Alofa, Lotogatasi, Faaaloalo, ma le Faauoga—Savali Lata Mai mai Perofeta ma Aposetolo

“Filifili e agalelei atu i isi. Ina ua asiasi atu le Faaola o Iesu Keriso i Amerika, e pei ona tusia i le Tusi a Mamona, o se tasi o mea muamua na Ia aoao atu o le manaomia lea ona aveese finauga i o tatou olaga. O lea, faamolemole ia agaalofa, ia malamalama, ia faatelegese ona faamasino, ma ia vave ona faamagalo atu.”

“O le faauo ma le faaaloalo e mafai moni lava ona laveaiina ola.

“Sa ou i ai faatasi ma i latou o e sa galulue e fau se masini o le fatu-māmā, lea na fesoasoani i uluai taotoga o fatu. Sa i ai se agaga maoae o le galulue faatasi ma le faaaloalo i nisi o i matou sa galulue i lena eria fou o suesuega faafomai. Sa matou iloa o la matou tauvaga moni lava o le tetee atu lea i faama’i ma le oti. O lo matou galulue faatasi i le tuuga o le amataina o ni faiga faavae fou faafomai na faasaoina moni ai lava ni ola.

“E mafai ona feeseesea’i ma isi e aunoa ma le solia o le poloaiga a le Faaola ia ‘outou fealofani, pei ona ou alofa atu ia te outou’ (Ioane 15:12). E mafai ona ese se manatu nai lo lou tuaoi a o alofa pea i lena tuaoi. E mafai foi ona ‘tauva’ i se agaga o le fefaaaloaloai lea e aumaia ai le mea sili i tagata uma.

“Tau ina ia tatou manatunatu patino i mea e mafai ona tatou faia e aveesea ai finauga mai o tatou lava olaga a o tatou talisapaia le … lelei tele, faauoga, ma le faaaloalo.”

“Matou te talisapaia nei avanoa e fausia ai faigauo ma talanoaina ni fuafuaga fefaasoaai lea o le a faaauau ai pea ona faatupuina le malamalama ma le faaaloalo.

“O na faigauo e faatamaoaigaina ai o tatou olaga ma atagia ai aoaoga taua a le Faaola. …

“Ou te toe faamamafa atu lo’u valaauga¹ i tagata o le Ekalesia i soo se mea ina ia lafoai uiga ma faatinoga o le faaitu’au ma ia siitia atu le faaaloalo mo fanau uma a le Atua. O se faailoga lenei o soo moni uma o Iesu Keriso.

“O le lafoaia o le faaitu’au e tatau ona sili atu nai lo mea tatou te tautalagia i le pulelaa. E manaomia foi ona tatou lafoai faamatalaga tiga ma le le magafagafa i a tatou talanoaga, i a tatou savali patino i le tasi ma le isi ma luga o ala o faasalalauga faaleagafesootai, ma, o le mea e sili ona taua, i o tatou lava loto. O le a tupu lenei mea pe a tatou talisapaia atoatoa ia aoaoga a le Faaola o Iesu Keriso, o le na fetalai mai, ‘Ia outou fealofani; faapei ona ou alofa atu ia te outou’ (Ioane 13:34).

“Tau ina ia tatou taumafai e mulimuli ia te Ia e ala i le ola e tusa ai ma Lana faataitaiga agalelei, alofa, ma faaaofia ai.”

“E ui lava o loo matua le mautonu lava lo tatou sosaiete i le puleaina o le sootaga i le va o le saolotoga o tapuaiga ma le le faailoga tagata, ou te talitonu e le tatau ona tumau ai. … I le avea ai ma se Aposetolo a le Alii o Iesu Keriso, ou te fautuaina le tulaga taualoa ma faiga faaupufai o le faaleleia o feteenaiga o loo i ai nei ma aloese mai feteenaiga fou.

“I le avea ma se faavae o le ola faatasi, e tatau ona tatou taliaina le mea moni o i tatou o tagatanuu o e manaomia le tasi ma le isi. O lenei mea e manaomia ai ona tatou taliaina nisi o tulafono tatou te le fiafia i ai, ma ia ola filemu ai ma nisi o tagata e ese o latou tulaga faatauaina mai o tatou lava tulaga. Pe a fautua mai e nisi le faatiga pe faataitai ni faaosoosoga laiti, e tatau ona le amanaiaina i latou e itu uma e lua. Ua tele naua fefinauaiga mataga i lo tatou sosaiete. Afai tatou te tali atu iai, ua tatou faia foi na uiga faatiga.

“O le mamao mai le avea ma se vaivaiga, o le faaleleia o tulaga faigata e ala i feutagaiga faaaloalo o se uiga mama. E pei ona sa aoao mai e Iesu, “Amuia e faatupuina le filemu: aua e ta’ua i latou o atalii o le Atua” (Mataio 5:9).

“O mea uma e manaomia mo le lotogatasi ma se tuufaatasiga lautele e siitia ai o tatou manaoga masani mo le saolotoga o tapuaiga, o lo tatou talitonuga tutusa lea ua poloaiina i tatou e le Atua ia alofa le tasi i le isi, e aofia ai o tatou tuaoi e eseese talitonuga ma aganuu.”

Ou te lagona le malamalama, le faamoemoe, ma le molimau lea e oo mai mai le faatosinaga a le Agaga Paia i taimi uma ou te manatua ai, mafaufau loloto e uiga i ai, ma taumafai ia faataitai i le Faaola o le Lalolagi.

“… E tatau ona tatou taumafai ia alofa e pei ona Ia alofa mai.

“Na te le’i faia se eseesega i le va o e matitiva ma e mauoa, talavou pe matutua, o e maloloina pe mama’i. E le’i ‘aloese o Ia ia i latou e ese o latou faatuatuaga ma tulaga faaleaganuu. Sa alofa o Ia i tagata uma. E alofa o Ia i tagata uma. Ma ua Ia poloaiina i tatou “ia outou fealofani” e pei ona Ia alofa mai ia i tatou (Ioane 15:12).”

“E momomo lo’u loto i le mafaufau faapea o le a le lagonaina e se tasi o loo i ai se nofoaga mo i latou i le lotu i le Aso Sa. O loo i ai se nofoaga mo fanau uma a le Tama Faalelagi. O i tatou uma taitoatasi o se tagata faapelepele o le aiga o le Atua. Sau! Po o fea lava o e i ai, ma po o ai lava oe. …

“Ou te faamoemoe o le a galulue tagata o le uarota i se agaga o le lotogatasi e faaaofia ai e le tasi le isi. Nai lo le faamasinoina o le tasi ma le isi, e tatau ona tatou manatua o le Faaola o Iesu Keriso e na o lo tatou tuputupu ae patino e taulai i ai. E le tatau ona tatou faatusatusaina i tatou lava i isi. Ia tatou alolofa i le tasi ma le isi, ma manatua e oo lava ia te Ia ‘sa alualu pea mai lea alofa tunoa i lea alofa tunoa, seia oo ina maua e ia le atoatoaga’ [Mataupu Faavae ma Feagaiga 93:13].”

“Ou te matua faafetai mo le iai o ni uo faamaoni i lo’u olaga.

“O Reverend Dr. Andrew Teal, o le failotu ma le tagata suesue i tapuaiga i le Iunivesite o Oxford, o se tasi o na uo. Ina ua ma feiloai, sa lagonaina e peiseai ua leva ona ma masani. E agaalofa, faamaoni, ma agalelei tele o ia. O le ma faigauo e sili atu nai lo eseesega faalelotu ma faaleaganuu ia e ono taumamao ai i ma’ua. Nai lo lena, ma te taulai atu i le tele o mea e tutusa ai mea ma te faasoaina, e pei o lo tatou alolofa i le Atua ma le manao e faasoa atu Lona alofa i isi.

“Ua ou aoaoina se mea maoae mai le tomai masani o Andrew e alofa ma talia ona uso ma tuafafine. Na te teena le manatu faapito ma e ala i faatinoga le faatuaoia, e faafeiloaia ai tagata mai soo se ituaiga o le olaga i totonu o lona loto foai. Sa faamanuiaina ma’ua ma Pat i lena alofa ma le taliaina a o ma asiasi atu ia te ia i Oxford mai lea taimi i lea taimi.

“Siomia oe lava i uo faamaoni e le gata ina e fiafia i ai ae e mafai ona e aoao mai ai ni lesona taua. I lenei auala e mafai ai ona tatou faataunuuina le poloaiga aupito sili lona lua, ‘ia e alofa atu i lē lua te tuaoi, ia pei o oe lava ia te oe’ [Mareko 12:31].”

“I le avea ai ma tagatanuu o le lalolagi, e tele atu mea tatou te tutusa ai nai lo le mea tatou te manatu i ai. E le gata ina moni lena mea mo i tatou o ni tagata O Le Ekalesia a Iesu Keriso o le Au Paia o Aso e Gata Ai, ae faapea foi mo fanau uma a lo tatou Tama Faalelagi. …

“Afai o le a na ona tatou taulai atu i aafiaga o le olaga ma faamoemoega tatou te tutusa ai, e le tatau ona faigata tele ona fegalegaleai ma tagata taitoatasi, nuu, ma malo—e tusa lava po o fea tatou te nonofo ai ma e tusa lava po o a o tatou talaaga po o tulaga o le olaga.

“Afai e iai se mea ua tatou aoaoina mai i le talafaasolopito o le lalolagi, ua tatou aoao ai o se uiga faaletagata o le mafaufau ia i tatou lava o se ‘tagata lelei’—o ni toa o le tala. Ma i latou e ese o latou manatu ma amioga? Ia, o ‘tagata leaga’ na.

“Pe a tatou vaai atu i isi o ni fili, tatou te vaavaai mo mea e sili ona leaga ia i latou ma le mea sili ia i tatou.

“Tatou te faamasinoina lo tatou itu i o tatou faamoemoega lelei, ma lo latou itu i a latou faatinoga leaga.

“Ua aoao mai i tatou e le talalelei a Iesu Keriso ina ia faateleina le alofa i o tatou loto seia oo ina tatou vaai atu i alii ma tamaitai uma o ni o tatou tuaoi—o o tatou uso ma tuafafine. O Lana talalelei e tuufaatasia ma laugatasia ai alii, tamaitai, ma tamaiti uma. O loo aoao mai ai e le o i tatou o ni fili, ae o ni aiga paia ma faavavau e tasi; o atalii ma afafine o se Tama Faalelagi alofa.”

“O faauoga o se vaega taua tele o o tatou olaga. A o tatou osia ma ola i a tatou feagaiga ma le Atua, tatou te maua le faauoga ma le taliaina o le tasi i le isi. I le i ai i se feagaiga, tatou te faamalosia le tasi ma le isi i le alofa o le Faaola, lea e mafai ai ona faateleina le alofa i le Atua ma isi. O le i ai i le Atua ma i isi i totonu o feagaiga o le ataata lea i nofoaga e le faamoemoeina a o tatou vaai i mata e vaai ai ma faalogo i taliga e faalogo ai. Na te suia i tatou ma a tatou sootaga ina ia avea atili e faapei o Ia ma sootaga e pei ona Ia faia. Tau ina ia faamalolosia i tatou i a tatou sootaga ma le Alii ma le tasi ma le isi a o tatou savavali faatasi i o tatou ala o le olaga.”