“Sa Ia Faataatia le Ala ma Taitaia le Auala,” Liahona, Fep. 2023.
Sa Ia Faataatia le Ala ma Taitaia le Auala
Pe a tatou mulimuli ia Iesu Keriso, i le faia o mea sa Ia faia, e mafai ona tatou toe foi atu ma le mautinoa i lo tatou aiga faalelagi.
Ua Valaauina e Keriso ia Peteru ma Aneterea, saunia e Harry Anderson
I ni nai tausaga ua mavae, sa tonu ai ia te a’u ma lo’u aiga e savali sopo i se alasopo mauga i Aisalani e vaai i se afu lauiloa. Matou te le’i oo muamua lava i lenei mauga. Sa matou lē mautonu e uiga i le alasopo, ma e lē o i matou o ni tagata sopo.
Sa matou vaavaai atu i isi o amataina le alasopo ma mulimuli ai. E le’i leva, ae leiloa atu i latou i le vaai, ma sa faapena foi le alasopo. Sa matou tilotilo ma le faaeteete ma mātauina faaputuga o maa sa tuuina ma se faamoemoe, e ta’ua o maafaailoga, i ni vaeluaga masani sa faailogaina ai le ala agai atu i le afu. Sa oo ina matou mautinoa afai e mafai ona matou maua ia maafaailoga, o le a latou taitai atu i matou i le afu.
O vaega o le eleele e lata ane i le alasopo na faaalia ai le mutia fulufulu paepae,1 lea e tupu i laufanua taufusi. O le laa atu i totonu o le vao vavae na matuā palapalā ai lava o matou seevae ma faatumulia i vai. Sa matou aoao mai lea mea o le mutia vavae na faailogaina ai se ala matou te le’i mananao e mulimuli ai.
Sa le’i faigofie le alasopo. O nisi taimi sa maualuga, ma sa matou lelavavā ai. Ae sa matou faaauau pea, ma gauai atu ma le toto’a i maafaailoga ma aloese mai le mutia vavae. Na iu lava ina tauia a matou taumafaiga. Sa matou taunuu atu i le afu matagofie ma fiafia i le vaaiga mai le tumutumu mauga ma le faafouina o le vai.
A o matou sāvali atu i lalo o le mauga, sa matou vaaia ni tulaga lamatia matou te le’i vaai muamua i ai. Sa fesoasoani maafaailoga ia i matou e aloese mai vaega loloto o le vai ma tofē tifato. Sa matou faafetai i na maafaailoga na taitai atu ai i matou ma le saogalemu i la matou sini.
O la tatou faigamalaga i lenei olaga e pei lava o lenei savaliga sopo i le taumafanafana. Tatou te mananao e toe foi atu i lo tatou aiga faalelagi, ae e mafai ona faigata ona faatautaia le ala. A o tatou suesue i le soifuaga ma aoaoga a Iesu Keriso, e mafai ona tatou aoao i le auala na Ia faatautaia ai le olaga faaletino, ma tuu ai maafaailoga faafaatusa mo i tatou e mulimuli ai. Pe a tatou mulimuli i na maafaailoga, faia o mea na faia e Iesu, e mafai ona tatou toe foi atu ma le mautinoa ma taunuu i lo tatou taunuuga.
Maafaailoga 1: Iloa Po o Ai i Tatou
Na oo ina silafia e Iesu Keriso Pe o ai Ia (tagai i le Luka 2:49). E ui tatou te lē iloa pe o a Ona lagona a o papatisoina o Ia e Ioane, ae atonu sa faamafanafanaina e le faamautinoaga paia ina ua fetalai atu Lona Tama ia te Ia “mai le lagi, ua faapea mai, O lo’u Atalii pele oe, ou te fiafia ia te oe” (Mareko 1:11).
Faatasi ai ma le talitonuga i Lona faasinomaga, sa mafai ai e Iesu Keriso ona tautino atu ia Peteru ma Aneterea, “O au o le ua tusia i ai e perofeta” (Iosefa Samita Faaliliuga, Mataio 4:18 [i le Mataio 4:19, vaefaamatalaga a]). Ma i le fafine Samaria, sa Ia tautino atu ai, “O a’’u lava lenei, o lē tautala atu ia te oe [lena Mesia, lea ua ta’ua o Keriso]” (tagai i le Ioane 4:25–26).
O le iloaina po o ai i tatou o se maafaailoga tāua autu. O lo tatou faasinomaga sili ona tāua o le, i le avea ai ma fanau a le Atua, e tusa lava po o le a se isi mea tatou te filifili e faailoa ai i tatou lava. Afai tatou te lē mauaina lenei faailoga, e mafai ona tatou se ese mai le ala ma iu atu ai i le mutia vavae.
Maafaailoga 2: Iloa le Finagalo o le Tama Faalelagi
Sa saili Iesu Keriso ia iloa le finagalo o Lona Tama. I le mavae ai o Lona papatisoga, “Ona aveina ai lea o Iesu i le vao e le Agaga, ina ia faatasi ai ma le Atua.
“Ma ina ua uma ona anapogi o ia i ao e fagafulu ma le fagafulu po ma talanoa ma le Atua, sa iu ina matelāina o ia ma tuua ai e faaosoosoina e le tiapolo” (Faaliliuga Iosefa Samita, Mataio 4:1–2 [tagai foi i le Mataio 4:1–2, vaefaamatalaga 1e, 2c]; faaopoopo le faamamafa).
Aisea na afio atu ai Iesu i le vao e talanoa ma le Atua? E talafeagai le talitonu faapea sa Ia faia ina ia aoao ai i le finagalo o Lona Tama, ina ia leai se masalosalo po o le a le finagalo o le Atua mo Ia. E faapena foi, ina ia tatou aoao i le finagalo o le Atua mo i tatou o se maafaailoga. Afai tatou te lē iloa po o le a le finagalo o le Atua mo i tatou, o le a tatou feofeoai solo i le vao vavae.
Tatou te aoaoina le finagalo o le Atua mo i tatou i tusitusiga paia, mai upu a perofeta soifua, ma e ala i musumusuga a le Agaga Paia. Ae e tatau ona tatou mananao ia faatasi ma talanoa ma le Atua i le tatalo, e pei ona faia e Iesu. O le iloaina o lo tatou sootaga moni ma le Atua, o Ia o lo tatou Tama ma o i tatou o Ana fanau, e avea ai le tatalo ma mea masani (tagai i le Mataio 7:7–11). E tulai mai faigata e ala i le tatalo mai le faagaloina o lenei sootaga.2
Maafaailoga 3: Faaōgatusa o Tatou Loto ma le Finagalo o le Tama Faalelagi
Sa faaōgatusa e Iesu Keriso Lona finagalo ma le finagalo o Lona Tama. I se tasi taimi, a o malaga, sa nofo ai Iesu i le vaieli o Iakopo i fafo atu o le aai o Sokara i Samaria a o ō atu Ona soo i le aai e faatau ni meaai. Sa sau se fafine Samaria e utu vai, ma sa fai atu Iesu ia te ia mo se vai mo Ia. Sa faateia o ia i le talosaga, i le sau ai mai se Iutaia. I le talanoaga na sosoo ai, sa ia iloa ai o Iesu o le Mesia folafolaina. Sa ia toe foi atu i le aai, ma tautino atu ua ia feiloai ma Keriso (tagai i le Ioane 4:3–29).
Ina ua toe foi mai le au soo, sa latou fautuaina Iesu e ai meaai sa latou faatauina (tagai i le Ioane 4:31) ma latou “ofo” ai ona sa Ia fetalai atu i se fafine Samaria (tagai i le Ioane 4:27). Sa tali atu le Faaola, “O la‘u mea e ‘ai ia ia ou faia le finagalo o le na auina mai a’u” (Ioane 4:34). O le mea e ‘ai a Iesu—Lona faamoemoega—o le faia lea o le finagalo o le Tama ma faataunuu le galuega a le Tama. Sa Ia fetalai mai, “Aua Ou te le’i alu ifo mai le lagi e fai lo’u lava loto, a o le finagalo o lē ua auina mai a’u” (Ioane 6:38). Na faatagaina e Iesu Lona finagalo ina ia “tofatumoana i le finagalo o le Tama” (Mosaea 15:7), ma faaōgatusa Lona finagalo ma le finagalo o le Atua. O le isi lea faailoga na tuua e Iesu mo i tatou.
E manaomia ona tatou faaōgatusa ma le lotofuatiaifo o tatou loto ma le finagalo o lo tatou Tama oi le Lagi. O le tatalo o se tasi lea o auala tatou te faia ai. “O le faamoemoega o le tatalo e lē o le suia o le finagalo o le Atua” ae ia fesoasoani ia i tatou e aoao ma talia Lona finagalo.3
Maafaailoga 4: Faia ma Tausia Feagaiga ma le Atua
Sa papatisoina Iesu Keriso “e faataunuu ai le amiotonu uma” (2 Nifae 31:5). Na ia ta’u atu ia Nikotemo, “Afai e lē fanau se tasi i le vai ma le Agaga, e lē mafai ona sao o ia i le malo o le Atua” (Ioane 3:5). Na fetalai atu Iesu i Ona soo o le lumanai, “Mulimuli mai ia te a’u” (Mataio 4:19).
Tatou te faia lea e ala i le faatinoina o le faatuatua ia Iesu Keriso, salamo, papatisoina i Lona suafa, mauaina o le Agaga Paia, ma faaauau pea ona osia ma tausia feagaiga ma le Atua. Ua tatou osifeagaiga e tausi poloaiga a Keriso, ia ua tuuina mai mo lo tatou manuia. O feagaiga taitasi o se maafaailoga i luga o le ala o feagaiga lea e tau atu ia Keriso.
I la matou savaliga sopo i le taumafanafana, sa matou saoloto ai e filifili se isi auala e ese mai i le tumutumu o le mauga, ae atonu e leai se isi auala e ese mai ai, ma atonu o le a leai se ala, e tau atu ai i le afu. Semanū e ono tuai i matou ona o le mau ai i le palapala, o le faalavelaveina e tofē matautia, pe oo mai le fiu ona o le lēlavavā. O le tumau ai i luga o le ala na aumaia ai le auala sili ona tuusao ma mautinoa i lo matou taunuuga.
I le olaga, e lē mafai ona tatou fatuina o tatou lava ala ma faamoemoe i taunuuga folafolaina a le Atua (tagai i le Mataio 7:24–27). Tatou te saoloto e filifili, ae e le mafai ona tatou filifilia taunuuga o le lē mulimuli i le ala ua faaalia mai. E lē mafai ona tatou tautevateva mai se tofē ma “filifili” ia aua ne’i pauu.
Maafaailoga 5: Tumau e oo i le I’uga
Na finagalo Iesu Keriso e “faaiu lana [Tama] galuega” (Ioane 4:34). I luga o le satauro i le faaiuga, ina ua uma ona faamaeaina e Iesu “le galuega lea” na tuu atu e le Atua ia te Ia e fai (Ioane 17:4), sa Ia fetalai, “Ua mae’a” (Ioane 19:30). O le faamae’aina o la tatou galuega o se maafaailoga lea e tatau ai ina ia taunuu atu i lo tatou taunuuga manaomia. Na aoao mai Iesu, “E lē sao atu i le malo o le lagi i latou uma o ē fai mai ia te a’u, Le Alii e, le Alii e; na o lē na te faia le finagalo o lo’u Tama o i le lagi” (Mataio 7:21).
Ia i latou o ē lē faia lena mea, o le a fetalai atu le Faaola, “Tou te le’i iloa lava a’u” (Faaliliuga Iosefa Samita, Mataio 7:33 [i le Mataio 7:23, vaefaamatalaga a]; ua faaopoopo le faamamafa). Afai tatou te lē malamalama i mea na faataunuuina e le Faaola, o le a i’u ina susū ma palapalā o tatou seevae auā tatou te le’i iloaina lava o Ia ma tatou te le’i faatasi lava ma Ia i Lana galuega.
O le iloaina po o ai o Ia, iloaina ma faaōgatusa Lona finagalo ma le finagalo o Lona Tama, osia ma tausia feagaiga ma le Atua, ma le tumau e oo i le i’uga, sa “faailogaina ai e Iesu Keriso le auala ma taitaia ai le ala”4 i le ala tatou te toe foi atu ai i lo tatou aiga faalelagi. O la tatou galuega o le mulimuli lea i na faailoga. O le mea lea, “E lē gata ina tatou faataitai i Lona ala a o” i ai iinei i le lalolagi, ae tatou te faia foi pe afai “o le a avea i tatou ma suli”5 ia maua mea uma o i ai i le Tama Faalelagi (tagai i le Faaliliuga Iosefa Samita, Ioane 3:36 [i le Ioane 3:36, vaefaamatalaga a]).