Naghunahuna Ko Nga Dili Ako Mao Ang Unsay Gusto sa Dios

Imahe

lalaki nga ang iyang nagkyugpos nga mga bukton nagtukod dapit sa abli nga libro

Sa dihang ang mga misyonaryo unang mibisita nako, sila mipasabot sa mahinungdanong mga kamatuoran sa ebanghelyo. Gisultihan usab ko nila kon sa unsang paagi nga ang Simbahan ni Jesukristo napahiuli.

Sa kataposan sa ilang pagbisita, gihangyo ko nila sa pagbasa sa 3 Nephi 11. Samtang nagbasa ko, sinsero ko nga nag-ampo. Dihadiha dayon, ang Espiritu Santo mihikap sa akong kasingkasing. Ang Espiritu mihunghong, “Kini nga libro tinuod.”

Usa ka semana ang milabay, mitambong ko sa akong una nga panagtigom alang sa sakramento. Dili nako makalimtan ang pag-abiabi nga akong nadawat ug ang mga pagpamatuod nga gipaambit sa mga miyembro.

Human sa panagtigom, ang mga misyonaryo misulti nako nga kinahanglan kong mohimo og mga pakigsaad uban sa Dios ug modawat ni Jesukristo isip akong Manluluwas aron makabaton og paglaom sa kaluwasan ug kahimayaan. Ang akong kasinatian diha sa simbahan nindot kaayo, apan miingon ko nila, “Dili ko makahimo niini. Dili ako ang matang sa tawo nga gusto sa Dios diha sa Iyang Simbahan.”

Usa ka semana ang milabay, ang mga misyonaryo midapit nako nga mobisita sa nataran sa Guatemala City Guatemala Temple. Nahingangha ko nga makakita og ingon niana ka nindot nga gambalay nga adunay anghel nga nagtungtong sa ibabaw.

Ang duha ka sister nga misyonaryo nga maoy naglibot sa nataran sa templo miingon nako, “Mianhi ka aron makakuha og tubag gikan sa Dios. Mosulod kita sa lobby aron makaampo ka aron madawat ang tubag nga imong gitinguha.”

Misulod kami ug milingkod. Samtang nag-ampo ko, gibati nako ang grabe nga kainit sa akong kasingkasing ug misugod sa paghilak. Gibati usab nako ang hilabihan nga kalinaw ug kalipay. Nasayod ko nga ang Dios mipasaylo nako sa akong mga sala. Gusto ko nga moserbisyo Niya. Nasayod ko nga kinahanglan ko nga magpabunyag.

Sa dihang ang mga misyonaryo nga nagtudlo nako nangutana kon andam na ba ko nga magpabunyag, ako mitubag, “Ugma, karong kataposan sa semana, bisan kanus-a nga pwede ninyo!”

Ang adlaw nga nabunyagan ko mao ang labing nindot nga adlaw sa akong kinabuhi. Gibati nako nga ako gipakatawo pag-usab.

Gibati nako nga ang Langitnong Amahan naghimo og milagro ngari nako. Ang yawe mao ang pag-ampo ug pagbasa sa mga kasulatan. Ang mga kasulatan ug pag-ampo mao ang mga paagi nga ang Ginoo makaistorya ngari nato ug makapakita sa Iyang gugma.

Ayaw pagduhaduha sa paghimo og mga pakigsaad uban Niya. Ang mga pakigsaad usa ka talagsaon nga butang.