“Mga Pag-ampo didto sa Peru,” Liahona, Hunyo 2022.
Mga Tingog sa mga Santos sa Ulahing mga Adlaw
Mga Pag-ampo didto sa Peru
Sa dihang ang full-time nga misyonaryo nag-ampo alang nako pinaagi sa paglitok sa akong ngalan, nakakat-on ko og gamhanang leksiyon.
Sulod sa usa ka tuig, nagtudlo ko og Iningles isip ikaduhang pinulongan didto sa Universidad de Piura, sa Piura, Peru. Ang Piura mao ang siyudad sa punoang buhatan sa Peru Piura Mission.
Ang presidente sa misyon, si Chad Rowley, ug ang iyang asawa, si Lisa, nagpuyo sa akong ward. Gihangyo ko nila sa paghatag og Iningles nga mga leksiyon sa mga misyonaryo nga nagserbisyo sa Piura. Gidawat nako.
Gamit ang programa sa Simbahan sa pagbansay sa pinulongan nga Iningles, makigkita ko sa lainlaing mga grupo sa mga misyonaryo didto sa opisina sa misyon aron motudlo nila og Iningles. Usa kadto ka maanindot nga espirituhanong kasinatian alang nako nga makatrabaho ug makailaila sa mga misyonaryo gikan sa South America ug sa Estados Unidos. Kada hapon mao ang labing maayo tungod kay ang siyudad morag dili kaayo busy alang sa misyonaryo nga buhat hangtod sa sayo sa kagabhion.
Sa dihang hapit na matapos ang akong panahon sa Piura, gibati nako ang kamingaw sa panimalay ug gikapoy kaayo sa emosyonal ug sa propesyonal nga pagbati. Usa ka hapon sa Biyernes, mibati gyod ko og kalaay ug ka-depress. Nanghinaot ko nga unta makanselar ang klase tungod sa misyonaryo nga buhat, nga maoy unahon kay sa mga leksiyon sa Iningles. Niana nga hapon, hinoon, dili kana mao ang nahitabo.
Dugay ko nga mibiya sa akong apartment ug nagsagudsod paingon sa opisina sa misyon. Samtang naglakaw ko agi sa parke, nag-ampo ko. Misulti ko sa Langitnong Amahan nga dili na nako makaya ang laing usa pa ka minuto, samot na ang laing usa pa ka semana. Gikapoy na kaayo ko sa hunahuna ug sa pisikal, ug nagkinahanglan ko sa Iyang tabang.
Miabot ko sa opisina sa misyon ug misaka sa itaas aron maghulat sa mga misyonaryo. Sa dihang miabot sila alang sa ilang leksiyon, wala ko kahibalo unsay itudlo nila. Apan sa pagsugod, mihangyo ko sa usa sa mga elder nga mohatag og pangbukas nga pag-ampo sa Iningles.
Sa dihang nagsugod na sa pag-ampo ang misyonaryo, miingon siya, “Palihog panalangini si Sister Johnson.” Dayon mihunong siya og kadali. Sa dihang mipadayon siya, siya midugang, “Palihog panalangini siya nga makapadayon uban sa ingon nga kalig-on sama sa sinugdanan.”
Kana nga misyonaryo wala masayod nga nag-ampo ko sa akong pagpadulong sa opisina sa misyon, ug sigurado nga wala siya masayod kon unsay akong giampo. Apan ang Langitnong Amahan nasayod, ug gidungog Niya kana nga pag-ampo pinaagi sa paglig-on nako.
Didto ako—usa ka US citizen didto sa Peru nga giampo pinaagi sa paglitok sa akong ngalan sa usa ka misyonaryo nga gikan sa Bolivia. Unsa kadto kanindot nga makaayo nga tambal niadtong hapona didto sa opisina sa misyon. Ug unsa ka gamhanan nga leksiyon nga akong nakat-onan nianang adlawa. Bisan kinsa man o asa man kita—ang Langitnong Amahan maminaw ug motubag sa atong gilitok ug wala malitok nga mga pag-ampo.