Unsay Akong Nakat-onan mahitungod sa Paghinulsol

Imahe

mga tunob diha sa asol nga likoran

Alang sa kadaghanan sa akong kinabuhi, ako nakigbisog sa paghinulsol. Nasayod ako nga kini importante ug nga ako kinahanglan nga mobuhat niini, apan dili hingpit ang akong pagsabot niini. Ug tungod kay kini usa ka butang nga wala nako buhata og maayo, gibati ko ang pagkanawad-an og kadasig kon ang usa ka tawo mohatag og gibug-aton sa importansya niini diha sa usa ka pakigpulong.

Miabot kini sa punto diin ako dili gani gusto nga makadungog sa pulong nga paghinulsol tungod kay kini mipahinumdom kanako sa usa ka butang nga ako wala magbuhat. Kini ingon og ako naulahi, ug kon mas madugay kini nga problema nga magpadayon, mas mosamot ako sa ka layo.

Sa kataposan, nadungog ko ang mosunod nga pahayag diha sa kinatibuk-ang komperensiya gikan sa kanhi–Kinatibuk-ang Presidente sa Young Men Stephen W. Owen, ug misugod ako sa paghunahuna og lahi: “Ang kalipay sa paghinulsol mas labaw kay sa desenting pagpakabuhi. Kini ang kalipay nga mapasaylo, nalimpyo og balik, ug maduol sa Dios. Kon masinati ninyo kana nga kalipay, walay mas ubos nga ikahulip niini.”¹

Laing pakigpulong sa kinatibuk-ang komperensiya ang nagdasig kanako og dugang nga tinguha sa pagbuhat og mas maayo. Si Presidente Nelson miingon: “Makugihon man kamong misubay sa dalan sa pakigsaad, mitipas o mipalayo gikan sa dalan sa pakigsaad, o dili gani makakita sa dalan gikan sa inyong nahimutangan karon, ako mohangyo kaninyo sa paghinulsol. Sinatia ang makapalig-on nga gahom sa matag adlaw nga paghinulsol––sa pagbuhat ug mahimong mas maayo matag adlaw.”²

Samtang gihimo ko ang labing maayo sa pagsunod niini nga tambag, nakaplagan ko ang mga tubag sa mga kabalaka ug nakabaton og mas maayong pagsabot sa mga panalangin sa paghinulsol. Apan ako nahibulong kon unsa pa ang wala nako masabti mahitungod sa paghinulsol nga naghimo niini nga lisod kaayo.

Usa nga malisod alang kanako mao nga dili ako makahinumdom sa tanang sala nga akong nahimo sa mao nga adlaw. Nasiguro ako nga adunay pipila nga akong nakalimtan. Unsaon ko sa paghinulsol sa akong tanang sala kon ako dili makahinumdom niining tanan?

Kini nga pangutana nakasamok kanako sukad ako bag-ong gibunyagan nga otso anyos ang panuigon. Nasayod ako nga kinahanglan akong maghinulsol, apan kinsa nga otso anyos ang panuigon naghipos og subay sa matag sala nga iyang nabuhat aron siya makahinulsol niini? Nahinumdoman ko nga usa ka higayon nga nagluhod sa pag-ampo ug nag-ingon, “Langitnong Amahan, ako naghinulsol sa tanan kong mga sala!” Nagduhaduha ako nga ang pagbuhat niana nga paagi igo na, apan wala gayod ako masayod kon unsa pa ang buhaton.

Sa wala madugay nakaplagan ko ang tubag diha sa Basahon ni Mormon. Alma 38:14 nagtudlo: “Ayaw pag-ingon: O Dios, ako magpasalamat kanimo nga kami labaw ka maayo kay sa among mga kaigsoonan; apan hinoon pag-ingon: O Ginoo pasayloa ang akong pagkadili takos. … Oo, angkona ang imong pagkadili takos sa atubangan sa Dios sa tanan nga higayon.”

Ang pag-angkon sa atong pagkadili takos sa atubangan sa Dios nagtabang kanato nga mahimong mapainubsanon, nga importante ngadto sa paghinulsol. Agi og dugang, kita makahangyo sa Langitnong Amahan sa pagtabang kanato nga makita ang mga butang sa atong mga kinabui nga nagkinahanglan nga pagahinulsolan, usbon, o palamboon. Siya sa tinuod nasayod kon unsa ang atong kinahanglan nga usbon nga mahimong mas sama Kaniya, ug Siya moaghat sa atong mga hunahuna ug mga kasingkasing kon kita mangayo uban ang sinserong tinguha sa pag-usab ug paghinulsol.

Ang laing malisod nga ako aduna sa paghinulsol mao nga ako wala makasabot sa hingpit sa konsepto sa pagbiya sa atong mga sala. Ang Doktrina ug mga Pakigsaad 58:43 miingon: “Pinaagi niini kamo masayod kon ang usa ka tawo naghinulsol sa iyang mga sala—tan-awa, siya mokumpisal kanila ug mobiya kanila.”

Mituo ako nga ang pagbiya sa atong mga sala mipasabot nga kita dili na gayod mobuhat niini pag-usab. Kini ba mipasabot nga kon ako mibuhat niini pag-usab, niana ako sa tinuod wala diay mobiya niini sa unang bahin? Ug sa dihang ako miluhod sa pag-ampo aron pagkompisal ug pagbiya sa akong mga sala, ang ako bang pagkaamgo sa akong kaugalingong kahoyang–– ang kamatuoran nga ako mahimong mousab og balik sa sala––nagpasabot nga ako wala gayod mobiya sa akong mga sala? Apan akong nakat-onan nga ang pagbiya sa akong mga sala mas labaw pa kay sa mangayo og pasaylo alang niini. Kon ang pagpangayo og pasaylo mao ang tanan nga akong mahimo, niana tingali ako wala makabiya kanila.

Si Elder Dale G. Renlund sa Korum sa Napulog Duha ka Apostoles mipakigbahin niini nga panabot: “Ang Kristiyanong tagsulat nga si C. S. Lewis misulat mahitungod sa panginahanglan ug sa pamaagi alang sa kausaban. Mipahayag siya nga ang paghinulsol naglakip sa ‘pagkabalik ngadto sa sakto nga dalan. Ang sayop nga sumada mahimong masakto,’ miingon siya, ‘apan pinaagi lamang sa pagbalik hangtod nga makit-an ninyo ang sayop ug usbon pagtrabaho gikan niana nga punto, dili lamang sa pagpadayon.’ Ang pag-usab sa atong kinaiya ug pagbalik ngadto sa ‘sakto nga dalan’ kabahin sa paghinulsol, apan kabahin lamang. Ang tinud-anay nga paghinulsol naglakip usab sa pagpabalik sa atong kasingkasing ug kabubut-on ngadto sa Dios ug sa pagsalikway sa sala. Sama sa gipasabot diha sa Ezequiel, ang paghinulsol mao ang ‘pagbiya sa … sala, … magabuhat niana nga uyon sa balaod ug matarong; … iuli … ang butang nga pasalig, … [ug] magalakaw … sa kabalaoran sa kinabuhi, sa walay pagbuhat ug kasal-anan.’ [Ezequiel 33:14–15].”³

Samtang ako nag-ampo alang sa panabang sa paghinulsol, mipahayag ako ngadto sa Langitnong Amahan nga ako sa tinuoray gusto nga mag-usab ug andam sa pag-usab. Nasayod ako nga ang Ginoo motabang kanako. Ug tinuod, siya mitabang kanako nga mausab.

Sa una, usahay ang kausaban dili kanunay ug gikinahanglan nako nga mosulay og usab. Apan ang mga paningkamot nga atong gihimo importante ngadto sa Ginoo. Si Elder Jeffrey R. Holland sa Korum sa Napulog Duha ka Apostoles mitudlo: “Pinaagi sa gasa sa Pag-ula ni Jesukristo ug sa kalig-on sa langit aron sa pagtabang kanato, kita mahimong molambo, ug ang talagsaong butang kalabot sa ebanghelyo mao nga kita magantihan sa pagpaningkamot, bisan kon kita dili kanunay nga magmalamposon.”⁴

Sukad nga nakaangkon niini nga pagsabot kabahin sa paghinulsol, mibati ako nga mas may pagsalig sa akong abilidad sa pagsunod niini nga tambag nga gihatag ni Presidente Nelson: Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, matag adlaw nga paghatag og gibug-aton sa paghinulsol. Ang paghinulsol dili usa ka panghitabo; usa kini ka proseso. Mao kini ang yawe ngadto sa kalipay ug kalinaw sa hunahuna. Kon inubanan sa hugot nga pagtuo, ang paghinulsol moabli sa atong agianan ngadto sa gahom sa Pag-ula ni Jesukristo.”⁵

Sa dihang mihimo ako sa desisyon sa paghinulsol og mas maayo, ako walay ideya kini ingon ka malukpanon ug malungtarong impluwensya sa akong kinabuhi. Ang mga panalangin nga miabot mga tinuod. Ako nakaamgo nga ang mga pagbati sa pagkanawad-an og paglaom nga ako aduna nagagikan sa kaaway sa akong kalag, kinsa dili buot kanako nga maghinulsol. Ako usab nakaamgo nga ako dili kaayo kanunay maawahi pinaagi sa akong pagkapakyas sa paghinulsol kay ako usahay magpasagad lamang sa mga panalangin nga unta akong madawat kon mihimo pa ako og dugang nga paningkamot sa pagbuhat sa mga butang nga kinahanglan akong pagabuhaton.

Samtang ako nagpadayon sa pagbuhat sa akong labing maayo sa paghinulsol sa matag adlaw, akong gibati ang gugma ug paggiya sa Dios sa mga paagi nga dili nako hapit mahunahuna kaniadto. Ako dili na mobati nga nabug-atan sa sala. Miabot ako sa pag-ila sa pribilehiyo ug panalangin nga ang paghinulsol mao gayod. Akong nasabtan na karon unsa ang gisulti ni Brother Owen: Kon masinati ninyo kana [ang kalipay sa paghinulsol], walay mas ubos nga ikahulip niini.”