“Toe Taumafai,” Liahona, Sete. 2022.
O Leo o le Au Paia o Aso e Gata Ai
Toe Taumafai
Sa ou pisi i le faia o mea lelei, ae sa faaletonu la‘u sootaga ma le Alii ona sa ou le amanaiaina se mea e sili atu ona tāua.
Ina ua maea la‘u misiona ia Ianuari 2019, sa ou mautinoa o le a faigofie ona faaauau la’u suesuega o tusitusiga paia i aso taitasi. I le taimi muamua, na moni lena mea. A uma le galuega, ou te sau i le fale ma faitau a‘u tusitusiga paia e pei ona masani ai. Sa ou fiafia lava e tuuto atu pea i le faitauina o tusitusiga paia ma le aoaoina e uiga i le Faaola.
Na suia lena mea ia Iuni 2019 ina ua toe foi mai la‘u uo tama mai lana misiona. Sa amata loa ona ma tafafao faamasani ma ma faamau ai i le ono vaiaso mulimuli ane.
I le pisi o le fuafuaina o se faaipoipoga, galuega, alu i le kolisi, ma le faaaluina o le taimi faatasi ma la‘u uo, sa vave ona faaitiitia la’u suesuega o tusitusiga paia i ni nai taimi i le vaiaso. Ona sa faalavelaveina au i mea lelei, o lea sa ou lē amanaiaina ai ma le lē iloa lo‘u sootaga ma le Alii.
Sa ma faaipoipo ma lo’u toalua ia Novema 2019. Ina ua mavae aso malolo, sa ou taumafai e faaauau mai le mea sa ou gata mai ai i tusitusiga paia. Mo ni nai masina, na lelei ai lava a ma suesuega o tusitusiga paia ma lo’u toalua. O taeao taitasi mo ni nai minute ma te faitauina ai tusitusiga paia ma talanoaina se lesona o le Sau, Mulimuli Mai ia te Au ae ma te lei taufetuli atu i fafo o le faitotoa e faigaluega po o le aoga.
Ona oo mai lea o le faama‘i pipisi o le KOVITI-19. A aunoa ma fuafuaga faaleaoaoga ma faatulagaga o galuega, ua leai sa ma faatinoga masani o le suesueina o tusitusigag paia i le taeao. Na ma suesue ae e lē o taimi uma, ma sa faaletonu le matou mafutaga ma le Alii. E oo lava i le mavae ai o le aveesea o tapu ma toe foi mai i le lotu, sa ma tauivi pea e suesue.
E masani ona i ai taimi e faigata ai i tagata o le Ekalesia ona faitau e lē aunoa a latou tusitusiga paia. E pisi o tatou olaga, ma tatou te feagai ma luitau i aso taitasi. Peitai, e lē afaina lava le toe amata.
“E le o faamoemoeina e le Alii se atoatoa mai ia i tatou i lenei taimi i lo tatou alualu i luma e faavavau,” na saunoa ai Peresitene Russell M. Nelson. Ae, sa ia faaopoopo mai, “e mafai e i tatou uma ona faia ia lelei atu ma ia tatou lelei atu.”1
Sa ma toe tuuto atu talu ai nei ma lo‘u toalua i le faitauina o a ma tusitusiga paia. Ma te lē o atoatoa lava i ai, ae ma te taumafai i aso taitasi e faamalosia a ma molimau. Ou te faafetai mo le tele o avanoa ua tuuina mai e le Alii ia i maua e salamo ai, faia ia sili atu, ma ia lelei atu.