“Giamuma sa mga Madre,” Liahona, Hunyo 2022.
Mga Tingog sa mga Santos sa Ulahing mga Adlaw
Giamuma sa mga Madre
Naghunahuna mi kon unsa kaha ang isulti sa Katoliko nga mga madre kon mangayo mi og tabang nila.
Ang akong kompanyon ug ako naghinamhinam nga mag-abli og bag-ong area alang sa misyonaryo nga buhat sa usa ka gamayng lungsod sa western highlands sa Guatemala. Wala madugay human sa among pag-abot, hinoon, ang mga lider ug mga miyembro sa lokal nga mga simbahan misugod sa pagpakatap og dili maayo nga mga istorya mahitungod namo. Isip resulta, ang mga tawo nangahadlok namo.
Apan si Elder Todd Hinkins ug ako nagpabiling positibo, labi na human nga ang tulo ka pamilya misugot nga motambong sa usa ka open house mahitungod sa Simbahan. Aron matabangan nga mapaila kanila ang ebanghelyo, nagplano mi nga patan-awon sila og filmstrips mahitungod sa Pagpahiuli.
Apan, sa dihang among gitestingan ang among filmstrip projector sa wala pa ang among miting, ang bombilya sa projector napundir. Ang kakusog sa kuryente maoy nakaguba sa among voltage converter. Dili na kini maka-convert sa 220 ka boltahe nga elektrisidad ngadto sa 110 ka boltahe nga among gikinahanglan aron mosiga ang among projector.
“Unsa na man ni ron?” ang akong kompanyon ug ako nasagmuyo.
Si Brother Chavez, mao lang ang miyembro sa Simbahan nga nagpuyo diha sa lungsod, miingon namo nga naghunahuna siya nga ang mga madre diha sa lungsod adunay voltage converter. Busa, samtang si Brother Chavez nagdrayb paingon sa duol nga Quetzaltenango aron makakuha og bag-ong bombilya, nag-ampo mi ug milakaw paingon sa lokal nga kombento.
Nanuktok mi, mipailaila sa among kaugalingon, ug mipasabot sa among problema, naghunahuna kon unsa kahay isulti sa mga sister. Sa walay pagduhaduha, gihatag nila namo ang ilang converter ug giingnan nga mag-ayoayo. Wala madugay si Brother Chavez nahibalik, ug gipahigayon namo ang among miting.
Aron mapasalamatan ang mga madre, si Elder Hinkins ug ako naghimo og cookies alang nila. Wala madugay human namo mahatag ang cookies, gisurprisa mi sa mga madre pinaagi sa pagdapit namo og panihapon.
Among gidawat.
Pipila ka adlaw ang milabay, si Elder Hinkins ug ako naglingkod alang sa panihapon diha sa usa ka nindot kaayong pagkahan-ay nga lamesa nga gilibotan og pito ka madre. Ang lima gikan sa Canada, ang usa gikan sa Estados Unidos, ug ang usa gikan sa Guatemala City.
Atol sa panihapon gisultihan namo sila mahitungod sa gipahiuli nga Simbahan ug sa among buhat isip full-time nga mga misyonaryo. Dayon gihatagan namo sila og Basahon ni Mormon ug mihatag sa among pagpamatuod bahin niini. Mipasalamat sila namo ug midayeg namo sa among mga paningkamot sa pagdala sa mga tawo ngadto ni Kristo.
Sila usab, mihulagway sa lainlaing “mga katungdanan” sa mga madre. Dayon misulti sila namo mahitungod sa ilang mga paningkamot ug mga pagpahiangay sa pagpuyo diha sa highlands.
Uban sa bag-o nga panglantaw, akong nakita ang mga madre isip kaubanan nga mga espiritu nga adunay managsama nga mga tumong, mga tinguha, ug mga hagit. Nagserbisyo sila sa uban, nagsakripisyo alang sa ilang tinuohan, ug gipahinungod ang ilang kinabuhi ngadto sa Dios.
Ug ang among panihapon? Mao kadto ang pinakalami nga pagkaon nianang tuiga—gipaambit sa among mga higala, mga sister gikan sa Simbahan sa Katoliko.