Usa ka Luwas nga Pagbiyahe sa Kinabuhi

Imahe

mask nga nagbitay gikan sa kisame sa eroplano

Samtang ang mga flight attendant misugod sa ilang kasagarang mga panudlo sa kaluwasan, akong gi-tsek sa pagsiguro nga ang akong anak nga lalaki, si Max, nakahigot og maayo sa butanganan sa masuso diha sa lingkoranan nga tupad kanako diha sa eroplano.

Akong gihunahuna ang adlaw nga si Max natawo pila ka bulan ang milabay. Sa dihang siya akong gikugos sa unang higayon didto sa ospital, determinado akong buhaton ang tanan sa akong gahom sa pagpabilin kaniya nga luwas, pagtudlo kaniya kon unsaon pagpangita sa kalipay, ug sa paghatag sa tanan nga iyang gikinahanglan sa malamposong paglawig niini nga kinabuhi.

Sigurado ako nga kadaghanan sa mga amahan nagsinati niini nga mga pagbati. Ang akoa piho nga makatandog sa pagbati samtang akong gitan-aw ang iyang mga mata ug gihinumdoman ang mga paningkamot nga momabdos sa wala pa siya ipanganak, uban sa pisikal, emosyonal, ug espirituwal nga mga kaguol nga mihakop kanako ug sa akong asawa.

Ang mga flight attendant mao pa lamang ang pagkahuman og pagpasabot sa paagi sa paggamit sa mga oxygen mask nga anaa sa ibabaw sa ulo sa mga pasahero atol sa kalit nga makuyaw nga hitabo, ug sa dihang usa kanila miabot sa among laray, hilabihan ka seryoso ang iyang hitsura. Mitudlo siya kanako. “Kon ang mga mask mapaubos, ibutang ang imo pag-una sa dili pa tabangan siya,” miingon siya, nga nagtudlo ngadto ni Max. Tungod sa pipila ka rason, ang gibug-aton sa iyang pagsulti sa pulong nga una miigo kanako sama sa kilat.

Nagtan-aw sa gawas diha sa bintana sa eroplano, akong nahanduraw ang talan-awon––mga oxygen mask gipaubos, nagduda nga ako mobati og kakomportable sa pag-usik og bisan unsa nga panahon sa pagtabang ni Max. Dayon ang hunahuna sa mga pulong ni Jesukristo ngadto ni Pedro miabot kanako, kansang tinguha lamang niana nga higayon mao ang pagserbisyo ug pagpanalipod sa Manluluwas: “Sa mahibalik na ikaw kanako, lig-ona ang imong mga igsoon” (Lucas 22:32).

Ug kini miigo kanako: ang labing maayo nga ako makatabang ni Max mao ang pagtabang sa akong kaugalingon og una. Ako nakaamgo nga kon ako nagkinahanglan sa pagsiguro sa akong kaugalingong oxygen mask, mokabat lamang kini og pila ka segundo, apan niana ako makatabang sa hingpit ug sa husto ni Max. Gihunahuna nako sa nahibiling panahon sa paglupad ang mahitungod sa gagmay ug yanong mga butang––mas importante pa kaayo sa mahangtorong paagi kay sa mga oxygen mask––nga ako makahimo sa pag-una nga mobutang kanako sa labing maayo nga kahimtang dayon sa pagtabang ni Max, nga makabig og una ug mahimo dayon ang paglig-on sa uban.

Kining mosunod nga mga butang mikabat lamang og pipila ka minuto sa akong panahon apan mihimo og dako kaayo nga kalainan sa paglig-on kanako:

• Ang pagluhod nga nag-ampo nagtabang kanako sa pag-angkon sa hustong tumong sa pagbaton og matinuorong panaghisgot uban sa Amahan sa Langit.

• Ang paggamit og kwaderno o computer sa pagsulat sa mga hunahuna ug mga panabot nagmugna og mas mabungahong kasinatian sa pagtuon sa kasulatan alang kanako. 

• Ang paghunong sa makadiyot sa pagpangutana, “Unsa gayod ang kahulogan niana?” o “Unsa ang kahulogan niana alang kanako?” samtang nagsimba diha sa templo o nagrebyu og mga pakigpulong sa kinatibuk-ang komperensiya nagtabang kanako sa pagdawat og importanting panabot ug pagsabot.

• Ang pagsulat kon giunsa nako pagkakita sa kamot sa Ginoo diha sa akong kinabuhi sa kataposan sa matag adlaw mitabang kanako sa pagkakita sa Iyang impluwensya nga mas sayon ug sa pagbati nga mas duol ngadto Kaniya.¹

Akong gihunahuna ang kamatuoran nga si Kristo mitudlo kanato nga maoy “unaha ninyo pagpangita ang gingharian ug ang pagkamatarong gikan sa Dios; ug unya kining tanang mga butanga igadugang ra kaninyo” (Mateo 6:33). Kon ako maghunahuna mahitungod sa “kining tanang mga butanga,” akong mahanduraw ang tanang panalangin nga ang Langitnong Amahan naghulat sa pagbu-bo diha sa atong pamilya samtang kita sa tinuyo nagpili Kaniya nga mahimong atong Dios sa matag adlaw (tan-awa sa Jeremias 24:7).

Imahe

amahan ug anak nga lalaki naglakaw diha sa baybayon

Daghang mga higayon nga gibati nako ang pagkakulang isip usa ka amahan ug nag-ampo alang sa mga tubag ug direksyon “sa takna gayod” nga ako kinahanglang motabang sa uban (Doktrina ug mga Pakigsaad 100:6). Kon ako naghimo og usa ka tinuyo nga paningkamot sa pag-una og punting sa akong relasyon diha sa akong Amahan sa Langit ug ni Jesukristo, akong bation ang maayong kahimtang sa pagtabang sa uban, ilabi na sa akong pamilya.

Ako nahibalo nga ang akong kinabuhi mahimo nga ang labing dako nga leksiyon nga akong ikatudlo bisan kanus-a ni Max ug sa uban. Samtang ako mahimong mas lig-on nga nakabig ngadto sa Langitnong Amahan ug ni Jesukristo, ako mas maayong makalig-on niadtong naglibot kanako.

Kon ang espirituwal, emosyonal o pisikal nga mga kalit nga kuyaw sa kinabuhi mahitabo, kon ang simbolikanhong oxygen mask gipaubos, ug kon ang uban nagkinahanglan sa atong panabang, kon kita nakahimo sa gagmay ug yanong mga butang sa pagsiguro og dili mausab nga pagkakabig ngadto ni Jesukristo ug sa Iyang ebanghelyo, niana kita maanaa sa labing maayo nga kahimtang sa pagtabang sa uban sa pagduol ngadto Kaniya, ang Batid nga Mang-aayo ug Manluluwas sa atong mga kalag.