Ua Na’o Tusiga Faaeletonika
E Faapefea Ona Ou Tuuina Atu La’u Lauga i se Gagana Sa Ou Aoaoina Pea?
I le avea ai ma se taitai misiona, sa ou aoao ai e faalagolago i le Alii tusa lava pe ou te lagonaina le le atoatoa.
Ata na pueina e Karel Denisse Calva Sanchez
A o auauna ai i Santiago, Chile, o se taitai misiona ma lo’u toalua, o le sa avea ma se peresitene o le misiona mai le 2012 i le 2015, sa ou aoaoina ai nisi o lesona na suia ai le olaga e uiga i le moni o vavega ma le auala na latou oo mai ai. O le taliaina o lenei valaauga na ou aluese ai mai lo’u tulaga mafanafana ona o lo’u le mafai ona tautala i le gagana o la matou misiona. Sa vave ona ou lagonaina le lofituina i le le atoatoa.
I le amataga o le misiona, sa fesoasoani se valaau mai o se tagata o le aiga ia te au e iloa ai sa ou taulai tele ia te au lava ia ma o’u tauiviga. O le manatuaina o le fautuaga na faasoa mai e Peresitene Gordon B. Hinckley (1910–2008) mai lona tama e “faagalo oe lava ma alu e galue,”1 sa ou filifili ai e sui la’u taulaiga. Soo se taimi lava ou te lagona ai le lotovaivai, ou te fesili ifo ia te au lava, “O ai o loo e mafaufau i ai?” O le tali lava o a’u. O lea sa ou salamo ai ma liliu atu o’u mafaufauga i fafo atu. Sa ou filifili e taulai atu i faifeautalai, i latou sa latou aoaoina, po o lo’u aiga.
Sa ou taumafai foi e manatua le mea e mafai ona ou faia, ae le o le taulai atu i mea sa le mafai ona ou faia. E mafai ona ou ataata, tuu atu ni opo, ma galue i le aoaoina o le faaSipaniolo, e ui lava o lona uiga o le toilalo soo. Sa masani ona matou o ma tamaitai faifeautalai (nai lo le lafi i le fale o le misiona i le mea sa saogalemu ai), e tusa lava pe na ou lagonaina e le tele se mea e mafai ona ou faaopoopo i ai.
Po o le a lava le umi sa ou naunau ai e faia pea ni laa laiti o le faatuatua, sa ou lagonaina le mana faamalosiau o Keriso e ala i Lana taulaga togiola e fesoasoani ia te au e faatoilalo o’u vaivaiga (tagai Iakopo 4:7). A o ou mafaufau loloto i aafiaga sa ou oo i ai, sa ou iloaina se mamanu faapena i olaga o tagata e sili ona ou fiafia i ai i tusitusiga paia. O la’u tusiga lenei i le api talaaga mai ia Oketopa 2014:
“O faataitaiga mai tusitusiga paia o tagata ua filifili e o ese mai o latou sone mafanafana e toatele—e pei o Maria le tina o Iesu, Ruta, Eseta, Paulo, Enoka, Liae ma Nifae, Alema, Amona ma ona uso, o Samuelu, Apinati, o sa Lamana talavou e 2,000, Iosefa Samita, ma le tele o isi. O i latou uma nei na talisapaia avanoa na lamatia ai i latou. Sa le mafai ona latou valoia pe pulea le taunuuga o o latou tulaga. Sa tuuina i latou i ni tulaga e sili atu nai lo o latou tulaga mafanafana o le masani ai, ma le tulaga matautia o le lamatia, tiga, mafatiaga, teenaina, ma le toilalo na mafai uma, ma fatuina ai se manaoga ina ia laveaiina e le Agaga ma meaalofa mai le Atua.
“O le tagata natura [tagai Mosaea 3:19] e manao i le mautinoa, saogalemu, ma le puleaina, ae ua ou aoaoina e le o le amataga lena e galueaiina ai e le Atua Ana vavega. O lo’u aafiaga iinei ua aoaoina ai a’u e faapea a filifili tagata e faatapulaa mea latou te mafaia ma o le a latou faia, e faavae i mea latou te fiafia i ai pe aloese mai le toilalo, ua latou faatapulaaina mea e mafai ona faia e le Atua ma i latou. E foliga mai e sili atu ona Ia faia Ana vavega faatasi ma i tatou pe a tatou tuua i tatou lava e vaivai [i Lona finagalo], a o tatou naunau e laa atu i mea e le mailoa … ma faalagolago atoatoa atili i lo tatou faatuatua ia te Ia ae le o o tatou lava tomai. Ua ou aoaoina afai e sili atu lo’u popole i le aoaoina, tuputupu ae, ma le avea ma se faagasologa nai lo le lamatia o le toilalo, ou te faaavanoa au lava mo le mana faamalosiau ua ofoina mai e le Togiola a Iesu Keriso ia te au.”
O se tasi o aafiaga na fesoasoani ia te au e aoao ai lenei lesona na tupu ina ua asiasi mai Elder Jeffrey R. Holland o le Korama a Aposetolo e Toasefululua i la matou misiona, faatasi ai ma isi misiona e tolu i Santiago. E silia ma le 1,000 faifeautalai na potopoto i le matou falelotu lea na talosagaina ai lo’u toalua e taitaia le sauniga. Sa ulu atu Elder Holland i le falelotu, nofo i talane o lo’u toalua, ma punou mai ia i ma’ua, ma faapea mai, “Ua lelei, o le mea lenei o le a tatou faia. Sister Wright, o le a e saunoa muamua ma fai ma sui o faletua uma o peresitene o misiona iinei. Ona mulimuli ai lea o Peresitene Wright.”
O le mea moni ou te lei lagonaina le vaega na totoe o le polokalama. Ou te lei mafaufau lava o le a fai mai Elder Holland ou te lauga, o lea sa ou le faia ai ni sauniuniga. Ou te manao i se taimi e sauni ai e tautala atu, se taimi e ao mai ai o’u mafaufauga ia tau lava o sina taimi, ae o le a ou lauga i le taimi lava e uma ai le viiga ma le tatalo amata.
Ina ua amata ona faataamilo o’u mafaufauga, sa faafuasei ona ou lagonaina le manao e faasoa atu la’u savali i le faaSipaniolo. Peitai, e ui ina sa atoa lo matou tausaga i le misiona, ma sa ou galue malosi e aoao le faaSipaniolo, sa ou tauivi pea i le gagana, ma sa mautinoa lava ou te le lelei tele ai. Sa avanoa le tagata faaliliu pe afai ou te tautala i le gagana Peretania, ae o se misiona faaSipaniolo lenei, ma sa ou manao moni lava e lauga i le faaSipaniolo. O le tautala o se mea faigata lea mo a’u e fai i le gagana Peretania; o le tautala faaSipaniolo na pei o se laasaga tele. O lea i le totonugalemu o leo o faifeautalai e 1,000 o loo lagiina le “Tofia e Auauna” (Viiga, 156), sa ou manava loloa, ta’uta’u atu lo’u le atoatoa i lo’u Tama oi le Lagi, ma aioi atu mo se fesoasoani ina ia laveaiina e le Agaga.
Sa ou ta’u atu i le Tama Faalelagi ou te le iloa po o le a sa’u tala e fai atu pe faapefea ona fai atu i le faaSipaniolo, ae sa ou folafola atu ia te Ia o le a ou tatalaina lo’u gutu ma faia le mea sili ou te mafaia, ma le faatuatua o le a Ia faatumuina (tagai Mose 6:32). I lena taimi, sa ou lagonaina se faamautinoaga toafilemu ua oo mai i o’u luga. Ina ua uma le tatalo sa ou tulai i le pulelaa ma amata ona tautala. O upu sa ou mafaufau loloto muamua i ai i lena taimi na manaomia ai, e oo lava i le gagana ese sa ou tauivi ai e fesootai atu i ai. Sa ou nofo i lalo i le uma ai o la’u tautalaga puupuu e tolu minute, i le lagonaina pea o le filemu ae le i mautinoa pe na lelei la’u talanoa atu.
Ina ua uma le sauniga, sa sau le tuagane sa faaliliu mo Elder Holland ia te au ma fai mai, “Sister Wright, ou te lei iloa e lelei lau tautala faaSipaniolo!” Sa ou tali atu, “E le lelei.” Sa ia faamautinoa mai ia te au ou te lei faia ni mea sese.
Ou te mautinoa e leai se tasi o na faifeautalai e manatuaina se mea e uiga i la’u savali puupuu i lena aso. Ae mo au, sa o se aafiaga na suia ai olaga. Sa ou aoao e tuu atu lo’u faatuatuaga i le Tama Faalelagi ma le Faaola, ina ia mafai ma o le a La faamalosia a’u e ui i o’u vaivaiga i lo’u naunau ai e faia i le faatuatua. Ana faapea ou te filifilia le ala saogalemu ma faaaoga le tagata faaliliu, semanu ou te le iloaina lava le auala e La te laveaiina ai i tatou pe a tatou tuuina atu i tatou lava e faamuamua le Atua.2
Ou te faamemelo lava i lenei vaega o le faauigaina o le “Alofa Tunoa” i le Lomifefiloi o le Tusi Paia: “O le … e ala i le alofa tunoa o le Alii e mafai ai e tagata taitoatasi, e ala i le faatuatua i le Togiola a Iesu Keriso ma le salamo i a latou agasala, le malosi ma le fesoasoani e fai ai galuega lelei, semanu e le mafai ona latou tausia pe ana tuu i lo latou manao.”
Na ou lagonaina Lona alofa tunoa i lena aso. O le faaaogaina o lena faatuatua iti na ou maua ai le lototele e toe alu ese ai mai lo’u tulaga mafanafana i le lumanai. O le toilalo o le a avea pea ma se vaega o le faagasologa o le aoaoina, ma sa ou lagonaina le tele o lena mea i le gagana mo le vaega na totoe o la’u misiona. Ae ina ua sili atu ona taua, sa ou lagonaina le lagolago ma le malosi o Iesu Keriso na siitia ai au i luga atu o o’u tomai faalenatura ina ia mafai ai ona avea a’u ma meafaigaluega i Ona aao lea na Ia manaomia ai a’u ia faamanuiaina isi. O lo’u faatuatua ma le faalagolago ia te Ia ua matua faatupulaia lava, o le meaalofa aupito silisili lea na ou aveina i le fale mai la matou misiona. E oo ane i le taimi na matou o mai ai i le fale, sa mafai ona ou tautala lelei i le faaSipaniolo, ma ua mafai nei ona ou faaaogaina e auauna atu ai i isi o se volenitia i lo’u nuu ma i le paranesi Sipaniolo lea o loo matou auai ai i le taimi nei i le lotu.
O loo iai sa’u molimau e faapea “afai e o mai tagata ia te au o le a ou faaali atu ia te i latou o latou vaivaiga. Ou te avatu i tagata ia vaivaiga ina ia faalotomaualalalo ai i latou; ma ua lava lo’u alofa tunoa mo tagata uma o e e latou te faalotomaualalaloina i latou lava i o’u luma; aua afai latou te faalotomaualalaloina i latou lava i ou luma, ma faatuatua mai ia te a’u, ona ou faia lea o mea vaivai ia avea ma mea malolosi ia te i latou” (Eteru 12:27).
Faamatalaga