Fesuiaiga o La’u Vaaiga i Luitau Tumau

Saunia e Erin Price

Pe a tatou feagai ma luitau atonu e le mafai ona fofoina, e faapefea ona tatou agai i luma ma le faatuatua?

Ata

Tamaitai talavou matua o loo ataata i luga i le lagi

E le matagofie ea le i ai o se fuafuaga mo lou olaga? Le mafai lea ona faavasega mea uma? Sa ou faapea na ou faia, seia oo ina maua au i se tulaga tumau faalesoifua maloloina e ta’ua o le palapala masina e seāseā alu ma e faaumiumi foi pe a alu [polycystic ovary syndrome (PCOS)].

Ina ua ou aafia ai, sa ou ita ma lē mautonu i nisi taimi, ma sa taulai atoa atu lo’u malosi i le aveesea o lenei tulaga.

Sa ou iloa mulimuli ane e le o le ala lena na finagalo le Atua ou te vaai ai i lenei tofotofoga. Sa fesoasoani le Agaga ia te au e saoloto mai nei vaaiga le manuia e tolu sa ou tauivi ai ma suia i ni vaaiga lelei atu:

“O Lenei Luitau o Lo’u Sese” “O Lenei Luitau e Le o So’u Sese—Ua na o se Vaega lava o le Olaga Faitino”

I le taimi muamua, sa ou manatu sa ou faia se mea sese e alagatatau ai lenei faama’i ma afai ou te suia a’u mausa, e mafai ona ou “manuia.”

Sa ou sailiili ma le faananau ma faataitai le tele o “vaifofo” lea na itiiti se mea na fesoasoani ai.

Ina ua ou liliu atu i le Tama Faalelagi mo ni tali, sa fesoasoani le Agaga ia te au e iloa ai e le tuua’ia i tatou mo le tele o tauiviga tatou te feagai—o nisi o luitau e oo mai i le olaga faaletino. Na saunoa mai Elder Anthony D. Perkins o le Fitugafulu, “O le mafatia e le faapea ua le fiafia le Atua i lou olaga.”¹ E ala i le tuu ese o le tuua’i ma liliu atu i le faatuatua, sa mafai ai ona ou maua le faamoemoe ma le filemu.

“E Manaomia ona Aluese Lenei Faafitauli” “E Mafai Ona Ou Maua le Olioli e Tusa lava pe I Ai Lenei Faafitauli”

Sa ou talitonu e mafai ona faamaloloina atoatoa au pe afai e lava lo’u faatuatua, ma sa ou le fiafia i taimi uma i le le faamaloloina o au. Na iu lava ina ou aoaoina e taua foi le i ai o le faatuatua i le le faamaloloina.

Ou te fiafia i le savali na faasoa mai e Elder David A. Bednar o le Korama a Aposetolo e Toasefululua e uiga i se alii talavou na ma’i i le kanesa o le sa talosagaina se faamanuiaga faaleperisitua o le faamalologa. Peitai, sa ta’u atu e Elder Bednar ia te ia, ina ia faamaloloina, e tatau ona ia maua le faatuatua ina ia le faamaloloina ai foi. Sa ia faapea mai, “e tatau ona [ia] faatoilaloina, e ala i le Togiola a le Alii o Iesu Keriso, le ‘tagata natura’ o le matele lea o loo ia i tatou uma e poloai ma le le onosai ma le viga soo i faamanuiaga tatou te mananao i ai ma talitonu e tatau ai mo i tatou.”²

O le faatuatua i le Atua e mafai ona taitai atu ai i vavega—pe afai o le finagalo lena o le Atua. Ae afai tatou te le’o oo i ni vavega, o le a la le isi mea tatou te faia?

I le Feagaiga Fou, o loo talanoa ai Paulo e uiga i le tatalo e aveese se “mea matuitui i le tino” (tagai 2 Korinito 12:7). E ui ina sa lei foia vave lona faafitauli, ae sa aoao Paulo e faamoemoe i le Atua ma faalagolago ia te Ia mo le malosi e taulima ai se luitau faigata: “O lo’u nei alofa tunoa e lava lea e fesoasoani ia te oe; aua o le vaivai e faaatoaina ai lo’u mana” (2 Korinito 12:9).

O la’u “mea matuitui i le tino” ua fesoasoani foi ia te au e faalagolago ai i le Atua, lea ua liua ai o’u vaivaiga i se malosiaga. Ua ou aoaoina o le faatoilaloina o luitau e mafai ona faauigaina o le mafai ona pulea i latou e ala i le faalagolago i le malosi mai le Faaola, nai lo le aveesea atoa o i latou.

O le faatuatua i le Atua e mafai ona taitai atu ai i vavega—pe afai o le finagalo lena o le Tama Faalelagi. Ae afai tatou te le o oo i vavega tatou te sailia i le ala tatou te faamoemoeina, e mafai lava ona tatou vaaia Lona aao o galue faavavega i o tatou olaga atoa. E pei ona sa aoao mai Peresitene Russell M. Nelson, “Fai le galuega faaleagaga e saili ai vavega, ole atu ma le agaga tatalo i le Atua e fesoasoani mai ia te oe e faatino lena ituaiga o faatuatua. Ou te folafola atu e mafai ona e lagonaina mo oe lava ia e faapea o Iesu Keriso “Na te avatua le malosi i e ua vaivai; a o e ua leai se malosi na te faatuputele i ai le malosi’” (Isaia 40:29).³

“E Leai se Faamoemoe” “O Loo I Ai Pea le Faamoemoe”

O se vaega tiga o le i ai o le PCOS o le le mafai lea ona maua ni fanau. Ina ua ou iloaina o le a faigata ia te au le mauaina o se fanau, sa ou lagona le ita ma le faalataina.

A o ou faalagolago ia Keriso, ua ou aoao e faalagolago i le finagalo ma le taimi a le Atua.

Ou te le iloa pe o le a maua sa’u fanau i lenei olaga, ae ou te talitonu, e pei ona sa aoao mai Elder Jeffrey R. Holland o le Korama a Aposetolo e Toasefululua, “ua ia i tatou mafuaaga uma e faamoemoe ai mo faamanuiaga e sili atu nai lo na faamanuiaga ua uma ona tatou maua.”4

E tusa lava pe e le foia ou luitau, e i ai lava le faamoemoe: faamoemoe i le olioli, faamoemoe i le fesoasoani atu i isi e ala i le agaalofa ua e maua e ala i ou aafiaga, ma le faamoemoe i le tele o faamanuiaga o le a oo mai.

O loo ou tauivi pea i nisi taimi ma ni vaaiga le manuia e uiga i ou luitau, ae a ou oo i ai, ou te vaavaai atu i le Faaola ma Ana folafolaga. Afai ou te taumafai pea e faaleleia i ni auala laiti i aso taitasi, i le faalagolago i le Atua, ma ole atu ia te Ia ma isi mo se fesoasoani, o le a faatumulia lo’u lumanai i le olioli ma faamanuiaga—ma o le a faapena foi oe.