Nagpadako og Anak nga mga Babaye isip usa ka Nag-inusarang Amahan

Ni Richard M. Romney

Mga Magasin sa Simbahan

Nasayod ako nga mahimong mahagiton ang pagpadako sa akong anak nga mga babaye nga wala ang akong asawa. Apan ako sa wala madugay nakahibalo nga ako wala gayod mag-inusara.

Human mamatay ang akong asawa sa cancer, nahimo akong usa ka nag-inusarang amahan ngadto sa akong lima ka anak––duha ka babaye ug tulo ka lalaki. Ang pagpadako og mga anak sa akong kaugalingon nagpakita og mga hagit, apan ilabi kini ka mahagiton alang kanako sa pagpadako sa akong duha ka anak nga babaye. Dihay daghan kaayong mga butang nga ilang gikinahanglan nga ang usa ka babaye lamang sa tinuoray ang makahatag. Sama nga si Presidente M. Russell Ballard, Kasamtangang Presidente sa Korum sa Napulog Duha ka Apostoles, miingon, “Ang mga inahan ug anak nga mga babaye adunay mahinungdanong tahas sa pagtabang sa usag usa nga madiskobre ang ilang walay kinutoban nga mga posibilidad bisan pa sa makadaot nga mga impluwensiya sa kalibotan diin ang pagkababaye ug pagkainahan gidaot ug gi-kontrol.”¹ Unsaon nga ako makailis alang niana?

Gani daghang mga baroganan sa ebanghelyo ang mihatag kanako og kalig-on samtang ako naningkamot sa paggiya sa akong talagsaong anak nga mga babaye ug usab sa akong maantigo nga anak nga mga lalaki. Kini nga mga baroganan mahimong motabang sa ubang nag-inusarang mga amahan sa anak nga mga babaye, nag-inusarang mga inahan sa anak nga mga lalaki, ug sa tanang nag-inusarang mga ginikanan.

Pagbaton og Sukaranan sa Ebanghelyo

Akong nakat-onan nga alang sa tanan kong mga anak (ug alang kanako), ang pagpabiling matinud-anon ngadto sa Langitnong Amahan ug ni Jesukristo, ingon nga kini sa kanunay mao, kon asa ako kinahanglan magsugod. “Ang mga pagsulay mao ang nakapalambo sa hugot nga pagtuo,” miingon si Presidente Henry B. Eyring, Ikaduhang Magtatambag sa Unang Kapangulohan.²

Samtang kita naggamit og hugot nga pagtuo, atong nahibaloan nga importante ang pagbuhat og pipila ka butang:

Hinumdomi ang gagmay, yano nga mga butang. Pinaagi sa pamilya nga pag-ampo ug pagtuon sa kasulatan, atong madawat ang “dagkong mga butang” (Alma 37:6) sa atong mga kinabuhi, sama sa paglaom, ug hingpit nga kalipay.
Paglig-on sa usag usa. Paggahin og panahon nga mag-uban, mag-istoryahanay, ug maglipay sa usag usa. Ang yanong mga pulong sa pagsuporta makahimo og usa ka dako nga kalainan.
Paghimo og maayong panig-ingnan alang sa usag usa. Ang pag-awhag sa akong mga anak nga mahimong maayong mga panig-ingnan nagpasabot nga ako kinahanglan nga maghimo og panig-ingnan alang kanila usab. Ako gikinahanglang magpadayon nga “naghisgot ni Kristo [ug] nalipay diha kang Kristo, … nga ang [akong] mga anak mahimong masayod” (2 Nephi 25:26) nga sila kinahanglan usab nga motan-aw ngadto Kaniya.
Salig diha sa Langitnong Amahan. Ang Iyang plano alang sa matag usa kanato usa ka plano sa kalipay. Bisan sa malisod nga mga panahon, ang “mga tawo naingon, nga unta sila makabaton og hingpit nga kalipay” (2 Nephi 2:25), ug ang mga pamilya gituyo nga mahimong mag-uban hangtod sa hangtod. Kini nga mga kamatuoran midala kanamo og kalig-on sa matag adlaw.
Dawata ug palamboa ang mga calling. Ako nasayod nga kini importante ang pagpadayon sa pagserbisyo sa mga calling, ang pagpangalagad ug ang pagpakighigala sa ubang mga Santos sa Ulahing mga Adlaw. Sa dihang akong nahibaloan nga usa sa akong anak nga babaye gustong moawit diha sa choir sa ward , mipasakop usab ako sa choir. Nalingaw kami og maayo nga nag-uban sa pag-awit.
Paminaw sa kinatibuk-ang komperensiya. Makausa, sa hapit na ang kinatibuk-ang komperensiya, gibati nako nga nawad-an og kadasig ug nag-ampo nga mahibalo kon aduna bay usa nga nakasabot sa akong sitwasyon. Kana gayod nga komperensiya, si Elder David S. Baxter sa Kapitoan miingon: “Karon, siyempre, dunay nag-inusarang mga pamilya diin ang amahan ang nag-inusarang ginikanan. Mga igsoon, kami nag-ampo usab alang kaninyo ug mipasidungog kaninyo.”³ Kana mitabang kanako sa pagsabot nga ang samang gugma ug suporta nga gihatag ngadto sa nag-inusarang mga inahan anaa usab ngadto sa nag-inusarang mga amahan.

Tugoti ang Uban sa Pagtabang

Mao lamang gihapon, ako usa ka amahan nga naninguha sa pagpadako sa anak nga mga babaye sa akong kaugalingon. Naningkamot ako sa pagmugna og tinagsa nga panahon kanilang duha sa paglig-on sa among mga relasyon. Apan unsaon ko sa pagtabang kanila sa pagpangandam nga mahimong mga dalaga? Wala madugay akong nakaplagan nga adunay mas daghang mga kapanguhaan kay sa akong nahunahuna:

Mga sakop sa pamilya. Nagpasalamat ako sa Ginoo alang sa usa ka bayaw nga babaye ug binalaye kinsa mipuyo sa duol ug mianha sa pagtabang kanako. Mitambong sila og mga miting sa pagkahingkod kauban sa akong anak nga mga babaye. Mitabang sila sa akong anak nga mga babaye sa pag-andam alang sa mga sayaw. Labaw sa tanan, sila naminaw. Nakigbahin sila sa mga paglaom, mga kahadlok, mga kamingaw, ug mga tinguha sa akong anak nga mga babaye. Mitabang sila kanila sa pagbalhin gikan sa pagkabata ngadto sa pagkanagdalaga ngadto sa pagkahamtong nga may usa ka lahi nga pagsabot niana nga proseso kay sa akong mahatag, nga wala gayod sukad makasinati niini sa samang paagi.
Mga Silingan. Maayong mga silingan mibantay sa akong anak nga mga babaye kauban sa ilang anak nga babaye human sa klase hangtod ako moabot sa panimalay gikan sa opisina. Ang ubang mga silingan midala sa akong mga anak ngadto sa eskwelahan kon ako adunay sayo nga mga miting. Usa ka silingan kinsa adunay negosyo sa pag-atiman sa nataran, kanunay nga gipahabas sa iyang trabahador ang akong nataran nga walay bayad aron makagahin ako og mas daghang oras uban sa akong pamilya.
Tigpangalagad nga mga brother ug mga lider sa Simbahan. Ang akong tigpangalagad nga mga brother nakigtakdo sa ward council, ug kini ingon og ang tanan diha sa ward, ilabi na ang Primary ug Young Women nga mga lider naninguha pag-ayo sa bisan unsa nga paagi sa pagtabang sa akong batang mga babaye. Akong nakat-onan nga usa sa dakong butang mahitungod sa Relief Society mao nga sila nagtanyag, og angay, nga kahupayan. Makausa, usa ka grupo nila milimpyo sa akong tibuok balay, gikan sa taas ngadto sa ubos. Ug diha sa mga kalihokan sa Young Women, usa ka tawo kanunay nga misiguro nga ang akong anak nga mga babaye mobati nga giapil.

Dili tanan mosinati niining sama nga matang sa suporta. Apan akong nakat-onan nga hangtod kita mopahibalo sa uban sa mga haw-ang nga atong makita nga nasinati sa atong mga anak nga walay inahan, kadto nga mga indibidwal mahimong dili makasabot kon sa unsang paagi sila makatabang.

Hinumdomi nga Wala Ka Mag-inusara

Si Elder Baxter miingon: “Mga nag-inusarang ginikanan, mopamatuod ko nga kon buhaton ninyo ang tanan atol sa pinakalisod sa tawhanong mga hagit, ang langit mopahiyom kaninyo. Sa tinuod wala kamo mag-inusara. Tugoti nga ang matubsanon, mahigugmaong gahom ni Jesukristo modan-ag sa inyong kinabuhi karon ug mopuno sa paglaom sa mahangtorong saad. Pagmaisogon. Batoni ang pagtuo ug paglaom. Ikonsiderar ang karon uban ang kalig-on ug tan-awa ang ugma uban sa kamasaligon.”⁴

Sama ni bisan kinsa nga nag-agi og mga hagit, ang nag-inusarang mga amahan mahimong mobati nga nabug-atan. Ako nahibalo nga ako mibati usahay. Apan nahibalo usab ako nga adunay daghan nga paglaom ug daghang tabang alang sa nag-inusarang mga amahan diha sa ang Simbahan ni Jesukristo sa mga Santos sa Ulahing mga Adlaw.