unsaon nga maalamong moserbisyo sa usag usa.

6. Ipakigbahin ang atong kaugalingon nga mga gipas-an.

Daghan kanato ang andam sa pagtabang sa uban nga tawo. Apan pila lang kaha kanato ang andam sa pagtubag sa sinsero nga “Kumusta ka?” uban ang matinud-anon nga tubag? Igo ba ang atong pagsalig sa uban aron dali nga mobati ug mopakigbahin kon unsa ang tinud-anay nga nahitabo sa atong kinabuhi?

Ang mga kasulatan mihulagway sa pipila ka higayon dihang ang Manluluwas midawat ug gani nanghangyo alang sa pagserbisyo. Kini ang pipila ka ehemplo:

Siya mikaon didto sa panimalay sa uban (tan-awa sa Marcos 2).
Siya mitugot sa Iyang tiil nga hugasan ug mahalon nga lana (tan-awa sa Lucas 7).
Siya nangayo sa babaye sa atabay og tubig (tan-awa sa Juan 4).
Siya mitugot sa uban nga makakita dihang Siya nabalaka (tan-awa sa Juan 11).

Tingali usa ka butang nga atong makat-onan niini nga mga istorya sa kinabuhi sa Manluluwas mao nga kon kita matinud-anon nga mopakigbahin sa atong mga kinabuhi diha sa uban, kita maadunay kahigayonan nga makapanalangin sa uban ug mapanalanginan sa samang higayon. Tingali kita makapaambit og usa ka butang nga makatabang sa usa ka tawo nga makaamgo nga sila wala mag-inusara sa ilang mga pagpakigbisog—ug nga sila tingali mao gayod ang tubag sa atong kaugalingon nga mga pag-ampo.

Dili kita kinahanglan nga mahadlok kon ang uban moduol kanato uban sa ilang mga hagit sa kinabuhi. Samtang kita magsugod gikan sa dapit sa gugma ug pagpaminaw, ang Espiritu motabang kanato nga makahibalo unsaon sa pagpangalagad ug pag-amuma sa hugot nga pagtuo. Kita mahimo, ug kinahanglan, nga mangayo usab og tabang. Niining tanan nga pamaagi, kita nagsunod sa ehemplo ni Jesukristo, kinsa mao ang “dalan, ang kamatuoran, ug ang kinabuhi” (Juan 14:6). Siya mao ang tinubdan sa kahupayan ug paglaom. Siya ang Gamhanang Tig-ayo.