E Te Manao e Taumafa i le Faamanatuga?

Ata

lima o loo uuina se fata o le faamanatuga ma se isi lima o loo aapa atu mo le falaoa

Ata na tusia e Dilleen Marsh

Sa valaaulia au e se tasi o au uo mamae ou te auai i lana uarota i se Aso Sa anapogi e auai i le faaigoaina ma le faamanuiaina o lona atalii. Ina ua maea le faamanuiaga, sa oo i le taimi mo le faamanatuga.

A o tufaina atu le faamanatuga i le potopotoga, sa ou mātauina le atalii o le uso o la’u uo e ono tausaga le matua, o lē na aafia i le faaletonu le le gauai atu (ADHD). Sa taamilo solo o ia i tua o le falesa ona amata ai lea ona fegalegaleai lemu ma se tasi o alii matua o loo tufaina le faamanatuga.

I le lē mautinoa pe na maua e le tamaitiiti le faamanatuga, sa faaloaloa lemu atu e le tamaloa le fata o le faamanatuga ia te ia. Sa aapa atu le tamaitiiti, taofi mo sina taimi, ona aveese mai lea o lona lima. Sa mulimuli mai i se lē mautonu mo ni nai sekone le toe aapa atu o le tamaitiiti ma aveese mai lona lima. Sa foliga mai sa lē mautinoa e ia le mea e fai. Sa faatalitali ma le onosai le tamālii matua.

Mulimuli ane, sa fesili atu le tamaitiiti, “E te manao ou te ai i le faamanatuga?”

I se leo agaalofa, sa tali atu ai le alii matua, “E te manao e taumafa i le Faamanatuga?”

Sa fai mai le tamaitiiti ioe ma, e aunoa ma se faatuai, ona aapa atu lea o lona lima ma tago i le falaoa. A o ave atu e le alii o loo tufaina le faamanatuga i isi, sa toe foi atu le tamaitiiti i lona aiga ma nofo i lalo.

O le manatuaina o lena fetaliaiga i le va o le alii ma le tamaitiiti na aoaoina ai a’u i le tele o mea e uiga i le ala e fegalegaleai ai le Tama Faalelagi ma i tatou, o Lana fanau.

E lē faamalosia lava e lo tatou Tama oi le Lagi se mea ia i tatou, ae Ua Ia valaaulia ma le alofa ma le onosai i tatou ina ia taumamafa. Ona Ia tu lea ua saunia e faamanuia i tatou, o Ona aao alofa o loo faaloaloa mai pea ia i tatou. Pe a tatou filifili e aapa atu ia te Ia, ua i ai o Ia iina, ua saunia e tuuina mai Lona alofa faavavega ma faamanuiaga i o tatou luga.