“Pagpakigharong sa Atong mga Goliat,” Liahona, Hunyo 2022.
Mga Baroganan sa Pagpangalagad
Pagpakigharong sa Atong mga Goliat
Ug unsaon nato nga makatabang sa uban sa pagbuhat sa ingon.
Sa wala pa ang COVID-19 nga pandemya, si Presidente Russell M. Nelson miingon, “Sa umaabut nga mga adlaw, dili na posible ang espirituhanong pagsugakod kon wala ang giya, direksiyon, ug makahupay nga impluwensya sa Espiritu Santo”1
Si Barbara nagpuyo sa bag-o nga ward sa pipila lamang ka bulan sa dihang nagsugod ang pandemya. Sama sa daghan kaayong mga tawo, nakita niya nga ang iyang mga plano napakyas. Nagtuo siya nga ang pakighimamat og bag-ong mga higala usa ka maanindot nga kasinatian, apan hinuon kadto nahimong lisod. Atol sa panahon sa pag-inusara, ang mga sundanan sa pagpangalagad gikinahanglan nga mausab. Wala kaayo siyay kahigayonan nga makaila ang mga miyembro sa iyang bag-o nga ward. Nangutana siya sa iyang kaugalingon, “Unsaon nako sa pagbisita, pagserbisyo, pagtabang, ug paghigugma sa mga sister kon ang pagbisita og usa ka tawo dili posible? Bisan ang pagpadala og text lisod kon ang mga sister wala makaila sa akong ngalan o numero tungod kay bag-o pa ko.”
Nakita niya nga gani mas importante ang pag-ampo ug pagpaminaw sa mga pag-aghat sa mao nga mga sirkumstansiya. Usahay gibati niya ang pag-aghat nga basta magbilin lang og mubo nga sulat. Sa ubang higayon nagpadala siya og text aron pasalamatan ang usa ka sister sa iyang pag-ampo diha sa miting sa sakramento o sa pagpadayag sa pasalamat alang sa pagpamatuod sa bana sa lain nga sister. Ang panagsa nga pinasubay sa social distance nga pagbisita diha sa atubangan nga kayda sa usa ka tawo nakatabang sa pagtuman sa iyang panginahanglan sa pagpakigkita ug pagpakig-istorya sa personal. Usa ka pag-aghat nakapahunahuna niya sa usa ka makahupay, lamian nga usa ka panaksan nga sabaw sa butternut nga kalabasa, busa iyang gibilin ang resipe ug usa ka butternut nga kalabasa.
Dili kadto mao ang iyang gilaoman nga mahitabo dihang mibalhin siya og puyo. Ang isolation [paglagyoay tungod sa pandemya] nakapahinay sa proseso sa pagpakig-ilaila sa iyang mga sister. Apan samtang iyang gisunod ang tambag ni Presidente Nelson nga dugangan ang iyang espirituwal nga kapasidad sa pagdawat og pagpadayag, iyang nabuntog ang mga hagit, nahimong mas maayo nga tigpangalagad nga sister, ug nakamugna og pipila ka suod nga panaghigalaay.
Pagpakigharong sa mga Higante
Ang kalibotan mahimong makapalibog ug puno sa sayop nga impormasyon ug magkasumpaki nga mga opinyon. Apan ang Dios naghatag kanato og mga propeta aron mogiya kanato. Kita makatabang sa uban nga makabaton og hugot nga pagtuo sa pagsunod sa Ginoo ug sa Iyang mga propeta bisan pa sa popular nga opinyon, tungod kay bisan unsa pa ang atong mga hagit, “ang Ginoo maoy makig-away” (1 Samuel 17:47).
Dihang nakigharong ni Goliat, gibutang ni David ang helmet, panagang, ug espada ug hinuon nag-armas sa iyang kaugalingon gamit ang lima ka bato ug usa ka saplong. Ingon nga walay proteksiyon ug dali ra nga madutlan, si David nakahimo sa pagbuntog sa higante gamit lamang ang iyang saplong ug ang iyang hugot nga pagtuo sa Dios. (Tan-awa sa 1 Samuel 17:38–50.)
Tingali mobati kita nga dili andam sa pag-atubang sa atong mga hagit nga wala ang tanang mga tubag nga gusto natong madawat. Apan kon kita adunay hugot nga pagtuo sa pagpadayon gamit ang pipila ka hamis nga mga bato nga atong gidala, igo na kana alang sa Ginoo aron matuman ang Iyang buhat.
Mga Baroganan nga Hunahunaon
Kon motabang sa uban, kinahanglang dawaton nato nga mahimong adunay daghang mga paagi sa pagsulbad sa usa ka problema. Ang atong tumong mao ang pagtabang nila sa pagpalig-on sa ila mismong espirituwal nga pagbarog sa kinaugalingong paningkamot pinaagi sa pagkaplag og ilang kaugalingong mga solusyon uban sa tabang sa Ginoo.
Pagkonsiderar og mga paagi nga kamo makatabang pinaagi sa pagpalig-on sa ilang hugot nga pagtuo ug pagsalig sa propeta sa Ginoo ug sa personal nga pagpadayag.
Kini mahimong maglakip sa pagpakigbahin sa imong kaugalingon nga mga kasinatian sa pagpangita og giya ug kahupay pinaagi sa pagsunod sa propeta ug pagtinguha og balaan nga direksiyon.
Mahimo usab nga tudloan nimo sila kon asa sila makakat-on sa unsa ang gisulti sa mga propeta mahitungod sa susama nga mga sirkumstansiya.
Unsa ang Atong Mabuhat?
Pagbaton og kaisog sa pagpakigbahin sa imong pagsaksi nga adunay kalinaw ug kahilwasan diha sa pagsunod sa giya sa Ginoo nga gihatag pinaagi sa mga propeta ug sa personal nga pagpadayag.