O Se Mamanu e Aloese ai Mai le Lagonaina o le Pa’ulia

A o taumafai e ola i le talalelei o se tagata matua nofofua, e mafai ona faigata ona le taulai atu i ni vaega patino o tatou olaga lea tatou te moomoo maimau pe ana ese. O nisi taimi e lagona ai e pei ua leai se faamoemoe i lo tatou alualu i luma. Mo au, o na lagona o le pa’ulia i nisi o itu e foliga mai e fetāa’i solo, ma e mafai ona i ai pea faatasi ma au i ni aso, masina, ma faasolosolo ai lava i tausaga. E tele lava mafuaaga ou te fiafia ai ma maua lagona lelei e uiga i le olaga, ae i se tasi taimi, na matuai taia ai au i lenei lagona o le pa’ulia.

I lena taimi, sa talosaga mai le atalii o lo’u uso e fia faaalu sona taimi ma a’u. Sa ia iloaina se manaoga mo ni sini i lona olaga ma talosagaina se fautuaga. Ou te lei lagonaina moni sa ou i ai i se tulaga o le malosi e ofo atu ai se atamai sili, ae sa ou faalogo. Sa ou iloa e mafai ona ou “tagi atu” i le Atua mo se fesoasoani (tagai Alema 34:17–27) ma tatalo ina ia mafai ona ta’u atu i se mea anoa mo ia. I se tali atu, sa ou manatua le Luka 2:52: “Ua tupu le poto ma le tino o Iesu, ua alofagia o ia e le Atua atoa ma tagata.”

A o ou taumafai e taulai atu i manaoga o lo’u tei nai lo au lava, sa i ai se mea na amata ona suia ia te au. Sa ma talanoa ma lo‘u tei e uiga i le ala na tuputupu ae ai Keriso faaleagaga, faaleagafesootai, faaletino, ma faaleatamai ma e faapena foi i ma’ua. E ui ina eseese manaoga o lo‘u tei mai ia te a’u, ae o nei vaega e fa o le tuputupu ae sa tāua ia i ma‘ua uma. A o talanoa e uiga i lenei mau, sa ou iloa ai o le taliina lea o a‘u lava fesili e uiga i le auala e aluese ai mai le pa’ulia.

A o ou taumafai e tuputupu ae e faapei ona sa tuputupu ae ai le Faaola, sa suia lau taulaiga, ma o lena suiga na aumaia ai faamanuiaga faaopoopo. E pei ona saunoa mai Peresitene Russell M. Nelson, “O le olioli o tatou lagonaina e itiiti lava se mea e faatatau i tulaga o tatou olaga ao mea uma o loo faatatau i le taulaiga o o tatou olaga.”¹ O a’u taumafaiga e tuputupu ae atili e faapei o Iesu Keriso na fesoasoani e tata’i ese lo’u mafaufau mai tulaga na faaleagaina ai la‘u taulaiga ma toe faasino atu ai i vaega e mafai ona ou galue lelei ai. Sa mafai ona ou see mai i le mafaufau i ai agai i le faatinoina.

Sa ou mafaufau ma le naunautai pe faapefea ona ou tuputupu ae i vaega taitasi o loo ta‘ua i le Luka 2:52, mai le auai atu pea lava pea i le malumalu i le faamaeaina o se tuuga uila umi.

Ata

Malumalu o Memphis Tennessee

Ata pue o le Malumalu o Memphis Tennessee na pueina e James Whitney Young

I vaega taitasi o a‘u sini, sa ou faia ai ni nai mātauga:

1. A o galue i se sini e tasi, sa masani ona ou lagonaina Keriso o faamalosi ia te au faaleagaga, faaleagafesootai, faaletino, ma faaleatamai i totonu atoaa o lena sini e tasi.

2. E seāseā lava, pe afai e i ai, na tupu ai se sini i le faaesea mai isi vaega o le tuputupu ae—sa foliga mai na aafia ma atiina ae i le tasi ma le isi. O le faaleleia i se tasi vaega na taitai atu ai i le faaleleia atili i isi vaega uma. O le faatalalē i soo se vaega e faapena foi ona aafia ai isi vaega uma. Sa ou iloaina o vaega taitasi e tatau ona gauai atu i ai.

3. E toetoe lava o sini uma na aofia ai isi tagata—a lē o le aoao mai ia i latou o le fefaasoaai o manatu ma aafiaga ma i latou—ma faalolotoina a tatou mafutaga.

E faaauau pea ona ou maua le avanoa e vaai ai ma musuia e ala i le tuputupu ae i isi, ma ou te faamoemoe e mafai ona ou faia lea lava mea e tasi mo i latou. Sa ma talanoa talu ai nei ma se uo nofotoatasi o lagonaina le pa’ulia ma le lē fiafia i nisi o tulaga o le olaga. Sa ou faalogo ia malamalama, ona mafai lea ona ou faasoa atu ni aafiaga na fesoasoani ia te au ma faasino atu foi vaega taitasi o le toe tuputupu ae i le Faaola.

E ui e le o vaega uma o le olaga na ou lagonaina ai le pa’ulia i tausaga ua mavae ua suia, ae ua ou suia foi a o ou aoao e taulai atili atu i le Faaola ma taumafai e tuputupu ae faapei o Ia. E pei ona sa faasoa mai Peresitene Nelson, “E tele mea e mafai ona tatou pulea. Tatou te faatulaga a tatou lava mea e faamuamua ma fuafua pe faapefea ona faaaoga lo tatou malosi, taimi, ma punaoa. … Tatou te filifili i latou o ē o le a tatou liliu atu i ai mo le upumoni ma le taitaiga.”² Po o a lava o tatou tulaga, o vaega o le tuputupu ae i le Luka 2:52 e mafai ona fesoasoani ia i tatou e suia ai la tatou taulaiga ma maua ai le olioli faaopoopo ma le alualu i luma e ala i le Tama Faalelagi ma le Faaola.