Ua Na’o Tusiga Faaeletonika: Autalavou Matutua
O Le Taimi a le Alii e Sili Atu Nai Lo Tatou
Sa faaali mai e le Alii ia te au o nisi taimi i le faagasologa o le faatalitali o le a mafai ona tatou maua ai le aafiaga o le tuputupu ae silisili.
Na i ai se taimi na e le mautonu ai, ma mafaufau pe tatau ona e agai i luma i lou olaga pe faatalitali mo le Alii e faatulaga mea mo oe? Afai na iai, susū mai i lo’u lalolagi. Ae o se tasi o aafiaga na fesoasoani ia te au e faaauau ai ao ou faalagolago i le Alii.
O Se Avanoa Susulu
I lo’u tausaga muamua i le kolisi, sa ta’ua ai e la’u polofesa se avanoa faigaluega mo se avanoa o le faatonulomitusi i le aoga. I le iloaina talu ai nei o lo’u faananauga mo galuega faatonu, sa ou manao ai i lenei galuega—manao moni lava. Ae sa ou filifili e faatali ma talosaga iai pe a leai ni a’u vasega.
Ina ua ou alu e talosaga iai i lena taumalulu, sa ou le fiafia i le iloaina e leo toe manaomia e le vaega se tagata mo le avanoa. Sa ou manatu ua umi tele lo’u faatalitali ma misia lo’u avanoa. Ae sa i ai pea ia te au lenei lagona faalavelave sa tatau ona ou maua lena galuega. Sa ou mafaufau pe aisea na le sologa lelei ai mea ina ua foliga mai na faamalosiau mai le Tama Faalelagi ia te au e agai atu i ai. E lei tuai ea la’u gaoioiga?
O Le Tapenaga a le Alii
A o ou mafaufau loloto i auala e fesoasoani mai ai le Tama Faalelagi ia te au ia maua faaaliga, sa ou iloa ai o le le mauaina o lenei galuega atonu o se faamanuiaga e mafai ai ona ou avea ma tagata sili atu nai lo le mea sa ou i ai. Atonu sa manaomia ona ou aoao atili ae ou te lei saunia.
Sa ou filifili e galue i le atiina ae o o’u tomai, ma e ui sa ou popole i le tolopoina o la’u talosaga mo nai semesa na sosoo ai, ae sa faamautinoa mai e le Agaga ia te au o le filifiliga sa’o lea.
A o ou faatalitali mo le galuega e toe tatala, sa ou aoao atili e uiga i mea e fai e faatonu ma faamalosia lo’u malamalama i le gagana Peretania. Sa ou maua le to’a i o’u tomai faafaatonu ma sa oo lava ina ou aoaoina nisi o tomai. O le mea moni, sa ou manaomia nei tomai uma ina ia filifilia ai a’u mo le galuega.
I le toe tepa i tua, ou te iloa na taitaia au e le Alii i lenei taimi e fesoasoani ia te au e atiina ae tomai sa ou manaomia e avea ai ma se faatonu sili atu. Ana ou le lagonaina se uunaiga e saili le galuega i le taimi muamua, semanu ou te le tuuina atu se taumafaiga tele i le avea ai ma se faatonu sili atu.
Na fetalai le Alii ia Aperaamo:
“E moni lava, ou te matua faamanuia ia te oe, ma ou matua faatoateleina lau fanau.
“Na onosai lava ia, ona maua lea e ia o le mea na folafolaina” (Eperu 6:14–15).
Ua faamanuiaina a’u e le Alii. Ina ua ou toe talosaga mo le galuega, sa ou tuuina atu se faamatalaga otooto faafouina ua tusia ai tomai fou uma na ou mauaina ma sa faafaigaluegaina i totonu o le vaiaso. I le iuga, sa sili mea na silafia e le Alii nai lo a’u e uiga i le taimi ou te saunia ai mo lenei galuega.
E Fetaui Lelei Lana Taimi
Sa manaomia a’u e le Alii ia ou i ai i le nofoaga sa’o i le taimi sa’o faatasi ai ma le tuufaatasiga sa’o o tomai ma le malamalama e faamanuia ai a’u i mea sa ou manao ai. Na aoao mai Elder J. Devn Cornish, o se Fitugafulu o le Pulega Aoao ua malolo faamamaluina: “Na te silafia i tatou uma taitoatasi, ma e alofa o Ia ia i tatou uma lava. E finagalo o Ia e faamanuia i tatou.”1
Ana ou iloa ou te le maua le galuega i le taimi muamua lea sa na ona ou manaomia e “faalologo i luma o le Alii, ma faamoemoe ia te ia” (Salamo 37:7), atonu e vave ona ou matauina sa fesoasoani le Alii ia te au e mamanu a’u lava i se faatonu e sili atu ona atamai.
Na iu lava ina sa’o le taimi. Ma ina ua ou maua le galuega, sa matuai ou fiafia lava i ai. Sa ou maua ni uo fou i tagata o la’u vaega, ma sa matou tuputupu ae e faatuatuaina le faamasinoga a le tasi ma le isi ma fesoasoani le tasi i le isi i le galuega ma i le olaga lautele. Sa ou matuai faafetai lava mo le tuputupu ae na uunaia au e le Tama Faalelagi ia ou oo muamua i ai. Ana leai, semanu ou te le saunia mo lenei galuega!
O le “Leai” e ono faauigaina “E Le’i Oo i Le Taimi”
Na aoao mai Peresitene Dallin H. Oaks, Fesoasoani Muamua i le Au Peresitene Sili: “O le taimi a le Alii … e faatatau i mea taua e tutupu i o tatou olaga patino. O loo folafola mai e se fuaiupu maoae i le Mataupu Faavae ma Feagaiga e faapea, o le a oo mai ia i tatou se aafiaga faaleagaga faapitoa ‘i lona lava taimi, ma i lana lava ala, ma e tusa ai ma lona lava finagalo’ [Mataupu Faavae ma Feagaiga 88:68]. E faatatau lenei mataupu faavae i faaaliga … ma i mea uma e sili ona taua na tutupu i o tatou olaga: fanau mai, faaipoipoga, maliu, ma e oo lava i lo tatou siitia atu mai lea nofoaga i lea nofoaga.”2 Po o le a lava le mea o loo tatou faatalitali i ai, e mafai ona tatou faatuatuaina le taimi a le Tama Faalelagi ma faaauau pea i luma i le faatuatua.
Aua le fiu i le ausiaina o faamanuiaga e te manao i ai ma le amiotonu, ma aua le popole pe afai e le vave ona oo mai e pei ona e faamoemoeina. Nai lo lena, ia taulai atu pea lou ala i luma i luga o le ala o feagaiga, aoina mai o tomai, to’a, ma fesootaiga i luga o le ala. Mafaufau po o le a le mea atonu o loo finagalo le Tama Faalelagi e aoao atu ia te oe pe o faapefea ona Ia fesoasoani ia te oe ia tuputupu ae a o e faatalitali mo faamanuiaga o loo e sailia.
Afai o loo faaauau pea ona e laa atu i au sini ma e faatuatua i le taimi a le Alii, o loo e i ai i le ala sa’o. Ma i se aso, pe a e molimauina ni faamanuiaga patino i lou olaga, atonu o le a e iloa ai ina ua e manatu ua ta’u atu e le atulaulau ia te oe le “Leai,” atonu o le taimi lava lea na ta’u atu ai e le Tama Faalelagi ia te oe “E le’i oo i le taimi.”