“E Mafai Ona Tatou Fesoasoani i Isi ia Lagona le Alofaina ma le Faaaofiaina,” Liahona, Sete. 2022.
Mataupu Faavae o le Auaunaga
E Mafai Ona Tatou Fesoasoani i Isi ia Lagona le Alofaina ma le Faaaofiaina
Sa oo le Faaola i le teenaina ma aoaoina i tatou i le ala e aapa atu ai.
O Sasha o se tamaitai talavou nofofua i se uarota aiga, lea e lē faigofie i taimi uma. Na te lagonaina le fiafia ma le faamalieina ae e masani ona ese tele—ma e fai si iloagofie—i isi tagata o le uarota. E pei o le toatele o i tatou, e moomoo o ia mo le taliaina ma le faaaofiaina.
O Tomasi, o se toeaina matua i le uarota, sa tofia e avea ma ona tuagane o auaunaga ma sa afe atu ma lona toalua i se tasi aso e faamasani ia Sasha. Sa fai si faigata o le asiasiga a o liliu atu le talanoaga i lona tulaga nofotoatasi. Ae a o latou talanoa, sa mafai ona iloa e Sasha o loo taumafai Tomasi ma lona toalua ia malamalama i lona tulaga ma le auala e mafai ona la fesoasoani ai.
I se tasi taimi, sa fai mai Tomasi, “Sa ou mātauina atonu e manaomia sina galuega itiiti i lou fanua. Ou te fiafia e fesoasoani ia te oe i lena mea.”
O le galuega a Sasha e matuai pisi ai lava o ia ma o le tausia lelei o lona fanua e lē o lana faamuamua maualuga lea. Ma le isi, na te lē fiafia i ai. Na te iloa le auala e fai ai galuega i le fanua, ma na te iloa e mafai ona ia faia. Ae e lē suia ai le mea moni e inoino i ai.
Sa i ai se taimi atonu na tiga ai ona lagona i se fesili. Ae sa ta‘ua e Tomasi sa i ai o ia i le militeli ma e malamalama lelei i le mea e masani ona faia e se tamaitai na o ia pe afai e toesea lona toalua. Sa ia iloaina na o le pau lea mea o loo sailia e Tomasi o se auala e faaloloto ai le latou faigauo. Sa taumafai o ia e tuufaatasia aafiaga o lona olaga ma ia ma saili i ni tulaga e tutusa ai.
O itu uma e lua o lenei sootaga faaleauaunaga na aoaoina e alofa ma talia e le tasi le isi mai le mea sa i ai i laua, ma sa atiae ai se faigauo vavalalata ma faamaoni.
Ma sa sili atu ona aulelei le fanua o Sasha.
O Le Faataitaiga Atoatoa o le Faaaofiaina
I le Feagaiga Tuai, na valoia ai e Isaia o le a silafia lelei e Iesu Keriso tulaga o le ese ai lava. Sa oo o Ia i le faaesea ma le agaleagaina. “Ua inosia ma tuulafoaiina o Ia e tagata; o le tagata faanoanoa, ua masani foi ma le tiga” (Isaia 53:3). E ala i Lona alofa atoatoa, Na te silafia ai o tatou lagona ma silafia le ala e fesoasoani ai ia i tatou (tagai Alema 7:12). O Ia o le faataitaiga atoatoa o le auala e mafai ona tatou aapa atu ai i le alofa e faaaofia mai isi, e tusa lava po o a o latou tulaga po o foliga vaaia.
Mataupu Faavae e Mafaufau i Ai
A o e vaavaai mo auala e fesoasoani ai i isi ina ia lagona lo latou taliaina, mafaufau i nei mataupu faavae na aoao mai ma soifua ai le Faaola:
-
Ia naunau e faamasani i tagata i fafo atu o i latou ua uma ona e iloa (tagai Mataio 5:43–48).
-
Aua le fefe e mafuta ma i latou o e atonu e ola pe ese talitonuga pe afai o le a lē fetuunaia ai aoaoga a le Faaola (tagai Mareko 2:14–17; Luka 7:38–50).
-
E tatau ona lagona e tagata uma tatou te mananao ia i latou i le lotu (tagai i le 3 Nifae 18:22–32). O le i ai i le mea e mafai ona latou aoaoina ai le talalelei a le Faaola ma lagonaina Lona alofa e mafai ona suia ai soo se tasi.
-
E silafia e le Faaola mea tatou te manaomia, i se vaega ona Na te silafia o tatou lagona (tagai Alema 7:11–12). E mafai ona tatou faaali atu le alofa e ala i le saili ia malamalama i aafiaga o isi ma tuu i tatou lava i o latou seevae.
-
Sa faaalu e le Faaola se taimi e faatasi atu ai e tali atu i manaoga o i latou na siomia o Ia. Sa tu o Ia e tausia isi tusa lava pe sa i ai Ana fuafuaga i se isi nofoaga (tagai Mareko 5:22–43).
O Le a se Mea e Mafai ona Tatou Faia?
Aua nei faatagaina ni eseesega e taofia ai oe mai le faamasani ia i latou o loo e auauna atu i ai. Po o a lava o tatou eseesega, e i ai lava tulaga tutusa e tatau ona maua.