Digital Lamang: Mga Young Adult
Pagsabot sa mga Panalangin Nga Nagagikan sa Pagsagop og Desenting Pagsinina
Sa dihang ako nakaamgo sa akong pagkatawo ug katakos isip usa ka anak nga babaye sa Dios, ang desente nga pagsinina nabatasan na nako.
Pipila ka buwan ang milabay human nako nadawat ang akong pagtuga, nagmaneho ako sa naglagiting sa kainit nga kotse uban sa usa ka higala sa dihang gitudlo niya nga ang purol [shorts] nga akong gisul-ob sa tinuod taas kaayo.
“Wala ka initi?” nangutana siya.
“Sa tinuod nainitan ako,” malipayon akong mitubag.
Kaming duha nangatawa.
“Apan nakaila kanimo, ikaw dili mosul-ob og mas mubo nga purol bisan kon dili ka magsul-ob og mga garment karon. Kanunay ka nga hilabihan ka desente,” miingon siya nga nagtiaw.
Gihunahuna ko kana nga pahayag.
“Husto ka,” miingon ako, nga nagkatawa.
Apan sa tinuod, akong nahunahuna nga ang iyang pahayag makalibog og gamay. Unsa ang iyang gipasabot sa “hilabihan” ka desente? Ako ba nanobra kaayo sa pagkadesente? Naghunahuna ba siya nga ako kolokoy?
Ug ilawom niana nga pangutana mao ang daghan pa nga pangutana nga akong gihunahuna kanunay sa makadiyot apan nahadlok kaayo sa pagpangutana: Nganong nahimo ako nga mapasaligon kaayo sa pagsinina nga desente? Kini nakatabang ba gayod kanako nga mahimong usa ka mas maayong disipulo ni Kristo? Gani may kalabotan ba kini?
Nagtan-aw sa mga Panalangin sa Pagkadesente
Ang pipila kanato tingali adunay mga pangutana mahitungod sa pagkadesente, ilabi na mahitungod kon unsa ang kalabotan niini sa atong pagkadisipulo. Apan samtang kita naningkamot og paggiya pinaagi sa Espiritu, kita makasugod sa pagsabot sa ngano nga nagpaluyo niini nga sugo.
Kon ako adunay mga pangutana mahitungod sa pagkadesente ug mibati nga napugos gikan sa kalibotan nga mas ipaubos ang akong mga sumbanan, ako nag-ampo ngadto sa Langitnong Amahan. Sa hinay-hinay, akong nahinumdoman ang daghang higayon diin ang pagpili nga madesente––sa panagway ug sa pamatasan––mipanalangin og hilabihan sa akong kinabuhi.
Ania ang pipila lamang sa mga panalangin nga akong nasinati gikan sa pagsagop sa baroganan sa pagkadesente.
1. Ang Pagkadesente Makatukod og Pagsalig
Ang atong mga lawas sagradong mga sudlanan alang sa atong espirituhanong mga kaugalingon ug nagsilbi isip usa ka makita nga mga pahinumdom kon unsa kahingpit kita gihigugma sa atong Amahan sa Langit. Kini usa ka tinuod nga pribilihiyo nga makabaton og usa ka lawas, kay kini nagtugot kanato nga mahimong sama Kaniya. Kon atong hunahunaon kanang milagroso ug dili matugkad nga kamatuoran, nganong dili kita masaligon sa kon kinsa kita?
Kon sa makadiyot ikaw motan-aw sa palibot, imong mamatikdan nga, tungod sa kaaway, ang kalibotan nagpakita sa mga lawas sa lainlaing paagi kay sa gitumong sa Langitnong Amahan. Kini gisaway ug gitandi, ug ang pagkalaw-ay sa pagsinina kasagaran nga gidayeg. Gusto sa kalibotan nga mopatuo kanato nga ang pamatasan ug ang pagsinina sa piho nga paagi motabang kanato nga mobagay ug mobati nga mas siguro sa kaugalingon sukad masukad. Apan ang pagsalig nga nagagikan niini lumalabay.
Ang malungtarong pagsalig nagagikan sa pagsabot sa atong balaang mga pagkatawo––nag-ila nga ang atong mga lawas sagradong mga instrumento pinaagi diin kita nagsinati sa kinabuhi, dili mga adorno nga idayandayan sa kalibotan.1
Sa Doktrina ug mga Pakigsaad 121:45, ang Ginoo nagtudlo, “Himoa ang hiyas nga modayandayan sa inyong mga hunahuna nga walay paghunong; unya ang inyong pagsalig mosamot pagkalig-on diha sa atubangan sa Dios.”
Ug tinuod kini! Kon kita nagbaton og desente, mahiyasong mga hunahuna, kini makita sa atong pamatasan, pinulongan, ug panagway, ug makasinati kita og tinuod nga kaugalingong kasigurohan.
Usahay, ang akong temporal nga mga tinguha makigbatok sa akong pagkadesente, sama sa gustong mosul-ob og sinina aron mobati nga madanihon o mangandoy nga mobagay pinaagi sa paglihok sa piho nga paagi. Apan samtang ako miabot sa tinuod nga pagsabot sa akong balaang pagkatawo, gusto ko nga morepresentar niana nga kamatuoran, ug ang paglihok ug pagsinina sa desenting paagi sa kadugayan nahimong akong nabatasan. Ug ang akong pagsalig sa kaugalingon milambo usab––human sa tanan, ang tinuod nga pagsalig adunay gamay nga mabuhat sa atong panagway ug mas daghang mabuhat sa pagpuyo sa paagi nga nagpakita sa atong balaang pagkatawo.
2. Ang Pagkadesente Makapalig-on sa atong Relasyon uban sa Langitnong Amahan ug ni Jesukristo
Kon hunahunaon isip mga lagda, ang mga sugo sa ebanghelyo maingon og may pagpugong. Apan kon kita mohatag og gibug-aton sa mahangtorong panan-awon ug gugma sa Langitnong Amahan alang kanato, makatukod kita sa atong pagpamatuod diha sa kamatuoran nga ang Iyang mga sugo gituyo sa pagpanalipod ug pagpanalangin kanato. Kini nagagikan sa Iyang hingpit nga gugma.2
Sa pagpamalandong kon giunsa sa pagkadesente pagpanalangin sa akong kinabuhi, makausa akong gihunahuna ang pangutana ni Presidente M. Russell Ballard, Kasamtangang Presidente sa Korum sa Napulog Duha ka Apostoles, nga gipangutana kalabot sa atong gugma alang sa Dios batok sa mga butang sa kalibotan. Siya miingon, “Unsaon nato pagtubag sa pangutana nga ‘Gihigugma mo ba ako labaw sa paghigugma nimo niining mga butanga?’”3
Akong naamgohan nga ang kalibotan mahimong mapuno sa mga tintasyon, apan kon akong hunahunaon kon unsa ang nahimo sa Langitnong Amahan ug sa Manluluwas alang kanako tungod sa gugma, ang pagpili sa pagkadesente maoy usa ka butang nga akong mabuhat aron sa pagpakita Kanila og gugma agi og balos. Ang pagkadesente usa ka pagpakita sa akong kaugalingong pasalig ngadto Kanila, ug samtang ako nagpadayon sa pagpakita sa akong pagkamakanunayon, akong gibati ang akong kaugalingon nga naglig-on sa akong relasyon ngadto Kanila, nga usa ka panalangin sa iyang kaugalingon.
3. Ang Pagkadesente Makadapit og Hingpit nga Kalipay
Si Elder D. Todd Christofferson sa Korum sa Napulog Duha ka Apostoles mitudlo: “Ang Iyang mga sugo dili lisod––sukwahi hinoon. Kini ang nagdan-ag sa dalan sa pagkaayo, kalipay, kalinaw, ug hingpit nga kalipay. … Ug sa pagtuman sa Ilang mga sugo, atong mabati ang Ilang hingpit nga gugma sa mas puno ug sa lawom nga paagi.”4
Ug atong mabasa sa 1 Nephi nga ang gugma sa Dios mao ang “labing hingpit nga kalipay ngadto sa kalag” (1 Nephi 11:23; tan-awa usab sa bersikulo 22). Kon kita mopili sa pagsunod sa mga sugo lakip ang pagkadesente, kita makahimo sa pagbati sa Iyang gugma ug sa pag-ambit sa mga bunga sa ebanghelyo ni Jesukristo, nga mao ang tinubdan sa tinuod nga hingpit nga kalipay.
Ang pagsinina o paglihok sama sa kadaghanan sa kalibotan mahimong motugot kanako sa pagbati og kalipay sa makadiyot, ug akong gibati kana nga tintasyon usahay. Apan ako mas labing hingpit nga malipayon kon maningkamot ako sa pagsunod sa mga sugo ug sa akong mga pakigsaad, tungod ang pagbuhat sa mao nagtugot kanako sa pagbati sa hingpit nga gugma sa Langitnong Amahan.
Pagmahal sa Atong Tinuod nga mga Pagkatawo
Atol niana nga panagsultihanay uban sa akong higala, ako nagdahom nga siya mihunahuna nga ako may pagkakimian. Apan pipila ka tuig ang milabay, kini nga higala sa tinuod nahimong akong bana, ug siya mipasabot nga siya kanunay nga midayeg kon giunsa ko pagpakita ang akong pasalig ngadto ni Kristo diha sa akong panagway, pinulongan, ug mga lihok.
Ang pagpili sa pakadesente dili sa kanunay masayon, tungod kay “ang mga tingog ug mga pamugos sa kalibotan madanihon ug daghan.”5 Apan ako nahibalo sa mga panalangin ug sa hingpit nga kalipay nga akong madawat kon ako mosagop sa pagkadesente nga mas labaw pa ang bili kay sa bisan unsa nga ikatanyag sa kalibotan kanako.
Kon kamo adunay mga pangutana mahitungod sa pagkadesente, nagdapit ako kaninyo sa pagpaningkamot og personal na pagpadayag ug sa paghunahuna kon giunsa nini pagpanalangin ang inyong kinabuhi. Ug hinumdomi, dili kita maghukom sa katakos sa uban sumala sa ilang mga pagpili kabahin sa pagkadesente. Samtang kita mopili sa pagsagop sa pagkadesente, motanyag kita og kalooy ngadto sa uban––ang samang kalooy nga ang Manluluwas nagtanyag kanato.
Ang pagkadesente usa sa labing maayo nga mga paagi nga kita makakat-on sa pagmahal sa atong tinuod nga mga pagkatawo, mas mapaduol ngadto sa Langitnong Amahan, ug sa pagbati og hingpit nga kalipay sa atong mga kinabuhi. Kini nahimo kanako, ug ako nasayod kini mahimo kaninyo.