Unsa ang Mahitabo sa mga Miting sa Simbahan sa Dominggo?

Imahe

batan-ong lalaki nga naglingkod sa wheelchair nagpaambit sa sakramento

Ang mga miyembro sa ward o branch magpundok matag Dominggo sa panagtigom alang sa sakramento. (Bisan kadtong dili sakop sa atong tinuohan gidapit usab nga motambong.) Ang sakramento ihatag ngadto sa mga miyembro atol niini nga panagtigom aron sa pagtabang nila nga mohinumdom ni Jesukristo (tan-awa sa April 2022 Gospel Basics article alang sa dugang impormasyon mahitungod sa sakramento). Ang panagtigom naglakip usab og mga pag-ampo, pangsimba nga musika, ug mga pakigpulong nga ihatag sa mga miyembro mahitungod sa ebanghelyo ni Jesukristo.

Imahe

duha ka mapahiyomon nga mga batang babaye diha sa simbahan

Human sa panagtigom alang sa sakramento, ang mga miyembro magbulag ngadto sa mga klase ug mga korum. Ang mga bata nga nag-edad og 18 ka bulan hangtod 11 ka tuig motambong sa Primary. Sa una ug ikatulo nga mga Dominggo matag bulan, ang tanang uban pa nga mga miyembro motambong sa Sunday School. Sa ikaduha ug ikaupat nga mga Dominggo, motambong sila sa Relief Society, Young Women, o mga miting sa korum sa pagkapari.

Ang mga Pag-ampo diha sa mga miting sa Simbahan ihatag sa mga miyembro. Ang mga pag-ampo yano ug giniyahan sa Espiritu Santo. Ang mga miyembro mag-ampo gamit ang mga pulong nga nagpahayag og gugma ug pagtahod alang sa Langitnong Amahan. Sa Iningles, kini naglakip sa mga pulingalan [pronouns] nga Thee, Thy, Thine, ug Thou kon mag-ampo ngadto Niya.

Ang usa ka sakop sa bishopric o kapangulohan sa branch mohangyo sa mga miyembro nga mohatag og pakigpulong diha sa panagtigom alang sa sakramento. Kini nga mga pakigpulong magtutok diha sa ebanghelyo ni Jesukristo. Ang mga mamumulong mogamit sa mga kasulatan ug sa mga pulong sa mga lider sa Simbahan samtang mangandam sila sa ilang mga pakigpulong. Sila usab mohatag og pagpamatuod bahin sa mga panalangin sa mga baroganan sa ebanghelyo diha sa ilang mga kinabuhi.

Human sa panagtigom alang sa sakramento, ang mga miyembro magkat-on mahitungod sa ebanghelyo diha sa gagmay nga mga klase. Ang mga leksiyon mahimong mahitungod sa mga kasulatan, mga pagtulon-an gikan sa kinatibuk-ang komperensiya, o uban pang mga hisgotanan. Bisan kon ang magtutudlo mao ang mangulo sa leksiyon, dili kini usa ka lecture. Ang tanang miyembro sa klase mahimong mopaambit sa ilang mga hunahuna mahitungod sa hilisgotan.

Imahe

lalaki nga namulong sa pulpito diha sa simbahan

Kausa sa usa ka bulan, ang panagtigom alang sa sakramento naglakip sa miting sa pagpamatuod. Kasagaran sa unang Dominggo kini sa bulan. Atol niini nga panagtigom, ang mga miyembro mahimong mohatag sa ilang mga pagpamatuod bahin ni Jesukristo ug sa Iyang ebanghelyo. Ang paghatag og pagpamatuod nagpasabot sa pagpahayag sa mga kamatuoran sa ebanghelyo samtang gidasig sa Espiritu Santo.

Ang mga miyembro mangandam alang sa mga miting sa Dominggo pinaagi sa pag-ampo, pagtuon sa mga kasulatan, ug pagkahimong andam sa pagdawat sa inspirasyon gikan sa Espiritu Santo. Kon hangyoon ka sa paghatag og pakigpulong o pagtudlo sa leksiyon, mainampoong maghunahuna kon unsaon nga ikaw makatudlo sa mga baroganan sa ebanghelyo. Gamita ang mga kasulatan. Mohatag og pagpamatuod bahin sa kamatuoran. Ang imong mga lider sa Simbahan makatabang nimo sa pagpangandam, kon gikinahanglan.